تۇركىستان وبلىسىنىڭ قازىعۇرت اۋدانىندا 2 گەكتار اۋماققا جىلدام پىسىرىلەتىن كەسپە شىعاراتىن زاۋىت ءوندىرىسىن كەڭەيتۋ بويىنشا اۋقىمدى جاڭعىرتۋ جۇمىستارى باستالدى.
بيىل قاراشا ايىندا قازىعۇرتتاعى ءوندىرىسى توقتاپ تۇرعان زاۋىتتىڭ مەنشىك يەسى مەن نەپال ەلىنىڭ تۇڭعىش ميللياردەرى بينود چوۋدحاريگە تيەسىلى «Chaudhary Group» (CG Global) كورپوراتسياسى اراسىندا اتالعان زاۋىتتى ساتىپ الۋ تۋرالى كەلىسىم جاسالدى. كەلىسىم-شارت ناتيجەسىندە جاڭا كومپانيا قاجەتتى جابدىقتاردى ورناتىپ, ەكىنشى وندىرىستىك جەلىنى سالۋ جۇمىستارىنا كىرىستى.
كەلەر جىلدىڭ ناۋرىز ايىندا «CG Global» كورپوراتسياسىنىڭ ەنشىلەس كاسىپورنى «CG Foods Central Asia» كومپانياسى ءوندىرىستى تۇبەگەيلى ىسكە قوسىپ, جىلىنا 1100 توننا ءونىم شىعارۋدى جوسپارلاپ وتىر.
«تۇركىستان وبلىسىندا باستاپقى كەزدە ءونىمنىڭ 10 ءتۇرىن شىعارۋدى كوزدەپ وتىرمىز. بارلىق وندىرىستىك تەحنولوگيالار ەۋروپالىق ساپا ستاندارتتارىنا سايكەس كەلەدى. زاۋىت جانىنان تاعى جاڭا تسەح سالامىز, وندا كەسپەگە ارنالعان ارنايى دامدەۋىشتەر شىعارىلادى», دەيدى «CG Foods Central Asia» كومپانياسىنىڭ باس ديرەكتورى كيشور لودحا.
اتالعان تاماق ونىمدەرىن دايىنداۋدا 70 پايىز وتاندىق, 30 پايىز مالايزيا, سينگاپۋر جانە ءۇندىستاننان كەلگەن شيكىزاتتار پايدالانىلماق. ال, دايىن ءونىم ورتالىق ازيا ەلدەرىنە ەكسپورتتالادى.
«CG Foods Central Asia» كومپانياسى وزبەكستان, تاجىكستان, قىرعىزستان سىندى ەلدەردە ساتىلىم نارىعىن قالىپتاستىرعان. سونىمەن قاتار كورپوراتسيانىڭ ءونىمى ءۇندىستان نارىعىنىڭ 60 پايىزىن قامداي الادى. الەۋەتتى تۇتىنۋشىلار سانى شامامەن 200 ميلليونعا جۋىق ادامدى قۇرايدى. بۇل – وتە ۇلكەن كولەمدەگى نارىق. تۇركىستان وبلىسىندا كەسپە «Wai-wai» برەندىمەن شىعارىلادى. ول تاي تىلىنەن اۋدارعاندا «تەز-تەز» دەگەن ماعىنانى بىلدىرەدى. جەرگىلىكتى تۇتىنۋشىلار ءۇشىن ءونىمنىڭ ماڭىزدى تۇسى – بارلىق ءونىم حالال بولادى», دەيدى «تۇركىستان» اكك» اق فيليالى «Turkistan Invest» كومپانياسىنىڭ سىرتقى بايلانىستار جونىندەگى باسقارۋشى ديرەكتورى بايان كايۋپوۆا.
اتالعان ينۆەستيتسيالىق جوباعا «TURKISTAN INVEST» كومپانياسىنىڭ ۇجىمى ۇلكەن قولداۋ بىلدىرگەن. ءتيىستى قۇجاتتاردى دايىنداۋ, جەر تەلىمىن زاڭداستىرۋ, تەحنيكالىق جانە ينفراقۇرىلىمدىق ماسەلەلەردى شەشۋگە دەيىن ءبىر تەرەزە قاعيداسى بويىنشا قىزمەت كورسەتىپتى.
«جوبانى ىسكە اسىرۋدا جەرگىلىكتى بيلىك كوپ كومەك كورسەتتى. وبلىس اكىمى جانسەيىت تۇيمەباەۆ باستاعان باسشىلىققا العىس ايتامىن. جوبا بارىسىندا تۋىنداعان ماسەلەلەر تەز ارادا شەشىمىن تاپتى. مەن ءۇشىن بۇل ۇلكەن قۇرمەت. بيزنەستە ەڭ باستى دۇنيە بۇل – سەنىم, ول ادال سەرىكتەستىك قۇرۋدا جانە ونى ارى قاراي ءساتتى دامىتۋدا وتە ماڭىزدى. «TURKISTAN INVEST» كومپانياسىنىڭ ىسكەرلىك قارىم-قاتىناستارداعى كəسىبي بىلىكتىلىگى ۇنادى», دەدى نەپالدىق كاسىپكەر.
جوبا اياسىندا 100-دەن استام جۇمىس ورنى قۇرىلىپ, جەرگىلىكتى تۇرعىنداردى جۇمىسپەن قامتۋ جوسپارلانۋدا.
تۇركىستان وبلىسىنا ينۆەستيتسيا سالۋعا كەلگەن «CG Global» كورپوراتسياسىنىڭ يەسى بينود چوۋدحاري 2013 جىلى Forbes تىزىمىنە ەنگەن. الەمنىڭ 30-دان استام ەلىندە 11 ءتۇرلى باعىتتا جۇمىس ىستەيتىن 80 كومپانيادان قۇرالعان (6 مىڭ قىزمەتكەر) يمپەريانى قۇرۋ ءۇشىن وعان 40 جىل قاجەت بولدى. بۇگىندە ونىڭ بايلىعى 1,5 ملرد دوللاردى قۇرايدى.
نۇرشات توكەن,
«ەگەمەن قازاقستان»