جەلتوقساننىڭ 10-11-ى كۇندەرى بەلگىلى كينوتانۋشى, پروفەسسور, ەلىمىزدەگى كاسىبي كينوتانۋدىڭ نەگىزىن قالاۋشى, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى باۋىرجان نوگەربەكتىڭ 70 جىلدىعىنا ارنالعان رەسپۋبليكالىق قىسقامەتراجدى فيلمدەر فەستيۆالىمەن عىلىمي-پراكتيكالىق كونفەرەنتسيا ءوتتى. شارانى قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن استانا قالاسىنداعى قازاق ۇلتتىق ونەر ۋنيۆەرسيتەتى ۇيىمداستىردى.
رەت-رەتىمەن بايانداساق, ەڭ الدىمەن باۋىرجان نوگەربەكتىڭ 70 جىلدىعىنا ارنالعان كەش شىمىلدىعىن ءتۇرىپ, قازاق كينوتەورياسى, كينوسىنى, كينوتاريحى سالالارى بويىنشا ەلەۋلى ەڭبەك ەتكەن تۇلعانىڭ شىعارماشىلىق جولىن ادىپتەگەن «جارقىن بەينە» اتتى دەرەكتى فيلم كورسەتىلىپ, بۇل كۇندە قازاق كينو ونەرىنىڭ ساڭلاقتارىنا اينالعان باۋىرجان نوگەربەكتىڭ ونەردەگى قاناتتاس دوستارى ەستەلىكتەر ايتىپ, ونىڭ كاسىبي مامان رەتىندەگى, كىسىلىكتى ادام رەتىندەگى بيىگىنە كوز جىبەردى. كەش كونتسەرتتىڭ باعدارلاماعا ۇلاستى.
ەسكە الا كەتسەك, 1948 جىلى قاراعاندى وبلىسى, ۇلىتاۋ اۋدانى, ۇلىتاۋ اۋىلىندا تۋعان. 1971 جىلى ماسكەۋ قالاسىندا ۆگيك-ءتىڭ ستسەنارلىق-كينوتانۋشىلىق فاكۋلتەتىنىڭ كينوتانۋ ءبولىمىن تامامداعان باۋىرجان نوگەربەك ەسىمى قازاقستانداعى كينوپەداگوگيكانىڭ نەگىزىن قالاۋشىلارىنىڭ ءبىرى, كاسىبي كينوتانۋ ماماندىعىنىڭ نەگىزىن سالۋشى تۇلعا بولىپ تاريح تاقتاسىنا جازىلدى. 1993 جىلدان باستاپ ت. جۇرگەنوۆ اتىنداعى قازاق ۇلتتىق ونەر اكادەمياسىندا كينوتانۋشىلار شەبەرحاناسىنا جەتەكشىلىك ەتكەن ول وتاندىق كينو تاريحىندا كينوتانۋشىلاردىڭ العاشقى بۋىن تۇلەكتەرىن وقىتىپ شىعاردى. 2010 جىلى قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆانىڭ شاقىرۋىمەن استانا قالاسىنا كەلىپ, اتالعان ۋنيۆەرسيتەتتە «ونەرتانۋ» كافەدراسىن قۇرىپ, كافەدرا مەڭگەرۋشىسى جانە كينوتانشۋلار شەبەرحاناسىنىڭ جەتەكشىسى بولىپ قىزمەت اتقارىپ, سوڭعى دەمى بىتكەنشە ۇلاعاتتى ۇستازدىق قىزمەتىن جالعاستىرىپ كەتكەن ەدى. قازاقستاندا جانە شەتەلدە قازاق, ورىس, اعىلشىن, نەمىس, كورەي, گوللاند, سەرب-حورۆات, يتاليان تىلدەرىندە جارىق كورگەن 250-دەن استام ماقالا, رەتسەنزيا مەن ەسسەنىڭ اۆتورى بولعان ونىڭ ەڭبەگى ءبىر كەشتىڭ اياسىندا ايتىلىپ بىتەر اڭگىمە ەمەس ارينە. كونتسەرتتەن كەيىن جان-جاقتان كەلگەن مامانداردىڭ باسىن قوسقان عىلىمي-پراكتيكالىق كونفەرەنتسيا جۇمىسىن قازاق ۇلتتىق ونەر ۋنيۆەرسيتەتىنىڭ رەكتورى, پروفەسسور, قازاقستان رەسپۋبليكاسىنىڭ حالىق ءارتيسى, مەملەكەتتىك سىيلىقتىڭ يەگەرى, قازاقستاننىڭ ەڭبەك ەرى – ايمان مۇساقوجاەۆا اشىپ بەردى. «باۋىرجان نوگەربەك – قازاق كينو ونەرى مادەنيەتىنىڭ بەلدى وكىلدەرىنىڭ ءبىرى عانا ەمەس, سول مادەنيەتتى قالىپتاستىرۋعا بۇكىل سانالى عۇمىرىن ارناعان بىرەگەي تۇلعا» دەگەن ول شاراعا قاتىسۋعا الىس-جۋىقتان كەلگەن قوناقتارعا العىسىن ايتا وتىرىپ, فەستيۆال مەن كونفەرەنتسيا جۇمىسىنا ساتتىلىك تىلەدى.
بۇل شىندىعىندا ءوتتى-كەتتى كوپ شارانىڭ ءبىرى ەمەس, كينو سالاسىنداعى جاستار ونەرىن شىڭداي تۇسەتىن ايرىقشا وقيعا بولدى. ولاي دەيتىنىمىزدىڭ ءبىر سەبەبى, رەسپۋبليكالىق قىسقامەتراجدى فيلمدەر فەستيۆالى ۇيىمداستىرىلىپ, وعان ەلىمىز بەن شەتەلەلدەرگە تانىمال ءدامىر ماناباي, سەرگەي ءازيموۆ, سلامبەك تاۋەكەل, دارەجان ومىرباەۆ, سەرىك اپرىموۆ باستاعان كينورەجيسسەرلەر كەلىپ, جاس كيونشىلاردىڭ تۋىندىلارىنا قازىلىق ەتۋىمەن قاتار جەكە-جەكە شەبەرلىك دارىستەر وقىدى.
سونىمەن قازىلار القاسىنىڭ كوڭىلىنەن شىققان فيلمدەرگە ءتورت اتالىم بويىنشا ء(ار اتالىم بويىنشا ەكى تۋىندىعا) باۋىرجان نوگەربەك اتىنداعى ديپلوم مەن قارجىلاي سىياقى بەرىلدى. «كوركەمسۋرەتتى فيلم» اتالىمى بويىنشا شۇعىلا سەرجان مەن ۆەنەرا قايىرجانوۆانىڭ فيلىمدەرى ۇزدىك دەپ تانىلسا, «دەرەكتى فيلم» اتالىمى بويىنشا جايىق بەلقوجاەۆ پەن نۇرسۇلتان نۇسقابەكوۆتىڭ تۋىندىسى العا شىقتى. ال «انيماتسيالىق فيلم» اتالىمى بويىنشا مەيىرجان ساندىباي مەن يۆان ارداشوۆ جۇلدەلى بولدى. «ۇزدىك كينوتانۋشىنىڭ جۇمىسى» اتالىمى دا بولدى. ونى ەڭلىك ەگەۋباەۆا مەن ادەمى قاپار ەنشىلەدى. ال, قازىلار القاسى تاعايىنداعان «دەرەكتى كينودا ۇلتتىق داستۇرلەردى جالعاستىرعانى ءۇشىن» جۇلدەسىمەن «اتا-بابالار مۇراسى» اتتى دەرەكتى فيلمىمەن بەرىك جاقانوۆ ماراپاتتالدى. سونداي-اق, «استانا فيلم اكادەمياسى» تاعايىنداعان ەكى ارنايى جۇلدەگە ءالىمجان قۇداباەۆ پەن تيمۋر سەردالين قول جەتكىزدى.
«كينوفەستيۆالعا جاستاردىڭ قىزىعۋشىلىعى ەرەكشە بولدى, كونكۋرستىق باعدارلاماعا قاتىسقان فيلمدەردىڭ 20 ءفيلىمنىڭ 10-ى كوركەمسۋرەتتى فيلم بولسا, 5-ءى دەرەكتى فيلم, 5-ءى انيماتسيالىق فيلم. جاس كينوشىلارعا اعا بۋىن رەجەيسسەرلەردىڭ باعاسى, فيلمدەرى تۋرالى پىكىرى ءتىپتى قىزىق بولدى» دەيدى, باۋىرجان نوگەربەكتىڭ شاكىرتى, بەلگىلى كينوتانۋشى, ونەرتانۋ كانديداتى, «ونەرتانۋ» كافەدراسىنىڭ پروفەسسورى نازيرا راحمانقىزى.
شارا سوڭىندا قوناقتار, قازاق كينو ونەرىنە ەرەكشە ۇلەس قوسقان ايتۋلى تۇلعانىڭ سوڭعى قىزمەت ىستەگەن وقۋ ورنىنىڭ جوعارى دارەجەدە ۇيىمداستىرعان يگى ىستەرىنە العىستارىن ايتىپ تارقاستى.
ۇلاربەك نۇرعالىم ۇلى,
«ەگەمەن قازاقستان»