17-21 جەلتوقسان ارالىعىندا قاراعاندىدا بوكستان بەلگىلى قوعام قايراتكەرى, ەلىمىزگە ەڭبەك سىڭىرگەن جاتتىقتىرۋشى عالىم جارىلعاپوۆتى ەسكە تۇسىرۋگە ارنالعان XXXV حالىقارالىق ءتۋرنيردىڭ جالاۋى جەلبىرەيدى.
جىل سايىن وسى تۋرنيرگە سپورت جۇلدىزدار كەلىپ, جەرگىلىكتى جانكۇيەرلەردى ءبىر جەلپىندىرىپ كەتەدى. وزگەلەردى ايتپاعاندا, اقش-تىڭ داڭقتى بوكسشىسى, كاسىپقوي رينگتىڭ كوكجالى روي دجونستىڭ ءوزى كومىرلى ولكەگە ءبىر ەمەس, بىرنەشە مارتە تابان تىرەگەنى ەسىمىزدە. بيىلعى جارىستى تاماشالاۋ ءۇشىن گەرمانيالىق بوكسشى كريستينا حاممەر جانە رەسەيلىك كينورەجيسسيور جانە ستسەناريست ولەگ ستەپچەنكو مەن اكتەر يگور جيجيكين قاراعاندىعا ات باسىن بۇرماق.
ەسىمدەرى جوعارىدا اتالعان ازاماتتاردىڭ العاشقى ەكەۋى بىزگە بوتەن ەمەس. ماسەلەن, كريستينا حاممەر 1990 جىلى قاراعاندى وبلىسىنىڭ نوۆوپودولينسك كەنتىندە دۇنيەگە كەلدى. بالاۋسا كەزىندە اتا-اناسىمەن بىرگە گەرمانياعا قونىس اۋداردى. دورتمۋندتا ءجۇرىپ, بوكستىڭ قىر-سىرىنا قانىقتى. 2009 جىلى كاسىپقوي رينگكە قادام باستى. سول ۋاقىت ارالىعىندا 24 كەزدەسۋ وتكىزىپ, بىردە-بىرەۋىندە جەڭىلگەن جوق. بۇل كۇندەرى كريستينا بىرقاتار بەلدى نۇقسالار بويىنشا الەم چەمپيونى اتانىپ وتىر.
ولەگ ستەپچەنكو 1965 جىلى قاراعاندى قالاسىندا تۋدى. ۆ.ي.سۋريكوۆ اتىنداعى ماسكەۋ مەملەكەتتىك اكادەميالىق كوركەمونەر ينستيتۋتىن اياقتاپ, ەڭبەك جولىن سول جاقتى باستادى. بىرقاتار جاقسى فيلمدەر ءتۇسىرىپ, مىقتى ستسەناريلەر جازدى. ال ماسكەۋدىڭ تۋماسى يگور جيجيكين بولسا, گولليۆۋد پەن رەسەي كينوسىندا تانىلعان وتە شەبەر اكتەر.
بيىل 35 مارتە ۇيىمداستىرىلعالى وتىرعان عالىم جارىلعاپوۆتى ەسكە تۇسىرۋگە ارنالعان تۋرنيردە بۇل جولى قازاقستاننان بولەك, رەسەي, موڭعوليا, قىتاي, تايلاند, وزبەكستان جانە قىرعىزستاننىڭ بەلدى بىلعارى قولعاپ شەبەرلەرى باق سىنايدى.
عالىم سۇلەيمەن,
«ەگەمەن قازاقستان»