زەرەندى اۋدانىندا ەنەرگيانىڭ تيىمدىلىگىن ارتتىرۋ ماسەلەسى تالقىلاندى

سەمينار-كەڭەس بارىسىندا وبلىستا ەنەرگەتيكا جانە تۇرعىن ءۇي-كوممۋنالدىق شارۋاشىلىعى سالاسىندا مەملەكەت باسشىسىنىڭ تاپسىرماسىن ورىنداۋ بويىنشا شارالار جۇرگىزىلىپ جاتقاندىعى اتاپ ايتىلدى.

– ەنەرگيا ۇنەمدەۋ مەن ەنەرگيانىڭ تيىمدىلىگىن ارتتىرۋ, تاريفتەردى ازايتۋ, كوممۋنالدىق بۋ قازاندىقتارىندا جاعىلاتىن وتىندى ۇنەمدەۋگە ۇمتىلۋدامىز. بيىل ەسىل قالاسى مەن شاڭتوبە كەنتىندە بۋ قازاندىقتارى ىسكە قوسىلدى. بۇل جوبالار جانە بىرقاتار ەنەرگيا, جىلۋ, سۋمەن قامتاماسىز ەتۋ جانە سۋ تاراتۋ نىساندارى «نۇرلى جول» باعدارلاماسى اياسىندا جۇزەگە اسىرىلدى. بيىل كوكشەتاۋ قالاسىنداعى جىلۋ ەلەكتر ورتالىعىن جوبالاۋ جانە ونىڭ قۇرىلىسى بويىنشا مەملەكەتتىك-جەكەمەنشىك سەرىكتەستىگى كەلىسىم-شارتىنا قول قويىلدى. «ەكسپو-2017» حالىقارالىق كورمەسىندە ۇسىنىلعان تەحنولوگيالاردىڭ جوبالارىن ەنگىزۋ شارالارى جۇزەگە اسىرىلۋدا. دەگەنمەن, ەنەرگەتيكا جانە تۇرعىن ءۇي-كوممۋنالدىق شارۋاشىلىعى سالاسىن جاڭعىرتۋداعى شارالار ءالى دە جەتكىلىكسىز,–دەدى وبلىس اكىمىنىڭ ورىنباسارى ۆاسيلي كرىلوۆ.

سەميناردا ءبىلىم وشاقتارى باسشىلارىن شارۋاشىلىق جۇمىسىنان بوساتۋ ماسەلەسى دە قاداپ ايتىلدى. مۇنداي تاجىريبە بارشىلىق. وبلىستىق ءبىلىم باسقارماسى باسشىسىنىڭ ورىنباسارى ۆالەري گامازوۆ ءبىلىم سالاسىنداعى بۋ قازاندىقتاردىڭ بۇگىنگى جاعدايى جونىندە حابارلاما جاسادى. وبلىستاعى قالا مەن اۋدانداردىڭ ءبىلىم بولىمىندە 555 مەكتەپ پەن 137 بالاباقشا جۇمىس ىستەيدى. ولاردىڭ 173-ءى ورتالىق جىلۋمەن, 519-ى اۆتونومدىق, ونىڭ ىشىندە 469 مەكتەپ پەن 50 بالاباقشا اۆتونومدىق جىلۋ جۇيەسىمەن قامتاماسىز ەتىلگەن. وتكەن جىلى تسەلينوگراد اۋدانىندا 11 قازاندىقتى سىرتقا شىعاردى. ءۇش مەكتەپتە بۋ قازاندىقتارى جاڭارتىلدى. «رۋحاني جاڭعىرۋ» باعدارلاماسى اياسىندا وتاۋتۇسكەن اۋىلىندا بلوك-مودۋلدىك بۋ قازاندىعى ورناتىلدى. بۇگىنگى تاڭدا «ورتالىق جىلۋ تاراتۋ كومپانياسى» سەرىكتەستىگىنىڭ سەنىمدى باسقارۋىنا زەرەندى, بۇلاندى, تسەلينوگراد جانە شورتاندى اۋداندارىنىڭ 193 الەۋمەتتىك نىسانى بەرىلدى. اتالمىش سەرىكتەستىكتىڭ سەنىمدى باسقارۋىنىڭ ارتىقشىلىعى ءۇردىستىڭ تسيفرلاندىرۋىندا بولىپ وتىر. كومپانيا بۋ قازاندىعى جۇمىسىنىڭ پارامەترلەرىن باقىلاۋ بويىنشا بىرىڭعاي ديسپەتچەرلىك بەكەت قۇرادى. بۋ قازاندىقتارىن باسقارۋ كەشەنى اۆتوماتتاندىرىلعان. تسەلينوگراد اۋدانى بويىنشا وتكەن جىلعى جىلۋ بەرۋ ماۋسىمىندا 3 مىڭ توننا كومىر ۇنەمدەلدى. ول جونىندە تسەلينوگراد اۋداندىق تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى مۇرات جاڭابەرگەنوۆ پەن «ورتالىق جىلۋ تاراتۋ كومپانياسى» سەرىكتەستىگىنىڭ ديرەكتورى مالىك جاۋكوۆ ايتىپ بەردى. بۇدان كەيىن سەمينار-كەڭەسكە قاتىسۋشىلار «STEV-4» cەرىكتەستىندە بولىپ, «Zeren boilers» اتتى ۇزاق جاناتىن قازاندىقتىڭ تۇساۋكەسەرىنە قاتىستى. سەرىكتەستىك ديرەكتورى اناتولي ستوليارەنكونىڭ ايتۋىنشا, بۇل قازاندىقدىڭ پايدالى اسەر كوەففيتسيەنتى جوعارى. سونداي-اق, مۇندا كەز-كەلگەن وتىن جاعىلادى. قازاندىقتىڭ وتىن جاعۋ جۇمىسى ءۇش دەڭگەيدە جۇرگىزىلەدى.

بايقال ءبايادىل,

«ەگەمەن قازاقستان»

اقمولا وبلىسى