مەملەكەت باسشىسى جيىنعا قاتىسۋشىلاردى جانە بارشا قازاقستان حالقىن ۇلتتىق مەرەكەمىز – تاۋەلسىزدىك كۇنىمەن قۇتتىقتادى, دەپ حابارلايدى اقوردانىڭ ءباسپاسوز قىزمەتى.
قازاقستان پرەزيدەنتى تاۋەلسىزدىكتىڭ 27 جىلى ىشىندە مەملەكەتىمىز وزىنىڭ دامۋ جولىندا زور جەتىستىكتەرگە جەتكەنىن اتاپ ءوتتى.
ەلباسى ەگەمەن ەلىمىزدىڭ قۇرىلۋ تاريحىندا قازاقستاننىڭ جاس استاناسىنىڭ ماڭىزدى ءرول اتقارعانىنا ايرىقشا توقتالدى.
– ەۋرازيانىڭ جۇرەگىندە ورنالاسقان جاڭا ەلوردا جاڭعىرعان قازاقستاننىڭ سيمۆولى سانالادى. بيىل استانامىزدىڭ 20 جىلدىعىن ەلىمىزدىڭ بارلىق وڭىرىمەن بىرگە جوعارى دەڭگەيدە اتاپ وتتىك, – دەدى نۇرسۇلتان نازارباەۆ.
مەملەكەت باسشىسى قازاقستاندا جۇرگىزىلگەن اۋقىمدى نارىقتىق رەفورمالار ميلليوننان استام ازاماتتارىمىزدىڭ كاسىپكەرلىك قابىلەتتەرىن ەكونوميكاعا جۇمىلدىرۋعا جول اشقانىن ايتتى.
– ەكونوميكانى جۇيەلى يندۋستريالاندىرۋ وڭدەۋ ونەركاسىبىنىڭ ۇلەسىن ايتارلىقتاي ارتتىرۋعا سەپتىگىن تيگىزدى. بۇگىندە مۇنداعى ءونىم كولەمى شامامەن 9,5 تريلليون تەڭگەنى قۇراپ وتىر, – دەدى قازاقستان پرەزيدەنتى.
سونداي-اق, ەلباسى كولىك-لوگيستيكا ينفراقۇرىلىمىنا تارتىلعان ينۆەستيتسيانىڭ ارقاسىندا قازاقستان قۇرلىقتىق ماڭىزى بار ترانزيتتىك حابقا اينالعانىن اتاپ ءوتتى.
سونىمەن قاتار, نۇرسۇلتان نازارباەۆ تاۋەلسىزدىك جىلدارى تابىسى ەڭ تومەنگى كۇنكورىس دەڭگەيىنەن تومەن تۇرعىندار سانى 15 ەسە ازايىپ, ال ناقتى ەڭبەكاقى 4 ەسە ارتقانىن ايتتى.
– ەگەمەن قازاقستاننىڭ باستى جەتىستىكتەرىنىڭ ءبىرى – حالقىمىزدىڭ سانى 18 ميلليوننان اسىپ, تۇرعىنداردىڭ ورتاشا ءومىر ءسۇرۋ ۇزاقتىعى 72,5 جاسقا جەتۋى. وسى ماڭىزدى جەڭىستەرىمىز بەن يگى ناتيجەلەرىمىز ءبىز تاڭداعان باعىتتىڭ دۇرىس ەكەنىن راستاپ وتىر, – دەدى مەملەكەت باسشىسى.
قازاقستان پرەزيدەنتى 2018 جىلى ەلىمىزدىڭ سىرتقى ساياساتتا دا, جاڭعىرۋ باعدارلامالارىن ىسكە اسىرۋ اياسىندا دا قول جەتكىزگەن باستى جەتىستىكتەرىنە توقتالدى.
– ءبىزدىڭ جاۋاپتى ءارى سىندارلى سىرتقى ساياساتىمىز الەمدىك ارەناداعى ءوز ورنىمىزدى ايتارلىقتاي نىقتاي تۇسۋگە مۇمكىندىك بەردى. قازاقستاننىڭ جەمىستى بىتىمگەرلىك قىزمەتى استاناداعى سيرياارالىق كەلىسسوزدەردىڭ ناتيجەلى بولۋىنا سەپتىگىن تيگىزدى, – دەدى ەلباسى.
سونداي-اق, نۇرسۇلتان نازارباەۆ «استانا» حالىقارالىق قارجى ورتالىعىن, «استانا حاب» ءىت-ستارتاپتاردىڭ حالىقارالىق تەحنوپاركىن جانە «جاسىل» تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعىن ىسكە قوسۋ جونىندەگى جۇمىستاردىڭ ناتيجەلەرىنە نازار اۋداردى.
– قوعامداعى بىرلىك پەن كەلىسىم ءبىزدىڭ بارلىق جەتىستىگىمىزدىڭ باستاۋىندا تۇرعانىن ءاردايىم ەستە ۇستاۋىمىز كەرەك. ەتنوسارالىق جانە كونفەسسياارالىق دامۋدىڭ قازاقستاندىق مودەلى بۇگىندە حالىقارالىق برەندكە اينالدى, – دەدى مەملەكەت باسشىسى.
قازاقستان پرەزيدەنتى ەلىمىزدەگى كەيىنگى باستامالاردىڭ بارى تۇرعىندارىمىزدىڭ تۇرمىس ساپاسىن جاقسارتۋعا, قوعامدىق قاۋىپسىزدىكتى جوعارى دەڭگەيدە قامتاماسىز ەتۋگە جانە ءال-اۋقاتىمىزدى ارتتىرۋعا باعىتتالعانىن اتاپ ءوتتى.
– الەۋمەتتىك سالانى كەشەندى جاڭعىرتۋ – ءبىزدىڭ ماڭىزدى باعىتىمىز. تاۋەلسىزدىك جىلدارى ميلليونعا جۋىق ازاماتىمىز باسپانالى بولدى. ءبىز جۋىرداعى 5 جىل ىشىندە 70 ميلليون شارشى مەتردەن استام تۇرعىن ءۇي سالامىز. بۇل شامامەن تاعى ەكى ميلليونعا جۋىق قازاقستاندىق باسپانالى بولادى دەگەن ءسوز, – دەدى ەلباسى.
سوڭىندا نۇرسۇلتان نازارباەۆ تاۋەلسىز ەل تۇرعىندارىنىڭ قازىرگى بۋىنى ۋاقىت تالابىنا ساي بولىپ, قازاقستانداعى ءاربىر وتباسىنىڭ يگىلىگى مەن بەرەكەسىن نىعايتۋعا ۇلەس قوساتىنىنا سەنىم ءبىلدىردى.