پارلامەنت سەناتىندا تاۋەلسىزدىك كۇنىنە ارنالعان سالتاناتتى جينالىس بولدى. وعان دەپۋتاتتار مەن اپپارات قىزمەتكەرلەرى قاتىستى, دەپ حابارلادى وسى پالاتانىڭ ءباسپاسوز قىزمەتى.
سەنات توراعاسى قاسىم-جومارت توقاەۆ مەرەكەلىك شارانى اشا كەلىپ, قازاقستان پرەزيدەنتى نۇرسۇلتان نازارباەۆ وسىدان 27 جىل بۇرىن اسا كۇردەلى گەوساياسي جاعدايدا تاۋەلسىزدىكتى جاريالاعانىن اتاپ ءوتتى. داعدارىستار مەن باسقا دا قاۋىپ-قاتەرلەرگە قاراماستان, مەملەكەت باسشىسى ەلىمىزدى سەنىممەن العا باستاپ كەلە جاتقانى ايتىلدى.
«ارتىق جولداس تاپپادىم تاتۋلىقتان», دەپ حالقىمىزدىڭ ۇلى پەرزەنتى, حاكىم اباي ايتقانداي, قازاقستان قوعامىنىڭ ىنتىماعى مەن بىرلىگى ءبىزدىڭ مەملەكەتتىلىگىمىزدىڭ نەگىزگى ۇستانىمىنا اينالدى. تاۋەلسىزدىككە قول جەتكىزۋ ارقىلى تاريحىمىز بەن مادەنيەتىمىزدى جاڭعىرتتىق, ەكونوميكامىزدى وركەندەتىپ, قۋاتتى مەملەكەت قالىپتاستىردىق. قازاقستاننىڭ بيىك بەلەستەردى باعىندىرىپ كەلە جاتقان ءار قادامى, تابىسى مەن جەڭىسى – تاۋەلسىزدىكتىڭ ارقاسى», دەدى ق.توقاەۆ.
حالقىمىزدىڭ «ەڭبەك ەرلىككە جەتكىزەر, ەرلىك ەلدىككە جەتكىزەر» دەگەن دانالىق ءسوزىن اتاپ وتكەن سەنات باسشىسى ەلباسىنىڭ مەملەكەتىمىزدى نىعايتۋ جولىنداعى قاجىرلى ەڭبەگى ناعىز ەرلىكتىڭ ۇلگىسى ەكەنىن ايتتى.
ۇلى ماقساتتاردى كوزدەگەن حالقىمىزدىڭ جارقىن بولاشاعى جولىندا مەملەكەت باسشىسىنىڭ اسقان كورەگەندىك پەن جاسامپازدىق تانىتىپ كەلە جاتقانى ايتىلدى.
بۇگىندە قايتا جاڭعىرعان مادەنيەتىمىز بەن رۋحانياتىمىز ەلباسىنىڭ قولداۋىمەن جاڭا ارناعا بەت بۇرعانىن اتاپ وتە كەلىپ, سەنات توراعاسى مەملەكەت باسشىسىنىڭ «رۋحاني جاڭعىرۋ» باعدارلاماسى حالقىمىزدىڭ تامىرى تەرەڭ مۇراسىن ۇلىقتاعان ءتول تاريحىمىزعا جاڭا تىنىس بەرەتىن بىرەگەي باستاما ەكەنىنە توقتالدى. سونىمەن قاتار پرەزيدەنتتىڭ « ۇلى دالانىڭ جەتى قىرى» ماقالاسىندا «دالا وركەنيەتىنىڭ» الەم تاريحىنداعى ماڭىزى جانە ونىڭ ادامزات وركەنيەتىنە ۇسىنعان قۇندىلىقتارى كورسەتىلگەنى ايتىلدى.
« ۇلى دالانىڭ سان عاسىرلىق ۇلاعاتى ۇلت تاريحىن جالعاستىرۋشى كەلەشەك بۋىن وكىلدەرىنىڭ ەرتەڭىنە جول اشاتىنىنا كۇمان جوق», دەدى سەنات باسشىسى.
27 جىل ىشىندە مەملەكەتتىلىگىمىزدىڭ مىقتى ىرگەتاسى قالىپتاستى, قازاقستان الەمدىك قاۋىمداستىقتاعى بەدەلى جوعارى مەملەكەتكە اينالدى, دەگەن ق.توقاەۆ پرەزيدەنت جولداۋىنداعى حالىقتىڭ ءال-اۋقاتىن جاقسارتۋعا باعىتتالعان جاڭا سيپاتتاعى مىندەتتەردى اتاپ ءوتتى.
«تاۋەلسىزدىكتىڭ ارقاسىندا قول جەتكىزگەن جەتىستىكتەردى ودان ءارى نىعايتۋ ءۇشىن حالقىمىزدىڭ كوكەيىندەگى وزەكتى ماسەلەلەرگە نازار اۋدارۋىمىز كەرەك. حالىقتىڭ الەۋمەتتىك جاعدايىن جاقسارتۋدىڭ ماڭىزدىلىعى قازىرگى الەمدىك احۋالدىڭ شيەلەنىسكەن تۇسىندا اسا وزەكتى ماسەلە», دەدى ول.
ۇلتتىق مەرەكەمىزگە وراي مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, سونداي-اق حالىقتار دوستىعى مەن ىنتىماقتاستىعىنا قوسقان ەلەۋلى ۇلەسى ءۇشىن ءبىر توپ سەنات دەپۋتاتتارى ەلباسىنىڭ جارلىعىمەن مەملەكەتتىك ناگرادالارمەن ماراپاتتالدى.
قازاقستان رەسپۋبليكاسى پرەزيدەنتىنىڭ جارلىعىمەن ءالي بەكتاەۆ پەن باقتىباي شەلپەكوۆ «پاراسات» وردەنىمەن, ۆلاديمير ۆولكوۆ پەن ەدىل مامىتبەكوۆ «قۇرمەت» وردەنىمەن ماراپاتتالدى.
سەناتورلار جەڭىس نۇرعاليەۆ پەن راشيد تۇسىپبەكوۆ, سونداي-اق قازاقستان رەسپۋبليكاسى ارداگەرلەر كەڭەسى توراعاسىنىڭ ءبىرىنشى ورىنباسارى ومىرزاق وزعانباەۆ تمد پارلامەنتارالىق اسسامبلەياسىنىڭ «سودرۋجەستۆو» وردەنىمەن ماراپاتتالدى. مۇحتار قۇل-مۇحاممەد پەن ەرىك سۇلتانوۆقا «پارلامەنتارالىق ىنتىماقتاستىقتى نىعايتقانى ءۇشىن» مەدالى, رىسقالي ابدىكەروۆ, ۆلاديمير ۆولكوۆ, دۇيسەنعازى مۋسين, ناريمان تورەعاليەۆكە تمد پاا قۇرمەت گراموتاسى بەرىلدى.
دەپۋتات سارسەنباي ەڭسەگەنوۆ پەن بۇرىنعى سەناتورلار ءادىل احمەتوۆ, قايرات يششانوۆ, نۇرلان ورازالين, ورىنباي راحمانبەرديەۆ تۇركىتىلدەس ەلدەر پارلامەنتتىك اسسامبلەياسىنىڭ قاۋلىسىمەن «تۇركپا-عا − 10 جىل» مەدالىمەن ماراپاتتالدى.