پەتروپاۆلدا جەلتوقسان كوتەرىلىسىنىڭ قۇربانى, جەرلەسىمىز نۇرجان قالياسقاروۆتى ەسكە الۋعا ارنالعان ءداستۇرلى ۆولەيبول ءتۋرنيرى ءوتتى.
1996 جىلدان بەرى جۇيەلى تۇردە ۇيىمداستىرىلىپ كەلە جاتقان جارىسقا العاشقى جىلدارى ءتورت كوماندا عانا قاتىسسا, وسى جىولىوبلىس اۋداندارىنان جانە استانا قالاسىنان 13 كوماندا جينالدى.
نۇرجان قالياسقاروۆ الماتى ساۋلەت-قۇرىلىس ينستيتۋتى قۇرىلىس فاكۋلتەتىنىڭ ءبىرىنشى كۋرسىندا وقىپ جۇرگەندە الاڭعا شىعىپ, اكىمشىل-ءامىرشىل جۇيەگە قارسى نارازىلىعىن بىلدىرگەنى ءۇشىن ۇستالىپ, قامالعان بولاتىن. اۋىر سوققىعا جىعىلعان. وقۋدان قۋىلىپ, كەيىن كومسومولدان شىعارىلعان. ۋاقىت وتە كەلە العان جاراقاتى اسقىنىپ, قايتىس بولعان.
جارىس تاۋەلسىزدىك مەرەكەسىنە ارنالىپ, دەنە شىنىقتىرۋ جانە سپورت باسقارماسى, “نۇرجان قالياسقاروۆ اتىنداعى “جەلتوقسان” قورى جانە “جەلتوقسان اقيقاتى” ۇيىمىنىڭ جەرگىلىكتى بولىمشەسى ۇيىمداستىردى. اشىلۋ سالتاناتىندا دەنە شىنىقتىرۋ جانە سپورت باسقارماسى باسشىسىنىڭ ورىنباسارى اسىلبەك الديمەنوۆ پەن “قاھارماندار” قوعامدىق قورى وبلىستىق فيليالىنىڭ توراعاسى ەرىك نۇراقاەۆ ءسوز سويلەپ, سپورتشىلارعا جەڭىس تىلەدى.
كوماندالار ءۇش توپقا ءبولىنىپ سايىستى, ەڭ كوپ ۇپاي جيناعاندارى اقتىق سىنعا جولداما الدى. فينالدىق باسەكەگە شىققان ءۇش كوماندا اراسىنداعى ويىن وتە تارتىستى ءوتتى. استانانىڭ “ۆەچەرنيايا استانا” كومانداسى, نازارباەۆ زياتكەرلىك مەكتەبى مەن №32 مەكتەپتىڭ بىرىككەن قۇرامى جانە “يسكرا” ۇجىمى ءوزارا مىقتىنى انىقتادى. بۇل دودادا ەلوردالىق كوماندانىڭ اسىعى الشىسىنان ءتۇستى. جاسۇلان وردابەك, اندرەي بۋكين جانە سايات شالتاحمەتوۆ ۇزدىك ويىنشىلار اتاندى. جەڭىمپازدار مەن جۇلدەگەرلەرگە قۇرمەت گراموتاسى مەن اقشالاي سىيلىق تابىس ەتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى