ورال قالاسى تۇرعىندارى بيىلعى تاۋەلسىزدىك مەرەكەسىن ۇلكەن قۋانىشپەن قارسى الدى. مەرەكە قارساڭىندا 900 ورىندىق جاڭا مەكتەپ پەن 180 پاتەرلىك ءۇي قۇرىلىسى اياقتالىپ, جاڭا يەلەرىن تاپتى.
سىرتقى كورىنىسى دە اشىق بوياۋلى, ادامعا قۋانىش سىيلايتىن 9 قاباتتى تۇرعىن ءۇي «نۇرلى جەر» باعدارلاماسى اياسىندا سالىنىپ, شاھارداعى باسپانا كەزەگىندە تۇرعان وتباسىلارعا – كوپ بالالى, جالعىزباستى, از قامتىلعان ت.ب. سياقتى 13 كاتەگوريا يەلەرىنە بەرىلدى. بۇل – ورال قالاسىنىڭ مۇرات موڭكە ۇلى كوشەسى بويىندا وسى جەلتوقسان ايىنىڭ ىشىندە تاپسىرىلعان ەكىنشى توعىزقاباتتى ءۇي.
- ەستەرىڭىزدە بولار, وسىدان 6-7 جىل بۇرىن ءدال وسى ارا – ماڭ دالا ەدى عوي. بۇگىندە بۇل جەرگە كىشىگىرىم قالا ورناعان: 50-دەن اسا كوپقاباتتى ءۇي, ەمحانا, ەكى مەكتەپ, بالاباقشا, سپورت كەشەنى بار. وسىنىڭ ءبارىن مەملەكەت سىزدەر ءۇشىن جاساپ وتىر. قازاقستانمەن بىرگە قالامىز ءوسىپ, وبلىسىمىز وركەندەپ كەلەدى. جاستار ءبىلىم الىپ, جۇمىسقا ورنالاسىپ, كاسىپكەرلەر ءوندىرىسىن دامىتىپ, بارلىعىنا جاعداي جاسالىپ جاتىر. تۇرعىنۇي كەزەگىندە تۇرعان وزگە دە قالا تۇرعىندارىنا دا ءۇي بەرىلەدى. بىزدە مەملەكەت مىندەتىنە العان, ەلباسى ايتقان جوبا-جوسپاردىڭ بارلىعى دا جۇزەگە اسادى. سىزدەرگە ەلباسىنىڭ اتىنان جاڭا پاتەردىڭ كىلتىن ۇسىنا وتىرىپ, تاۋەلسىزدىك مەرەكەسىمەن شىن جۇرەكتەن قۇتتىقتايمىن, - دەدى ءوز سوزىندە باتىس قازاقستان وبلىسىنىڭ اكىمى التاي كولگىنوۆ پاتەر كىلتىن جاڭا يەلەرىنە سالتاناتتى جاعدايدا تاپسىرىپ تۇرىپ.
جالپى, باتىس قازاقستان وبلىسىندا سوڭعى جىلدارى تۇرعىن ءۇي قۇرىلىسى جاندانىپ كەلەدى. بيىل «نۇرلى جەر» باعدارلاماسى اياسىندا اق جايىق وڭىرە 17,2 ملرد تەڭگە قارجى بولىنگەن.
- بيىل وبلىس ورتالىعىندا 26 كوپقاباتتى تۇرعىن ءۇيدىڭ, اۋدانداردا 103 ءۇيدىڭ قۇرىلىسى جۇرۋدە. بۇل دەگەن مىڭداعان ادام باسپاناعا قول جەتكىزەدى دەگەن ءسوز. جىل سوڭىنا دەيىن تاعى ەكى ءۇيدىڭ – قۇرمانعازى جانە گاگارين كوشەسىندە اپات جاعدايىنا بايلانىستى قيراتىلعان ءۇيدىڭ ورنىنا كوتەرىلگەن جاڭا ۇيلەردىڭ قۇرىلىسى اياقتالادى, - دەيدى باتىس قازاقستان وبلىستىق قۇرىلىس باسقارماسىنىڭ باسشىسى التىنبەك قايساعاليەۆ.
ال «سارىتاۋ» شاعىناۋدانىندا «نۇرلى جول» باعدارلاماسى اياسىندا تاپسىرىلعان 900 ورىندىق №50 جاڭا مەكتەپ عيماراتىنىڭ اشىلۋىن تۇرعىندار كوپتەن كۇتكەن ەدى. ويتكەنى وسى اۋداندا ورنالاسقان №10 جانە №47 مەكتەپتەردە وقۋشى تىم كوبەيىپ, ءۇش اۋىسىمدا وقۋعا ءماجبۇر بولعان. ال ەلباسى بيىلعى جولداۋىندا ءبىلىم بەرۋ سالاسىنا دا ەرەكشە ەكپىن بەرىپ, ءۇش اۋىسىمدىق مەكتەپتەردى ازايتۋدى جۇكتەگەن ەدى.
- سارىتاۋ شاعىناۋدانىندا 900 ورىندىق №50 مەكتەپ اشىلعاندا بۇعان دەيىن ءۇش كەزەكتە وقىپ كەلگەن №47 جانە №10 مەكتەپتەر ەداۋىر جەڭىلدەيتىن بولادى. ەندى ولاردا ءۇش اۋىسىم بولمايدى. جاڭا مەكتەپتە ەكى اۋىسىمدا 1900 وقۋشى وقيتىن بولادى. ءبىز ەندى اپاتتىق جاعدايداعى مەكتەپتەرگە كوڭىل بولەمىز. ءبىلىم جانە عىلىم مينيسترلىگىمەن كەلىسىپ, كەلىسىم الدىق, بيۋدجەتىن بەكىتتىك, كوكتەم شىعا اقجايىق اۋدانىنىڭ ورتالىعىندا 300 ورىندىق مەكتەپ عيماراتى ينتەرناتىمەن, ال, قازتالوۆتا الما ورازباەۆا اتىنداعى مەكتەپتىڭ ورنىنا 600 ورىندىق مەكتەپ سالىنادى. ءدال وسى اۋداندا №51 مەكتەپتىڭ قۇرىلىسىن باستايمىز, - دەدى ءوڭىر باسشىسى التاي كولگىنوۆ.
مەكتەپ كەشەنى توعىز بلوكتان تۇرادى. مۇندا 12 وقۋ سىنىبى, 9 امبەباپ بولمە, ەكى سپورت زال, 294 ورىندىق ءماجىلىس زالى, 156 ورىنعا ارنالعان اسحانا, ەڭبەك ساباقتارىنا ارنالعان بىرنەشە شەبەرحانا بار. التى مۋلتيمەديالىق, ءتورت ينفورماتيكا كابينەتى جۇمىس ىستەيدى. گەوگرافيا, بيولوگيا كابينەتتەرى زەرتحانالارىمەن جابدىقتالعان.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان