تاۋەلسىزدىك مەرەكەسى قارساڭىندا, ياعني كەشە الاشتىڭ رۋحاني استاناسى – سەمەي قالاسىندا «رۋحاني جاڭعىرۋ» باعدارلاماسى اياسىندا «اباي الەمى» كىتاپ سەرياسىنىڭ تۇساۋكەسەر ءراسىمى ءوتتى. شاراعا وبلىس اكىمى دانيال احمەتوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت, جازۋشى الىبەك اسقاروۆ, عالىم عاريفوللا ەسىم جانە ءوڭىردىڭ زيالى قاۋىم وكىلدەرى قاتىستى.
ايماق باسشىسى د.احمەتوۆتىڭ باستاماسىمەن, جازۋشى مەدەۋ سارسەكەنىڭ رەداكتورلىعىمەن قولعا الىنعان جوبا شەڭبەرىندە اباي, شاكارىم, مۇحتار اۋەزوۆ, فەدور دوستوەۆسكي, تولەۋ كوبدىكوۆ, مارات قابانباەۆ, مەدەۋ سارسەكە, اناتولي يۆانوۆ, بوريس ششەرباكوۆ, جارقىن شاكارىم سىندى اۆتورلاردىڭ 16 كىتابى جارىق كورىپتى. «فەدور دوستوەۆسكي قازاق جازۋشىلارىنىڭ ىشىندە قايدان اداسىپ ءجۇر؟» دەپ وتىرعان بولارسىزدار بالكىم. اتالمىش سەريا اياسىندا شوقان ءۋاليحانوۆتىڭ دوسىنىڭ سەمەيگە قاتىستى جازبالارى ءبىر كىتاپ بولىپ باسىلىپتى. ورىس تىلىندە. «جوبا اياسىنداعى جارىق كورگەن ءماندى دۇنيەنىڭ ءبىرى – ايگىلى ءانشى امىرە قاشاۋباەۆ تۋرالى كىتاپ. ونەرتانۋشى جارقىن شاكارىم امىرە جايىندا بىرنەشە كىتاپ جازدى عوي. قازاق جانە ورىس تىلدەرىندە. سونىڭ ءبارى وسى ءبىر كىتاپقا توپتاستىرىلدى. ءباسپاسوز بەتتەرىندە جارىق كورگەن ماتەريالدار دا جيناقتالدى. ءبىر سوزبەن ايتقاندا, 400 بەتكە جۋىق دەرەكتى, مازمۇندى كىتاپ باسىلىپ شىقتى. كەلەسى جىلى بۇل سەريا اياسىندا تاعى دا 20 كىتاپ شىعارۋ جوسپاردا بار. سەريا جەتەكشىلەرىنە «ەندى جاستار شىعارماشىلىعىنا كوبىرەك كوڭىل بولسەك. وڭىردەگى جاس اقىنداردىڭ, جاس جازۋشىلاردىڭ, جاس ولكەتانۋشىلار, جۋرناليستەر مەن دراماتۋرگتەردىڭ ەڭبەكتەرىن جيناقتاپ شىعارساق» دەگەن ۇسىنىسىمدى ايتىپ جاتىرمىن. قالاي بولارىن ۋاقىت كورسەتەر», - دەيدى «اباي الەمى» كىتاپ سەرياسى رەداكتسيا القاسىنىڭ مۇشەسى.
اباي تەاترىندا وتكەن شارا بارىسىندا وبلىس اكىمى دانيال احمەتوۆ سەمەيلىك قالامگەر مەدەۋ سəرسەكەگە «پاراسات» وردەنىن سالتاناتتى تۇردە تابىس ەتتى.
ازامات قاسىم,
«ەگەمەن قازاقستان»
سەمەي