تۇركىستان وبلىسىندا ساياباق, مەديتسينالىق ورتالىق جانە جاستار سارايى اشىلدى

ساياباقتىڭ اشىلۋ سالتاناتىندا وبلىس اكىمى جانسەيىت تۇيمەباەۆ تۇركىستاننىڭ وبلىس ورتالىعى رەتىندە كۇننەن كۇنگە كوركەيىپ, اباتتانىپ كەلە جاتقانىن اتاپ ءوتتى. ساياباق ارحيتەكتۋرالىق قۇرىلىسى جاعىنان سوڭعى ۇلگىدە جاساقتالعان. وندا دەمالۋشىلارعا قولايلى جاعداي تۋعىزاتىن جارىق باعانالارى مەن اركالار, سمارت ورىندىقتار, سۋبۇرقاقتار مەن ترەناجەرلىك اسپاپتار, تەننيس, فۋتبول, باسكەتبول الاڭشالارى مەن ۆەلوجولدار جانە كونتسەرت الاڭى ورناتىلعان.

سونداي-اق تاۋەلسىزدىك كۇنى ورداباسى اۋدانى تۇرعىندارى ءۇشىن الەۋمەتتىك نىسانداردىڭ اشىلۋىمەن ەستە قالماق. ولاي دەيتىنىمىز, ورداباسى اۋدانىنىڭ شۇبارسۋ اۋىلىندا «MEDICAL CENTER SHUBARSU» مەديتسينا ورتالىعى اشىلدى.  جالپى سانى 115 ستانتسيونارلىق توسەك ورنى بار مەديتسينا ورتالىعىندا تەراپيا, بالالار ءبولىمى, حيرۋرگيا جانە جاراقات ءبولىمى, فيزوتەراپيا جانە وڭالتۋ ءبولىمى, كۇندىزگى ءبولىم, ستاتسيونار, زەرتحانا جانە دياگنوستيكا ءبولىمى, جەدەل جاردەم ستانساسى قىزمەت كورسەتەدى. اقش, وڭتىستىك كورەيا, ۆەنگريا, ياپونيا, گەرمانيا سىندى شەتەلدىك جانە وتاندىق زامانۋي مەديتسينالىق قۇرالدارمەن جابدىقتالعان نىساندا 145 ادام جۇمىسپەن قامتىلعان. سونىمەن قاتار بۇل كۇنى اۋدان ورتالىعى - تەمىرلاندا «جاستار سارايى» اشىلدى. بۇگىندە 20 شاقتى جاس ماماندى جۇمىسپەن قامتىعان عيماراتتا اۋدان جاستارى ءتۇرلى ۇيىرمەلەرگە قاتىسىپ, بوس ۋاقىتىن ءتيىمدى پايدالاناتىن بولادى. "بارشاڭىزعا بەلگىلى, كەلەر 2019 جىلدى ەلباسى "جاستار جىلى" دەپ جاريالادى. ياعني, كەلەشەگى كەمەل جاستارىمىزعا مەملەكەت تاراپىنان بارلىق جاعداي جاسالۋدا. بۇگىنگى ورتالىق وزدەرىڭىزگە امانات. تاۋەلسىز ەلىمىزدىڭ ماڭگىلىك ەل بولۋعا ۇمتىلعان ءۇمىتىن جالعايتىن, سول ارمانعا جەتكىزەتىن دە وزدەرىڭىز. ماقسات-مۇراتتارىمىزدىڭ جۇزەگە اسۋىندا بۇگىنگى جاستار سارايىنىڭ سىزدەرگە تيگىزەر پايداسى مول دەپ بىلەم", - دەدى ج.تۇيمەباەۆ اشىلۋ سالتاناتىندا جاستارعا ارناعان سوزىندە. 

عالىمجان ەلشىباي,

«ەگەمەن قازاقستان»

تۇركىستان وبلىسى