بىرىڭعاي جيناقتاۋشى زەينەتاقى قورى زەينەتاقى جيناقتارىنىڭ قۇرمەتتى دەمالىسقا شىققاندا الاڭسىز ءومىر سۇرۋگە ارنالعان ينۆەستيتسيا ەكەندىگىن تاعى دا ەسكە سالا وتىرىپ, 2018 جىلدىڭ ۇزدىك جۇمىس بەرۋشىسىن اتادى.
زەينەت جاسىندا لايىقتى تابىس الۋ ءۇشىن مىندەتتى زەينەتاقى جارنالارىن, ونىڭ ىشىندە ەرىكتى جارنالاردى دا ۋاقتىلى جانە تولىق كولەمدە قورعا اۋدارىپ وتىرۋ قاجەت. قازاقستاندىقتار ەرىكتى جارنالاردى ءوزىنىڭ نەمەسە (جۇمىس ىستەمەيتىن, تابىسى از) تۋعان-تۋىستارىنىڭ پايداسىنا اۋدارا الادى. بۇدان باسقا, جۇمىس بەرۋشىلەر دە جۇمىسكەرلەرىن جۇمىسقا ىنتالاندىرۋ ءۇشىن ولاردىڭ پايداسىنا ەرىكتى زەينەتاقى جارنالارىن (ەزج) اۋدارا الادى.
قازاقستاندا ءوز قىزمەتكەرلەرىنىڭ بۇگىنى مەن بولاشاعىن ويلايتىن كومپانيالار كوپ ەمەس. بىراق بار. بجزق ماماندارى وتاندىق كومپانيالار تاراپىنان 2017 جىلدىڭ تامىزى مەن 2018 جىلدىڭ تامىزى ارالىعىندا اۋدارىلعان ەرىكتى زەينەتاقى جارنالارىنىڭ كولەمىنە تالداۋ جاسادى. تالداۋ قورىتىندىسى بويىنشا ەزج تولەۋشى-جۇمىس بەرۋشىلەردىڭ ءتىزىمى جاسالىپ, جارنالاردىڭ سانىنا قاراي, «بجزق» اق تاڭداۋى بويىنشا 2018 جىلدىڭ ۇزدىك جۇمىس بەرۋشىسى» بايقاۋىنىڭ جەڭىمپازى انىقتالدى. ول – «قازاقتەلەكوم» اكتسيونەرلىك قوعامى.
قور باسشىلىعىنىڭ ايتۋىنشا, «قازاقتەلەكوم» اق – HR-ساياساتى (كادرلىق ساياساتى) ناقتى قالىپتاسقان قازاقستاندىق كومپانيالاردىڭ ءبىرى. وندا قىزمەتكەرلەر قۇرامى, ولاردىڭ بىلىكتىلىگى, جۇمىسقا دەگەن ىنتاسى ۇلكەن ماڭىزعا يە. قازاقتەلەكومنىڭ ءوتىپ بارا جاتقان جىلدىڭ ەڭ ۇزدىك كومپانياسى اتانۋى – قىزمەتكەرلەرىنىڭ بۇگىنى مەن بولاشاعىن قامسىزداندىرۋعا ەرەكشە كوڭىل بولەتىن, الەۋمەتتىك-جاۋاپتى, ادال نيەتتى, قىزمەتكەرلەرى ءۇشىن اشىق كومپانيا ەكەندىگىن بىلدىرەدى. ءوز كەزەگىندە قور باسشىلىعى قولايلى ەڭبەك جاعدايلارىن جاساۋعا, ەڭبەك ۇجىمىنىڭ زەينەتاقى جيناقتارىن قالىپتاستىرۋعا ۇمتىلاتىن كومپانيالار سانىنىڭ ءالى دە ارتا تۇسەتىندىگىنە ءۇمىت ارتادى.
سالتاناتتى ماراپاتتاۋ ءراسىمى الماتى قالاسىندا «قازاقستان رەسپۋبليكاسىنىڭ جيناقتاۋشى زەينەتاقى جۇيەسىنە 20 جىل: قورىتىندىلار, سىن-تەگەۋرىندەر, دامۋ كەلەشەگى» اتتى تاقىرىپ اياسىنداعى دوڭگەلەك ۇستەل بارىسىندا ءوتتى.
ايناش ەسالي,
«ەگەمەن قازاقستان».
الماتى