21 جەلتوقساندا «الماتى ارەنا» سپورت كەشەنىندە ەرەجەسىز جەكپە-جەكتەن «Titan FC 51» دەپ اتالاتىن حالىقارالىق ءتۋرنيرى وتەدى. ايتۋلى جارىستا قازاقستان, برازيليا, قىتاي, اقش, كانادا جانە تاعى باسقا ەلدەردىڭ كەلگەن مىقتى سپورتشىلارى كۇش سىناسادى.
الماتى قالاسى اكىمدىگىنىڭ قولداۋىمەن وتەتىن الەمدىك دودانىڭ ۇيىمداستىرۋشىلارى ارالاس جەكپە-جەكتەن حالىقارالىق «Titan FC» ۇيىمى مەن «Alemfighters» كلۋبى بولىپ تابىلادى. تۋرنير فايتكاردىنا ەكى تيتۋلدى جەكپە-جەك كىرىپ وتىر. اتاپ ايتساق, 57 كيلو سالماقتاعى چەمپيوندىق بەلبەۋدى كولۋمبيالىق حۋان پۋەرتا (15-6) مەن قازاقستاندىق سپورتشى قازىبەك ءاشىموۆ (13-3) ساراپقا سالادى. ال بۇل كەشتىڭ باستى جەكپە-جەگىندە بەيبىت نازاروۆ (14-3) پەن امەريكالىق مارتين براۋن (12-5) ايقاسادى. ولار جەڭىل سالماقتا (70,3 كگ) ۋاقىتشا چەمپيوندىق بەلبەۋ ءۇشىن تالسادى.
الماتىدا وتەتىن جارىس بارىسىندا 15 جەكپە-جەك وتكىزۋدى كوزدەپ وتىرمىز. رەيتينگتىك باسەكەلەردە نەگىزىنەن «Alemfighters» كلۋبىنىڭ جاۋىنگەرلەرى جۇدىرىقتاسادى. وزدەرىن جاقسى قىرىنان كورسەتكەن جىگىتتەر «Titan FC» ليگاسىنا قابىلدانادى. سول ليگادا ءجۇرىپ كوزگە تۇسكەن سپورتشىلاردىڭ 70 پايىزى UFC-دە باق سىناپ جۇرگەنى بارشاعا ءمالىم. ولاي بولسا, ءبىزدىڭ ورەندەر ءۇشىن دە الەمنىڭ ەڭ بەلدى ۇيىمىندا ونەر كورسەتۋگە تاماشا مۇمكىندىك تۋىنداپ وتىر, – دەيدى «Alemfighters» كلۋبىنىڭ باسشىسى ارداق نازاروۆ.
عالىم سۇلەيمەن,
«ەگەمەن قازاقستان».
الماتى