تۇركىستاندا تاۋەلسىزدىك كۇنىنە وراي جاس ماماندار باسپانالى بولدى

ەسكى يقان اۋىلدىق وكرۋگىندە 2 قاباتتى 10 پاتەرلى قىزمەتتىك تۇرعىن ءۇي, شاعا اۋىلدىق وكرۋگىنە قاراستى ىنتىماق اۋىلىندا دا 10 پاتەرلى 2 تۇرعىن ءۇيدىڭ كىلتى جاس ماماندارعا تابىس ەتىلدى.  ولار باسپاناعا بىلىكتى كادرلاردى اۋىلدارعا تارتۋ ماقساتىندا قولعا الىنعان باعدارلاما اياسىندا قول جەتكىزىپ وتىر. مەرەيلى مەرەكەدە باسپانالى بولعانداردىڭ ىشىندە مۇعالىمدەر مەن دارىگەرلەر, جانە قۇقىق قورعاۋ سالاسىنىڭ وكىلدەرى بار.

تۇركىستان وبلىسىنىڭ اكىمى جانسەيىت تۇيمەباەۆ جاس ماماندارعا پاتەر كىلتتەرىن تابىستاپ, قۇتتىقتادى. «مەملەكەت باسشىسىنىڭ حالىقتى باسپانامەن, جۇمىسپەن قامتۋعا ارنالعان باعدارلامالارىنىڭ ناتيجەسىندە قانشاما وتباسى باسپانالى بولىپ, جۇمىسقا ورنالاسۋدا. بۇگىن مىنە تاۋەلسىزدىگىمىزدىڭ 27 جىلدىعى قارساڭىندا كەنتاۋ قالاسىنا قاراستى ەسكى يقان مەن ىنتىماق اۋىلىندا جاس ماماندارىمىزعا 30 پاتەر بەرىلىپ جاتىر. ەندەشە ەڭبەكتەرىڭىزگە بەرەكە, جاڭا باسپانالارىڭىزعا قۇت دارىسىن», - دەدى جانسەيىت قانسەيىت ۇلى.

ايتا كەتەلىك, اۋىلدارعا قاجەتتى مامانداردى كوپتەپ تارتۋ ءۇشىن قابىلدانعان باعدارلاما بويىنشا وبلىستا 330 پاتەرلى 33 ءۇيدىڭ قۇرىلىسى باستالعان بولاتىن. تاۋەلسىزدىك مەرەكەسىنە وراي سولاردىڭ العاشقىلارى پايدالانۋعا بەرىلىپ وتىر.

ال ارىس قالاسىنىڭ «كوكتەم-2» تۇرعىن اۋدانىندا 36 پاتەرلىك ءۇش بىردەي كوپقاباتتى ءۇي باسپانا كەزەگىندە تۇرعان ازاماتتارعا بەرىلدى. سالتاناتتى شارادا وبلىس اكىمىنىڭ ورىنباسارى ت.سارسەمباەۆ تۇرعىنداردى مەرەكەمەن قۇتتىقتاپ, 108 پاتەردىڭ كىلتىن قۋانىش يەلەرىنە تابىس ەتتى. سونداي-اق, مەرەكەگە وراي اتالعان مولتەك اۋداننىڭ ماڭىندا جاڭا سپورت الاڭشاسى ەل يگىلىگىنە بەرىلدى. سمەتالىق قۇنى 60 ملن. تەڭگە بولاتىن الاڭشانىڭ قۇرىلىس جۇمىستارىن «سامۇرىق – قازىنا ترانس» اق-نىڭ تاپسىرىسىمەن مەردىگەر «ماستەر – قازستروي» جشس جۇرگىزگەن. جالپى ارىس قالاسىندا مەرەكەگە وراي 16 نىسان ەل يگىلىگىنە بەرىلدى.

عالىمجان ەلشىباي,

«ەگەمەن قازاقستان»

تۇركىستان وبلىسى