اتىراۋدا جاڭا مامانداندىرىلعان حقكو اشىلدى

مامانداندىرىلعان حقكو اشىلۋ سالتاناتىنا اتىراۋ وبلىسىنىڭ اكىمى نۇرلان نوعاەۆ قاتىستى. 

- بۇگىندە ايماقتاعى بارلىق سالادا تسيفرلاندىرۋ مەملەكەتتىك باعدارلاماسى قارقىندى تۇردە جۇزەگە اسۋدا.  ەندى اۆتوكولىك يەلەرىنە مەملەكەتتىك قىزمەت تسيفرلى ۇلگىدە كورسەتىلەدى,  بۇل ءۇردىس  قىزمەت كورسەتۋ ساپاسى مەن جىلدامدىعىنا وڭ ىقپال ەتەرى انىق, - دەدى  نۇرلان نوعاەۆ نىساننىڭ اشىلۋ سالتاناتىندا.

ايتا كەتەيىك,  مامانداندىرىلعان حقكو-نىڭ قايتادان اشىلعان عيماراتىنىڭ ارقاسىندا اتىراۋلىقتار اۆتوكولىكتەرىن تەز ارادا تىركەپ,  جۇرگىزۋشى كۋالىگى مەن مەملەكەتتىك ءنومىر بەلگىلەرىن الا الادى. جاڭا نىساندا جۇرگىزۋشى كۋالىگىن الۋعا تەوريالىق تەست پەن پراكتيكالىق سىناقتاردى تاپسىرۋعا بولادى. 

اتىراۋ وبلىسىنىڭ اكىمى مامانداندىرىلعان ورتالىقتىڭ جاڭا عيماراتىمەن تانىسىپ, مەكەمە قىزمەتكەرلەرىمەن اڭگىمەلەستى. ورتالىقتا 32 قىزمەتكەر حالىققا قىزمەت كورسەتەدى.  

- مامانداندىرىلعان حقكو سىيىمدىلىعى 800 ادامعا ەسەپتەلگەن,  جەڭىل اۆتوكولىكتەرگە ارنالعان 200 ورىندىق ,  جۇك كولىكتەرىنە 20 ورىندىق اۆتوتۇراق  قاراستىرىلعان, -دەيدى  «ازاماتتارعا ارنالعان ۇكىمەت» مەملەكەتتىك كورپوراتسياسى كوممەرتسيالىق ەمەس اكتسيونەرلىك قوعامى اتىراۋ وبلىستىق بولىمشەسىنىڭ باسشىسى  مۇسا حايرولليەۆ.

جاڭا نىسان اتىراۋ-استراحان تاس جولى بويىندا 4 گا اۋماقتى الىپ جاتىر. ورتالىقتى ىسكە قوسۋ ارقىلى نۇرسايا ىقشام اۋدانىنداعى پوليتسيا ءبولىمىنىڭ جۇمىسى جەڭىلدەيدى,  اتالعان پوليتسيا بولىمشەسىنىڭ الدىنداعى جولدا كولىكتەردىڭ كوپتىگىنەن ۇنەمى كەپتەلىس بولاتىن.

قىزمەت تۇرلەرىن حقكو وپەراتورلارى مەن اكىمشىلىك پوليتسيا قىزمەتكەرلەرى كورسەتەدى, ولاردىڭ مىندەتتەرى ناقتى بولىنەدى. ورتالىق وپەراتورلارى قاجەتتى قۇجاتتاردى قابىلدايدى, ال

اكىمشىلىك پوليتسيا قىزمەتكەرلەرى جۇرگىزۋشى كۋالىگىن جانە تەحنيكالىق كۋالىكتەردى دايىندايدى. وسىلايشا, ازاماتتار مەن  قۇجاتتار دايىنداۋعا جاۋاپتى قىزمەتكەر اراسىندا تىكەلەي بايلانىس جويىلادى