تاۋەلسىزدىك كۇنىنە وراي اشىلعان «وقسىز» سپورت كەشەنى الەمنىڭ ەكىنشى ۇستازى اتانعان ءابۋ ناسىر ءال-ءفارابيدىڭ كىندىك قانى تامعان ەجەلگى وقسىز قالاسىنىڭ اتاۋىن يەلەندى. ەكى قاباتتى عيمارات 210 ادامعا لايىقتالعان, 23 سپورت ۇيىرمەلەرى جۇمىس ىستەيدى. سونداي-اق, وبلىستىق, رەسپۋبليكالىق دارەجەدەگى ءتۇرلى سپورتتىق شارالاردى وتكىزۋ مۇمكىندىگىنە يە.
تۇركىستان وبلىسى وتىرار اۋدانىنان شىققان اقىندار, عۇلاما عالىمدار عانا ەمەس, سپورتتىق باسەكەلەردە توپ جارىپ جۇرگەن سايىپقىران ساڭلاقتارى دا ەل ابىرويىن اسپانداتىپ, كوك تۋدى كوككە كوتەرىپ كەلەدى. «ەلباسى ن.نازارباەۆتىڭ "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى جولداۋىندا ەلىمىز بويىنشا 100 سپورتتىق نىسان سالۋ جونىندە ايتىلعان بولاتىن. ەلباسى تاپسىرماسىنا سايكەس وتىرارلىقتار العاشقىلاردىڭ قاتارىندا تاماشا سپورت كەشەنىن پايدالانۋعا بەردى. ەڭسەلى عيماراتتان الداعى كەزدەردە تاۋەلسىز ەلىمىزدىڭ, قۇت پەن كيە قونعان قاسيەتتى ولكەمىزدىڭ اتىن شىعارىپ, الەمگە تانىتاتىن نەبىر چەمپيوندار شىعاتىنىنا تولىق سەنىمدىمىز», -دەدى اۋدان اكىمى ەرلان ايتاحانوۆ كەشەننىڭ اشىلۋ سالتاناتىندا.
جاڭا سپورت كەشەنىندە تۇركىستان وبلىسىنىڭ اۋداندارى مەن شىمكەنت قالاسىنىڭ بالۋاندارى قازاقشا كۇرەستەن كۇش سىناستى. تۇيە بالۋانداردىڭ اقتىق سىنىندا وتىرار اۋدانىنىڭ نامىسىن قورعاعان جولداسبەك بەكتۇرسىنوۆ جەڭىمپاز اتانىپ, 1 ملن تەڭگەنى قانجىعاسىنا بايلادى.
عالىمجان ەلشىباي,
«ەگەمەن قازاقستان»
تۇركىستان وبلىسى