مەملەكەتتىمىزدىڭ مارتەبەلى مەرەكەسى – تاۋەلسىزدىك كۇنىن جەتىسۋ جۇرتى جاسامپاز كوڭىل-كۇيمەن قارسى الىپ, مەرەكەلەدى.
16 جەلتوقسان قارساڭىندا وبلىستا جاڭا نىساندار قولدانىسقا بەرىلىپ, تۇرعىندارعا باسپانا كىلتى تاپسىرىلدى. سونداي-اق, وسى كۇنى ەلىمىزدى دامىتۋعا قوسقان ۇلەسى ءۇشىن بىرقاتار ازاماتتار مەملەكەتتىك ماراپاتتارعا يە بولدى.
تالدىقورعان قالاسىنداعى وبلىستىق كوپ سالالى بالالار اۋرۋحاناسىنىڭ جانىنا اشىلعان نەوناتالدى حيرۋرگيا ورتالىعى جۇمىسىن باستادى. جاڭادان اشىلعان نەوناتالدى حيرۋرگيالىق ورتالىق 60 توسەككە شاقتالعان. رەانيماتسيالىق بولىمدە 9 توسەك قويىلعان. ورتالىق جاڭا وزىق ۇلگىدەگى قۇرالدارمەن جابدىقتالعان. اتاپ ايتقاندا, لاپاروسكوپيالىق باعان, بەينەكولونوسكوپ, فيبروگاستروسكوپ, برونحوسكوپ, ناركوزدىق اپپاراتتار, يۆل, جاڭا تۋعان نارەستەگە ارنالعان «جيراف» رەانيماتسيالىق ۇستەلى, فوتوتەراپيا اپپاراتتارى, كيۋۆەزدەر, رەانيماتسيالىق توسەك-ورىندارى بار.
سونداي-اق, مەرەكە قارساڭىندا وبلىس ورتالىعىنىڭ وڭتۇستىك-باتىس اۋدانىندا 64 پاتەرلى جالگەرلىك تۇرعىن ءۇي پايدالانۋعا بەرىلدى. كوپتەن كۇتكەن پاتەرلەردىڭ كىلتىن يەلەرىنە وبلىس اكىمى اماندىق باتالوۆ تاپسىردى. جاڭا باسپاناعا يە بولعاندار قاتارىندا مۇمكىندىگى شەكتەۋلى جاندار, جەتىم بالالار, كوپ بالالى, تولىق ەمەس وتباسىلار جانە باسقا دا باسپانا كەزەگىندە تۇرعان ادامدار بار.
- ەلباسى حالىقتى قولجەتىمدى باسپانامەن قامتۋعا ەرەكشە ءمان بەرىپ وتىر. وسىعان بايلانىستى «نۇرلى جەر», «7-20-25» جانە باسقا دا ءتيىمدى باعدارلامالار قابىلداندى. وبلىس بويىنشا بيىلعى جىلى 706 مىڭ شارشى مەتر تۇرعىن ءۇي, ال «نۇرلى جەر» باعدارلاماسى بويىنشا جالپى الاڭى 34,3 مىڭ گا بولاتىن 72 تۇرعىن ءۇي نەمەسە 468 پاتەر حالىق يگىلىگىنە بەرىلدى. سولاردىڭ ءبىرى - بۇگىن سىزدەرگە ۇسىنىلىپ وتىرعان ءۇي, - دەدى پاتەر يەلەرىنڭ قۋانىش بولىسكەن ايماق باسشىسى اماندىق باتالوۆ.
جالپى, تاۋەلسىزدىك كۇنىنە وراي الماتى وبلىسىنىڭ بىرنەشە اۋدانىندا تۇرعىندار قونىس تويىن تويلادى. ماسەلەن, قاپشاعاي قالاسىندا 50 پاتەرلى, الاكول اۋدانىنىڭ ءۇشارال قالاسىندا 60 پاتەرلى, كوكسۋ اۋدانىنىڭ بالپىق بي اۋىلىندا 20 پاتەرلى جالگەرلىك جانە نەسيەلىك تۇرعىن ۇيلەر ەسىك اشتى.
قالماحانبەت مۇقامەتقالي,
«ەگەمەن قازاقستان»
الماتى وبلىسى