ەل تاۋەلسىزدىگى كۇنى قارساڭىندا اققايىڭ اۋدانىندا زاماناۋي ءسۇت فەرماسى اشىلدى. اققايىڭ اۋدانىنا جۇمىس ساپارمەن بارعان وبلىس اكىمى قۇمار اقساقالوۆ «يۆان زەنچەنكو» جشس-ءنىڭ زاماناۋي ءسۇت فەرماسىندا بولدى. نىساندى قازاقستاننىڭ ەڭبەك ەرى گەننادي زەنچەنكونىڭ نەمەرەسى يۆان زەنچەنكو تۇرعىزدى. ول اتاسىنىڭ جولىن قۋىپ, ەڭبەك ديناستياسىن جالعاستىرىپ كەلەدى. فەرما تولىق اۆتوماتتاندىرىلعان, سوڭعى ۇلگىدەگى تسيفرلى تەحنولوگيالار ەنگىزىلگەن. كۇنىنە 10 تونناعا دەيىن ءسۇت وندىرە الادى.
«پرەزيدەنت ەكونوميكانى تسيفرلاندىرۋ بويىنشا مىندەتتەر قويعان بولاتىن. ەلىمىزدىڭ باستى مەرەكەسى قارساڭىندا وبلىس بويىنشا سوڭعى ۇلگىدەگى 4 ءسۇت فەرماسىن اشىپ وتىرمىز. ءبارى– تسيفرلى كەشەندەر», - دەدى قۇمار اقساقالوۆ. ساپار بارىسىندا ايماق باسشىسى رۋبلەۆكا اۋىلىنداعى جاڭارتىلعان مادەنيەت ۇيىنە باردى. «رۋحاني جاڭعىرۋ» باعدارلاماسى اياسىندا سەرىكتەستىك مادەني نىساندى كۇردەلى جوندەۋدەن وتكىزۋگە قاراجات بولگەن. اكىم اققايىڭ اۋدانىنىڭ جۇرتشىلىعىمەن كەزدەسىپ, شارۋاشىلىقتىڭ اتقارعان جۇمىستارىنا وڭ باعاسىن بەردى. 15 جىلدان كەيىن مادەنيەت وشاعى قايتا جاڭارتىلىپ, اۋىلدىقتاردىڭ شىعارماشىلىق, رۋحاني ورتالىعىنا اينالىپ وتىر.
سەرىكتەستىك رۋبلەۆكا اۋىلىندا زاماناۋي سپورت كەشەنىن تۇرعىزۋدى جوسپارلاپ وتىر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى