تەمىرتاۋ قالاسىنداعى تۇڭعىش پرەزيدەنتتىڭ تاريxي-مادەني ورتالىعىنا جاڭا ەكسكليۋزيۆتى جادىگەر رەتىندە قازاقستان پرەزيدەنتى نۇرسۇلتان نازارباەۆتىڭ پايدالانۋىندا بولعان 2005-ءشى جىلعى S-كلاسستى «مەرسەدەس» اۆتوكولىگى قويىلدى.
قۇندى جادىگەردى كورسەتۋگە ارنالعان شارانىڭ ءبىرىنشى كۇنىندە جينالعان ادامنىڭ قاراسى مول بولدى. ولار ەكسكۋرسيا جۇرگىزۋشىلەرىنەن كولىكتىڭ سيپاتتاماسىن ەرەكشە قىزىعۋشىلىقپەن سۇراستىردى.
ەلباسىنىڭ قاۋىپسىزدىگىن ساقتاۋ ماقساتىندا ارنايى جاسالعان جايلى اۆتوكولىكتىڭ تەرەزەلەرىنە وق وتپەيتىن اينەكتەر ورناتىلعان جانە قاۋىپسىزدىك جۇيەسىمەن جابدىقتالعان. كولىكتىڭ سالماعى 5,5 توننا.
شاراعا پرەزيدەنتتىڭ سەرىكتەستەرى شاقىرىلدى. ولار اتالعان ەكسپوزيتسيا وبلىس تۇرعىندارى, اسىرەسە جاستار ءۇشىن ۇلكەن ماڭىزعا يە ەكەنىن اتاپ ءوتتى.
– جاستارعا ەلباسىنىڭ قىزمەتتىك كولىگىن, ونىڭ جەكە زاتتارىن تاماشالاۋ وتە قىزىقتى. سەبەبى پرەزيدەنتتىڭ ءومىرى وسكەلەڭ ۇرپاق ءۇشىن ۇلگى بولىپ تابىلادى, – دەپ اتاپ ءوتتى پرەزيدەنتتىڭ ۇزەڭگىلەس سەرىكتەسى ەرمەك تولەۋباەۆ.
قايرات ءابىلدا,
«ەگەمەن قازاقستان»
قاراعاندى