ءۇشىنشى توقساننان باستاپ ءوڭىر مەكتەپتەرىندە “ولكەتانۋ” ءپانى وقىتىلا باستايدى.
كىتاپ اۆتورلارىمەن ۇيىمداستىرىلعان كەزدەسۋدە جينالعاندار قاسيەتتى قىزىلجار ايماعىنىڭ كيەلى جەرلەرى, داڭقتى تۇلعالارى, كوركەم تابيعاتى جايلى جان-جاقتى ماعلۇماتتار الدى.
«ەلباسى نۇرسۇلتان نازارباەۆ “بولاشاققا باعدار: رۋحاني جاڭعىرۋ” باعدارلامالىق ماقالاسىندا: ء“پاتريوتيزمنىڭ ەڭ جاقسى ۇلگىسى ورتا مەكتەپتە تۋعان جەردىڭ تاريحىن وقۋدان كورىنىس تاپسا يگى. تۋعان جەردىڭ ءاربىر سايى مەن قىرقاسى, تاۋى مەن وزەنى تاريحتان سىر شەرتەدى. ءاربىر جەر اتاۋىنىڭ توركىنى تۋرالى تالاي-تالاي اڭىزدار مەن اڭگىمەلەر بار. ءاربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس», دەگەن بولاتىن. ەلىمىزدىڭ جاس ورەندەرى مەكتەپ قابىرعاسىندا ءوز تۋعان ولكەسىن تانىپ ءبىلۋى كەرەك»دەيدى وقۋلىق اۆتورلارىنىڭ ءبىرى, م. قوزىباەۆ اتىنداعى سقمۋ-ءنىڭ پروفەسسورى زارقىن تايشىباي.
ونىمەن بىرگە تاريح عىلىمدارىنىڭ دوكتورى اقمارال يبراەۆا, مەملەكەتتىك ءارحيۆتىڭ ديرەكتورى, تاريح عىلىمدارىنىڭ كانديداتى ساۋلە مالىكوۆا بىرىگىپ جازعان “ولكەتانۋ” وقۋلىعى جاڭا جىلدان باستاپ 5-7-سىنىپتاردا وقيتىن 14 مىڭ وقۋشىنىڭ قولىنا تيەدى.
ءبىلىم باسقارماسىنىڭ باسشىسى گۇلميرا كارىموۆانىڭ ايتۋىنشا, جاڭارتىلعان مازمۇن بويىنشا وقيتىن مەكتەپتەرگە ارنالعان وقۋلىقتا “قازاقستان تاريحى”, “قازاق ادەبيەتى”, “گەوگرافيا”, “مۋزىكا” پاندەرىنە قوسىمشا تەرەڭ ءبىلىم الۋعا قاجەتتى ماعلۇماتتار توپتاستىرىلعان. بالالاردىڭ زەرتتەۋ داعدىلارىن دامىتۋعا ارنالعان ءتۇرلى تاپسىرمالار ۇسىنىلعان. وقۋلىق بالالاردىڭ جاس ەرەكشەلىكتەرىنە بايلانىستى جەڭىل جازىلعان, سۋرەتتەرمەن كوركەمدەلگەن. الداعى ۋاقىتتا قوسىمشا حرەستوماتيالار مەن بەينە ديسكىلەر بار انىقتاما كىتاپشالارمەن تولىقتىرىلماق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى