بۇگىن قازاقستانداعى ۇلتتىق دوپينگكە قارسى كۇرەس ورتالىعىنىڭ سايتىندا رۇقسات ەتىلمەگەن-ءدارى دارمەكتى پايدالانعان سپورتشىلاردىڭ جاڭارتىلعان ءتىزىمى جاريالاندى.
باسى داۋعا ىلىككەندەر قاتارى تاعى ءتورت جەرلەسمىزبەن تولىقتى. ولار – ەرنۇر قاباتاەۆ (ەركىن كۇرەس), ماحامبەت راحمەت (دزيۋدو), نۇرجان گابباسوۆ (سامبو) جانە ولەگ گريداسوۆ (پارا-پاۋەرليفتينگ).
وسى سپورتشىلارعا جەكە-جەكە توقتالاتىن بولساق, ەرنۇر قاباتاەۆتىڭ كادەتتەر اراسىندا ازي چەمپيونى (2011), جاستار اراسىنداعى قازاقستان چەمپيونى (2013), جاستار اراسىنداعى الەم بىرىنشىلىگىنىڭ كۇمىس جۇلدەگەرى (2013), جاستار اراسىنداعى ازيا بىرىنشىلىگىنىڭ قولا جۇلدەگەرى (2015), ەرەسەكتەر اراسىنداعى قازاقستان چەمپيوناتىنىڭ ءۇش دۇركىن جۇلدەگەرى (2015-2017) دەگەن دارداي اتاقتارى بار. ول وسىعان دەيىن دە دوپينگ قولدانعانى ءۇشىن ءبىر جىلعا سپورتتان شەتتەتەلىگەن ەدى. ەرنۇردىڭ ەندىگى شەتتەتىلۋ مەرزىمى باقانداي ءتورت جىلدى قۇراپ وتىر.
سامبوشى نۇرجان گابباسوۆ ءتورت جىلعا جانە دزيۋدوشى ماحامبەت راحمەت ەكى جىلدىق جازالاۋ مەرزىمىنەن وتەتەتىن بولادى. بارىنەن پارا-پاۋەرليفتينگ شەبەرى ولەگ گريداسوۆتىڭ جازاسى اۋىر بولدى. ول سەگىز جىلعا ۇلكەن سپورتتان الىستاتىلدى.
عالىم سۇلەيمەن,
«ەگەمەن قازاقستان»