مەملەكەت باسشىسى نۇرسۇلتان نازارباەۆتىڭ اتىنا ۇلتتىق مەرەكەمىز – قازاقستان رەسپۋبليكاسىنىڭ تاۋەلسىزدىك كۇنىنە وراي حاتتار مەن جەدەلحاتتار كەلىپ ءتۇستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەردىڭ باسشىلارىنان قۇتتىقتاۋ جەدەلحاتتارى مەن حاتتار كەلىپ ءتۇستى.
امەريكا قۇراما شتاتتارىنىڭ پرەزيدەنتى جەكە ءوزىنىڭ جانە بارشا امەريكا حالقىنىڭ اتىنان قازاقستان حالقىن تاۋەلسىزدىكتىڭ 27 جىلدىعىمەن قۇتتىقتادى.
«اقش قازاقستاننىڭ تاۋەلسىزدىگىن 1991 جىلى العاش رەت مويىنداعان ۋاقىتتان بەرى ەلدەرىمىز ۇنەمى ەكىجاقتى بايلانىستاردى نىعايتۋ جولىندا جۇمىس جۇرگىزىپ كەلەدى. ءسىزدىڭ بيىلعى قاڭتارداعى ۆاشينگتونعا ساپارىڭىز وسى جىلدار ىشىندە ەلدەرىمىز اراسىندا قالىپتاسقان قارىم-قاتىناستارىمىزدى ىلگەرىلەتۋگە جانە نىعايتۋعا تىڭ سەرپىن بەردى», – دەلىنگەن جەدەلحاتتا.
دونالد ترامپ نۇرسۇلتان نازارباەۆتىڭ باسشىلىق ەتۋىمەن قازاقستاننىڭ يادرولىق قارۋدى تاراتپاۋ ءىسىنىڭ كوشباسشىسىنا جانە بەيبىت ءومىردىڭ جاقتاۋشىسىنا اينالعانىن اتاپ وتكەن.
«مەن بەرىك ىنتىماقتاس- تىعىمىز الداعى ۋاقىتتا دا جالعاسا بەرەدى دەپ ويلايمىن. سىزگە جانە قازاقستان حالقىنا كەلە جاتقان جاڭا جىلدا تابىس پەن باق-بەرەكە تىلەيمىن!», – دەلىنگەن اقش پرەزيدەنتىنىڭ قۇتتىقتاۋ حاتىندا.
ۇلىبريتانيا پاتشايىمى ءىى ەليزاۆەتا نۇرسۇلتان نازارباەۆتى جانە قازاقستان حالقىن الداعى تاۋەلسىزدىك كۇنىمەن قۇتتىقتاپ, باق-بەرەكە جانە تابىس تىلەدى.
«ۇلتتىق مەرەكەلەرىڭىزگە وراي كەلە جاتقان جىلى قازاقستان حالقىنا اماندىق پەن باقىت تىلەي وتىرىپ, زور ءىلتيپاتىمدى جەتكىزگىم كەلەدى», – دەلىنگەن جەدەلحاتتا.
ساۋد ارابياسىنىڭ كورولى سالمان بەن ابدەل ءازيز ءال ساۋد جانە ساۋد ارابياسى كورولدىگىنىڭ تاق مۇراگەرى مۇحاممەد بەن سالمان بەن ابدەل ءازيز ءال ساۋد بارشا قازاقستان حالقىنىڭ ءوسىپ-وركەندەي بەرۋىنە تىلەكتەستىك ءبىلدىرىپ, بارلىق سالاداعى ەكىجاقتى ىنتىماقتاستىقتى ودان ءارى نىعايتۋعا نيەتتى ەكەنىن جەتكىزگەن.
ريم پاپاسى فرانتسيسك نۇرسۇلتان نازارباەۆتى تاۋەلسىزدىك كۇنىمەن قۇتتىقتاپ, بۇكىل قازاقستان حالقىنا بەيبىت ءومىر مەن باق-بەرەكە تىلەگەن جىلى لەبىزىن جولداعان.
ماروككو كورولى IV مۇحاممەد ءوز جەدەلحاتىندا قازاقستان مەن ماروككو اراسىنداعى قارىم-قاتىناستارعا جوعارى باعا بەرىپ, ەكى مەملەكەت حالىقتارىنىڭ يگىلىگى ءۇشىن ىنتىماقتاستىقتى نىعايتۋعا باعىتتالعان جۇمىستاردى جالعاستىرۋعا نيەتتى ەكەنىن ءبىلدىردى.
سونداي-اق كۋبا رەسپۋبليكاسى مەملەكەتتىك كەڭەسىنىڭ جانە مينيسترلەر كەڭەسىنىڭ توراعاسى ميگەل دياس-كانەل نۇرسۇلتان نازارباەۆتى جانە قازاقستان حالقىن تاۋەلسىزدىك قۇنىمەن قۇتتىقتاپ, باق-بەرەكە تىلەگەن جەدەلحاتىن جولدادى.
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوزىنىڭ حاتىندا: «قازاقستان تاۋەلسىزدىك جىلدارىندا مەملەكەتتىلىكتى نىعايتۋ, حالىقتىڭ ءال-اۋقاتىن جانە ەلدىڭ حالىقارالىق ارەناداعى بەدەلىن ارتتىرۋ جولىندا زور جەتىستىكتەرگە قول جەتكىزدى. تۇرىكمەنستان مەن قازاقستاننىڭ ەكىجاقتى قاتىناستارى جوعارى دەڭگەيدە ەكەنى قۋانتادى. بۇل ەلدەرىمىز اراسىنداعى تابىستى ىنتىماقتاستىق پەن ءوزارا تىعىز بايلانىستىڭ ءتۇرلى باعىتتا دامىپ كەلە جاتقانىن كورسەتەدى», – دەپ اتاپ وتكەن.