الماتىدا تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ كەسكىندەمە, ءمۇسىن جانە ديزاين فاكۋلتەتى, ساندىك قولدانبالى ونەر كافەدراسىنىڭ وقىتۋشىلارى مەن ستۋدەنتتەرىنىڭ «ساز بالشىقتىڭ سىرى» اتتى توپتىق شىعارماشىلىق كورمەسىنىڭ اشىلۋ سالتاناتى ءوتتى.
شىعارماشىلىق كورمەنى وتكىزۋدەگى باستى ماقسات – ۇلتتىق قۇندىلىقتارىمىزدىڭ ءبىرى قىش ونەرىن قايتا جانداندىرۋ. ساپاسى وتە بەرىك كەلەتىن قىش بۇيىمداردى ءوندىرۋدىڭ تاريحى ارىدە جاتىر. اۋەلدە شارۋاشىلىق, تۇرمىستىق ماقساتتا كەڭ قولدانىسقا يە بولعان قىش ءوندىرىسىنىڭ تەحنولوگيالىق تاسىلدەرى بۇگىندە الدەقايدا جەتىلە تۇسكەن. ماسەلەن, وسى كورمەگە قويىلعان ءتۇرلى كادەسىيلار, گۇلگە ارنالعان ادەمى قۇمىرالار, قىشتان جاسالعان كارتينالار مەن فوتوسۋرەتكە ارنالعان رامكالار كوپتىڭ قىزىعۋشىلىعىن وياتىپ, وزىندىك دارالىعىمەن ۇلكەن سۇرانىسقا يە ەكەنىن اڭعارتتى. ساندىك قولدانبالى ونەر كافەدراسىنىڭ ستۋدەنتتەرى مەن اكادەميالىق ۇتقىرلىق بويىنشا فاكۋلتەتتە وقىپ جاتقان رەسەيلىك ستۋدەنتتەر الەكساندرا شۋپلياكوۆا جانە تاتيانا تەتەرينا شەبەرلىك دارىستەرىن كورسەتتى.
– Əر حالىقتىڭ تاريحى قاسيەتتى قۇندىلىقتارىمەن قىمبات ەكەنىن مەملەكەت باسشىسى « ۇلى دالانىڭ جەتى قىرى» ماقالاسىندا ايرىقشا اتادى. ستۋدەنتتەردىڭ وقۋ جانە شىعارماشىلىق جۇمىستارى اياسىندا كوپشىلىككە ۇلتتىق داستۇرىمىزدە ەرەكشە تاريحي مانگە يە ۇلتىمىزدىڭ قولونەر بۇيىمدارىن كەڭىنەن ناسيحاتتاۋ باستى ماقساتىمىز, – دەيدى كەسكىندەمە, ءمۇسىن جانە ديزاين فاكۋلتەتىنىڭ دەكانى باۋىرجان ءبايدىلدا.
كورمە بارىسىندا اكادەميانىڭ ستۋدەنتتەرى ۇلتتىق كۇيىمىز بەن جىرىمىزدى اۋەلەتىپ, كوپشىلىكتى ءتانتى ەتتى. كورمەگە جيىلعان قاۋىم قازاقتىڭ قاسيەتتى قولونەر بۇيىمدارىن اسقان شەبەرلىكپەن جاساپ جۇرگەن ون ساۋساعىنان ونەر تامعان جاستارعا ۇلكەن ريزاشىلىعىن ءبىلدىردى.
ساپارباي پارمانقۇل,
«ەگەمەن قازاقستان»
الماتى