سەناتتا سىبايلاس جەمقورلىققا قارسى ستراتەگيانى ىسكە اسىرۋ ماسەلەلەرى تالقىلاندى

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ولجاس بەكتەنوۆ سىبايلاس جەمقورلىققا قارسى جۇيەلى شارالار تۋرالى باياندادى.  ول مەملەكەتتىك اپپاراتتىڭ كاسىبي سيپاتقا كوشۋىمەن قاتار شەنەۋنىكتەردىڭ ازاماتتارمەن تىكەلەي بايلانىستارى ەلەۋلى تۇردە قىسقارعانىن جانە سىبايلاس جەمقورلىق كورىنىستەرىنە قولايلى جاعدايلار ازايعانىن اتاپ ءوتتى.

جالپى العاندا, حالىققا قىزمەت كورسەتۋ ورتالىقتارى ارقىلى 83 پايىز قىزمەت ەلەكتروندى تۇردە, ونىڭ ىشىندە 63 پايىزى «ەلەكتروندى ۇكىمەت» پورتالى ارقىلى  كورسەتىلەدى.  مالىمەتتەر بازاسىن كىرىكتىرۋ 2,5 ەسە ءوسىپ, 30 پايىزدى قۇراپ وتىر.

اعارتۋشىلىق جۇمىستارى ارقىلى ازاماتتىق قوعامدى سىبايلاس جەمقورلىقپەن بەلسەندى تۇردە كۇرەسكە تارتۋ جانە ونىڭ كەز-كەلگەن كورىنىستەرىنە توزبەۋشىلىك احۋالىن قالىپتاستىرۋ جۇزەگە اسۋدا.

و.بەكتەنوۆ استاندا ىسكە قوسىلعان «قوعامدىق باقىلاۋدىڭ ينتەراكتيۆتىك كارتاسى» تۋرالى سەناتورلارعا ايتىپ بەردى. ول قۇرىلىس, جوندەۋ جۇمىستارى مەن ينفراقۇرىلىمدار جانە الەۋمەتتىك نىسانداردى ۇستاۋ شىعىندارى تۋرالى ناقتى ۋاقىتتاعى دەرەكتەردى كورسەتە الادى. كارتا جەرگىلىكتى بيۋدجەتتى ىسكە اسىرۋدى كورسەتۋگە جانە باعالاۋعا, ساۋالدار بەرۋ مەن شاعىمدار ايتۋعا, سونداي-اق كەرى بايلانىسقا شىعۋعا مۇمكىندىك بەرەدى.

سەناتور مۇحتار قۇل-مۇحاممەد وسى جوبانى ەلىمىزدىڭ بارلىق ايماقتارىنا كەڭىنەن تاراتۋدى ۇسىندى. ونى ءتيىمدى ىسكە اسىرۋ ءۇشىن ارنايى باعدارلاما ازىرلەپ, بىرنەشە ساتىعا ءبولۋ كەرەكتىگى ايتىلدى.

حالىقتىڭ كەڭ جولاقتى ينتەرنەتكە قول جەتكىزۋىن قامتاماسىز ەتۋگە ارنالعان بيۋدجەت قارجىسىن ءتيىمدى جۇمساۋ ماسەلەلەرىنە بايلانىستى قىزۋ پىكىرسايىس ورىستەدى. سەناتور تالعات مۇساباەۆتىڭ پىكىرىنشە, ول ءۇشىن تالشىقتى-وپتيكالىق قىمبات بايلانىس جەلىسىن ەمەس, KazSat-2 جانە KazSat-3 جەر سەرىكتەرىن پايدالانۋ ورىندى بولار ەدى.

حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا «تسيفرلى قازاقستان» باعدارلاماسىنا بولىنگەن قارجىنى جۇمساۋ بويىنشا قوعامدىق مونيتورينگ جۇيەسىن جاساۋدى ۇسىندى.

سەناتورلار مەملەكەتتىك ورگاندارداعى, ونىڭ ىشىندە ءىىم جۇيەسى, سالىق قىزمەتى, كەدەن, كولىك سالاسىنداعى سىبايلاس جەمقورلىق دەرەكتەرىنە الاڭداۋشىلىق ءبىلدىردى.

سەناتور د.نازارباەۆانىڭ پىكىرىنشە, ءبىرىنشى كەزەكتە قۇقىق قورعاۋ ورگاندارى ءوز ىشىندەگى سىبايلاس جەمقورلىقپەن كۇرەسۋىلەرى ءتيىس. سونداي-اق مەملەكەتتىك ورگاندارداعى ءوزارا باقىلاۋ جۇيەسىن قۇرۋ جانە زاڭنامالىق اكتىلەرگە سىبايلاس جەمقورلىق تۇرعىسىندا جۇيەلى تالداۋ جاساۋ كەرەك.