وسكەمەندە مارات باتحوللا ۇلى ءمۋسيندى ەسكە الۋعا ارنالعان مەكەمەلەر, كاسىپورىندار, ۇجىمدار مەن كلۋبتار ارداگەرلەرى اراسىنداعى ۆولەيبولدان وبلىستىق تۋرنير بولىپ ءوتتى.
مارات اعا وبلىس, اۋداندا ونداعان قۇرىلىس عيماراتتارىن سالعان, وڭىردە ءبىرىنشى بولىپ سوناۋ سەنسەنىنشى جىلدارى «ايدىن» اتتى قۇرىلىس كووپەراتيۆىن قۇرعان جاڭاشىل ازامات بولاتىن. امال بار ما, جاڭاشىل اعامىز وسىدان 26 جىل بۇرىن 58 جاسىندا ومىردەن ءوتتى. بۇل تۋرنير بۇرىن قايرات مارات ۇلىنىڭ جۇبايى, شىعىستاعى تۇڭعىش كاسىپكەر ايەل ءانيا جامبىلقىزىن ەسكە الۋعا ارنالعان بولاتىن. ءتۋرنيردى ۇيىمداستىرعان اۋعان سوعىسىنىڭ ارداگەرى, «قۇرمەت» وردەنىنىڭ يەگەرى قايرات ءمۋسيننىڭ ەسىمى كەڭىنەن تانىمال, قاسىم قايسەنوۆ كەنتىندە مەشىت, ارداگەرلەرگە ارنالعان مەموريال سالىپ بەرگەن.
تۋرنيرگە زايسان, بەسقاراعاي, ۇلان, وسكەمەن, سەمەي قالالارىنان 11 كوماندا قاتىستى. ونىڭ سالتاناتتى اشىلۋىندا مارات اعانىڭ جۇبايى ءمارزيا اپاي, زامانداستارى, مەتسەناتتار قاتىستى. تارتىستى وتكەن تۋرنيردە اقتىق سايىسقا «التاي», قۇرىلىسشىلاردىڭ مادەنيەت سارايى جانە اۋعان سوعىسى ارداگەرلەرىنەن قۇرىلعان كوماندالار شىقتى. وسى ءۇش كوماندا جۇلدەلى ورىنداردى يەلەندى. ءبىرىنشى ورىن العان كومانداعا 500 مىڭ, ەكىنشى, ءۇشىنشى ورىنعا تابان تىرەگەندەرگە تيىسىنشە 300,200 مىڭ تەڭگە بەرىلدى. باسقا ارداگەرلەر دە گراموتالار مەن ەسكەرتكىش سىيلىقتارعا يە بولدى.
- ماقساتىمىز بۇقارالىق سپورتتى دامىتۋ, ەلباسىنىڭ جولداۋىندا ايتىلعان مىندەتتەردى ورىنداۋ. الداعى ۋاقىتتا ءتۋرنيردى رەسپۋبليكالىق دارەجەگە جەتكىزۋدى كوزدەپ وتىرمىز. قاراڭىزدارشى, جاسى 50, 60-تان اسقان اعالارىمىز ۆولەيبولدى قالاي شەبەر وينايدى,-دەيدى قايرات مارات ۇلى.
تۋرنير اياقتالعان سوڭ مارات اعاعا ارنالىپ قۇران-قاتىم ءتۇسىرىلدى.
وڭداسىن ەلۋباي,
وسكەمەن