جاستاردى جۇمىسپەن قامتۋ, ولاردى جۇمىسشى ماماندىقتارىنا وقىتۋ ماسەلەسى بۇگىندە وزەكتى. ەلباسى ءاردايىم بۇل جايىندا ايتىپ كەلەدى. بارلىق دەڭگەيدەگى اكىمدەر ەسەپ بەرگەندە دە قانشاما ادامنىڭ جۇمىسقا ورنالاسقانىن مالىمدەپ جاتادى. سونىمەن قاتار وبلىس ورتالىعىنان, بولماسا اۋدانداردان كاسىپورىن اشىلاتىن بولسا دا قانشا جۇمىس ورنىنىڭ اشىلاتىنىن سۇيىنشىلەي جەتكىزەدى. بۇل ارينە جاقسىلىقتىڭ نىشانى.
جۋىردا جامبىل وبلىسىنا ۇكىمەت باسشىسى جۇمىس ساپارىمەن كەلىپ, پرەزيدەنت جولداۋىنىڭ وڭىردەگى ىسكە اسىرىلۋ بارىسىمەن تانىسقانى بەلگىلى. تاراز قالالىق جۇمىسپەن قامتۋ ورتالىعىندا پرەمەر-مينيسترگە قانشا ازاماتتىڭ جۇمىسشى ماماندىقتارى بويىنشا ءبىلىم العانى باياندالدى. ارينە مەملەكەتتىڭ قولداۋى ناتيجەسىندە جۇزەگە اسقان جۇمىستىڭ جەمىسى بولادى. بىراق ۇكىمەت باسشىسى 4 مىڭنان اسا ازاماتتىڭ قانشاسى جۇمىسپەن قامتىلعانى تۋرالى ورتالىق ديرەكتورى ەلدوس كەڭەسبەكوۆتەن سۇراعانىندا, ول ەشتەڭە بىلمەي داعداردى. تالاي جۇمىسسىز تۇرعىننىڭ ءۇمىت كۇتىپ وتىرعان ورتالىعىنىڭ باسشىسى بۇل ماسەلەدەن بەيحابار ەكەن. تەك سىرعىتپا جاۋاپپەن, ياعني قىرىق بەس پايىزى جۇمىسپەن قامتىلدى دەگەن سوزبەن دە قۇتىلا المادى. ۇكىمەت باسشىسى ناقتىلاپ قايتا سۇراپ ەدى, سول كۇيى ءۇنسىز قالعان. تىم بولماسا وسىنداي جاۋاپتى كەزەڭدە دايىندالۋىنا بولادى عوي. باسشىنىڭ مىندەتى تسيفر جاتتاۋ بولماسا دا, ءوزى اتقارىپ وتىرعان جۇمىستى ءوزى بىلمەيتىنى قاي اقىلعا سىيادى. سوندا كوبىسىنىڭ جۇمىسى تەك قىزمەتتىك ورنىنا بارىپ-قايتۋ عانا بولعانى ما؟ الدە تەك بۇيرىق بەرۋ ءىستى ىلگەرىلەتە مە؟ ال ءتيىستى مەكەمە باسشىلارى وزدەرىنىڭ جۇمىسىن وسىلاي بىلمەي جاتقاندا, وزگەلەردەن نە سۇراۋعا بولادى.
باسشى بىلمەگەندى قوسشى قايدان بىلەدى. كوپشىلىك سەنىپ وتىرعان باسشىلاردىڭ بولماشى نارسەنى بىلمەۋى قوعامعا پايدا اكەلمەسى انىق.
حاميت ەسامان,
«ەگەمەن قازاقستان»
جامبىل وبلىسى