باتىس قازاقستان وبلىسىندا تاۋەلسىزدىك قۇرباندارىنا اس بەرىلدى

قازاقستاننىڭ باتىس وڭىرىنە جانە شەكارالاس رەسەي ايماعىنا بەلگىلى زيارات ورنى – ەل-جۇرت دادەم اتا دەپ قاستەرلەيتىن اۋليە جۇماعازى قازىرەت كەسەنەسىندە وسىنداي شارا بيىل بەسىنشى مارتە وتكىزىلىپ وتىر.

- ءبىز ءداستۇرلى تۇردە ءار جىل سايىن 4 مارتە ارنايى قۇربان شالىپ, كوپشىلىككە ارنالعان اس بەرەمىز. ونىڭ ءبىرى 14 ناۋرىز – قازاقستاننىڭ باتىس وڭىرىنە تارالعان كورىسۋ كۇنى مەرەكەسى. ودان كەيىن 31 مامىر – ساياسي قۋعىن-سۇرگىن جانە اشارشىلىق قۇرباندارىنا ارناپ مال سويىپ, قۇران باعىشتايمىز. تامىزدىڭ ەكىنشى جەكسەنبىسىندە – جۇماعازى قازىرەتتىڭ وزىنە ارنالعان اس بەرىلەدى. ال جىل سوڭىنا قاراي, قازاقستاننىڭ تاۋەلسىزدىك كۇنى - 16 جەلتوقساندا – قازاق حالقىنىڭ تاۋەلسىزدىگى جولىندا كۇرەسكەن حاندارىمىز بەن بيلەرىمىزدىڭ, باتىرلارىمىز بەن بارشا بوزداقتاردىڭ رۋحىنا باعىشتاپ شارا وتكىزەمىز, - دەيدى «دادەم اتا» قوعامدىق قورىنىڭ توراعاسى عاريفوللا جامبوزوۆ.  

اۋا رايىنىڭ قولايسىزدىعىنا قاراماستان ورال قالاسىنان 80 شاقىرىمداي قاشىق جاتقان زيارات كەشەنگە حالىق كوپ جينالدى. ايتا كەتەيىك, «تولاعاي» قوعامدىق بىرلەستىگىنىڭ جەتەكشىسى, بلوگەر نۇرلان ءسادىردىڭ ۇيىمداستىرۋىمەن ءدىني-عيبادات ورىنداعى شارانىڭ قوعامدىق سيپاتى باسىم بولدى. ماسەلەن, باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ وقىتۋشىسى, ولكەتانۋشى سايلاۋ سۇلەيمەنوۆ قازاقستان تاۋەلسىزدىگىنىڭ 27-جىلىندا اتالىپ وتىلەتىن تاريحي وقيعالارعا, مەرەيلى داتالارعا شولۋ جاساسا, قازاقستاننىڭ ەڭبەك سىڭىرگەن قايراتكەرى, حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ ارداگەر ءارتيسى گۇلجيان شىنتەمىر بيىل 25 جىلدىعىن اتاپ وتكەلى وتىرعان تاۋەلسىزدىك تۋدىرعان تەاتردىڭ قالىپتاسۋ تاريحىنان ەستەلىك ايتتى.

باتىس قازاقستان وبلىستىق تاريح جانە ارحەولوگيا ورتالىعىنىڭ ديرەكتورى جانتاس سافۋللين بەلگىلى اعارتۋشى, اقىن عۇمار قاراشتىڭ ۇشتومدىق جيناعىن تانىستىرسا, اقىن, ءبىلىم سالاسىنىڭ ارداگەرى داريعا مۇشتانوۆا ءوزىنىڭ «ابىسىندار» جيناعىن «دادەم اتا» قورىنىڭ كىتاپحاناسىنا سىيعا تارتتى. اتىراۋ قالاسىنان ارنايى كەلگەن كاسىپكەر مارال قابىل تابيعاتى قولايسىز وڭىردە باۋ-باقشا ەگۋ تاجىريبەسىن ورتاعا سالىپ, جۇماعازى قازىرەت زياراتى كەشەنىن اباتتاندىرۋ تۋرالى ۇسىنىس جاسادى. اسان مەشىتىنىڭ يمامى مۇراتبەك قاجى جاحاتوۆ قۇران اياتىن وقىپ, ساۋابىن تاۋەلسىزدىك قۇرباندارىنا باعىشتاعان سوڭ ءحىح عاىرداعى قازاق دالاسىندا, سونىڭ ىشىندە بوكەيلىكتە بولعان ءدىني-اعارتۋ جۇمىسى, مەشىت-مەدرەسەلەردىڭ قىزمەتى تۋرالى رەسەي فەدەراتسياسىنىڭ ۋفا ارحيۆىندە ساقتالعان تاريحي قۇجاتتار تۋرالى ايتىپ بەردى. زيارات كەشەن ورنالاسقان سىرىم اۋدانى شولاقاڭقاتى اۋىلدىق وكرۋگىنىڭ اكىمى تيمۋر ايتقاليەۆ ءوز سوزىندە «رۋحاني جاڭعىرۋ» باعدارلاماسى اياسىندا قازاقستاننىڭ جالپىۇلتتىق قاسيەتتى نىساندارى تىزىمىنە ەنگىزىلگەلى جۇماعازى قازىرەت كەشەنىنە ەلىمىزدىڭ تۇكپىر-تۇكپىرىنەن كەلۋشىلەر كوبەيگەنىن اتاپ ءوتتى.

ايتا كەتەيىك, جەرگىلىكتى اتقارۋ ورگاندارى زيارات كەشەننىڭ جان-جاقتى دامۋىنا قولداۋ كورسەتۋدە. وتكەن كۇزدە وسى جەرگە ارنايى كەلگەن ءوڭىر باسشىسى التاي كولگىنوۆ 2019 جىلى كەشەنگە اپارار ءۇش شاقىرىمدىق جولدىڭ جوندەلەتىنىن مالىمدەگەن بولاتىن.

- كەز كەلگەن كوپشىلىك مەرەكەنىڭ باستى ماقساتى – كۇندەلىكتى ومىردە قىزمەت سالاسى, كوزقاراسى ءارتۇرلى ادامداردىڭ باسىن قوسۋ, بىرىكتىرۋ عوي. سونىڭ ىشىندە تومەننەن, حالىقتىڭ ءوز ىشىنەن شىققان باستامانىڭ ورنى بولەك. ەلىمىزدە تاۋەلسىزدىك مەرەكەسىن اتاپ ءوتۋدىڭ جالپىحالىقتىق فورماسى ءالى قالىپتاسپاعان كەزەڭدە وسىنداي ءداستۇرلى شارا, قازاقى ۇعىمعا جاقىن جيىندار وتە كەرەك. بۇگىنگى باسقوسۋدىڭ ماڭىزدىلىعى دا وسىندا. - دەيدى ساياساتتانۋشى, «اسپانداۋ» عىلىمي ءبىلىم بەرۋ قورى باتىس فيليالىنىڭ اتقارۋشى ديرەكتورى ەركىن ەرعاليەۆ.

اس كەزىندە قازاقستان جازۋشىلار وداعىنىڭ مۇشەسى, اقىن مۇنايدار بالمولدا تاۋەلسىزدىك كۇنىنە ارناعان «ازاماتتىڭ ارمانى» اتتى ولەڭىن وقىپ بەردى. ورال قالاسىندا بەلگىلى «اقبەرەن» جاس اقىندار مەكتەبىنىڭ ءبىر توپ شاكىرتى دە ەل مەن جەرگە ارنالعان پاتريوتتىق جىر شۋماقتارىن ورتاعا سالدى. بەلگىلى جىرشى, حالىقارالىق بايقاۋلاردىڭ جۇلدەگەرى فارحات ورازوۆ ءداستۇرلى اندەردى شىرقاشا, جاس دومبىراشىلار كۇي كۇمبىرىن اۋەلەتتى. جينالعاندار قازاقستاننىڭ تاۋەلسىزدىگى ماڭگى بولۋىنا دۇعا قىلعان اقساقالداردىڭ باتاسىن الىپ, تارقاستى.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان