استانادا قوعامدىق دامۋ مينيسترلىگى قوعامدىق كەلىسىم كوميتەتى ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعىنىڭ ۇيىمداستىرۋىمەن «قازاقستاندا ءدىنتانۋ ساراپتاماسىن جۇرگىزۋدىڭ وزەكتى ماسەلەلەرى» اتتى ءداستۇرلى وقىتۋ سەمينارى ءوتتى.
شاراعا ادىلەت مينيسترلىگى سوت ساراپتاماسى ورتالىعى, بعم عك «مەملەكەت تاريحى» مەملەكەتتىك مەكەمەسى, الماتى قالاسى بويىنشا سوت ساراپتاماسى ينستيتۋتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, «كاسىبي پسيحولوگيالىق ليگا» قوعامدىق بىرلەستىگى, «ساراپتامالىق زەرتتەۋ ورتالىعى» جەكە مەكەمەسىنىڭ بىلىكتى ماماندارى مەن بەلگىلى ءدىنتانۋشى ساراپشىلار, سونداي-اق ماگيسترانتتار مەن دوكتورانتتار قاتىستى.
ءدىنتانۋ ساراپتاماسىمەن اينالىساتىن مەملەكەتتىك ورگاندار قىزمەتكەرلەرىنە ارناپ ۇيىمداستىرىلعان سەمينار اتالعان قىزمەتتەگى مامانداردىڭ كاسىبي بىلىكتىلىگىن ارتتىرۋ, ءدىني مازمۇنداعى ماتەريالدارعا ساراپتاما جۇرگىزۋدىڭ وزەكتى ماسەلەلەرى مەن ءتيىمدى ءادىس-تاسىلدەرىن تالقىلاۋ, سالالىق مامانداردىڭ ءوزارا تاجىريبە الماسۋ الاڭىن قالىپتاستىرۋدى كوزدەيدى.
سەميناردى اشقان ورتالىق ديرەكتورى اينۇر ابدىراسىلقىزى اتالعان مەكەمەنىڭ اتقارعان جۇمىستارىنا قىسقاشا شولۋ جاسادى. ونىڭ پىكىرىنشە, 2011 جىلدان باستاپ ساراپتاما جۇرگىزۋدى قولعا العان ورتالىقتا بۇگىنگە دەيىن 8528 نىسان ساراپتامادان وتكىزىلگەن, ونىڭ 958-ىنە تەرىس قورىتىندى بەرىلگەن.
ءوز كەزەگىندە قوعامدىق كەلىسىم كوميتەتى توراعاسىنىڭ ورىنباسارى ب.مىرزاەۆ ەلىمىزدەگى ءدىنتانۋ ساراپتاماسىن جۇرگىزۋدىڭ كەزەڭدىك ناتيجەلەرىنە توقتالىپ, بۇل تاقىرىپتىڭ مەملەكەت قاۋىپسىزدىگى ءۇشىن ماڭىزى زور ەكەنىن اتاپ ءوتتى. كوميتەتتەگى وسى باعىتتا جۇزەگە اسىرىلىپ جاتقان جۇمىستاردىڭ ءبىرى رەتىندە الەۋمەتتىك جەلىلەردەگى, اتاپ ايتقاندا, 2016 جىلى 10700, بىلتىر 10174, بيىل 3790 نىسانعا ساراپتاما جاسالعانىن ايتتى.
ال ەكسترەميستىك جانە ءداستۇرلى ەمەس ماتەريالدارعا ءدىنتانۋ ساراپتاماسىن جۇرگىزۋدىڭ مازمۇندىق ماسەلەلەرى تۋرالى تاقىرىپتى تارقاتقان ا.ابدىراسىلقىزىنىڭ مالىمەتى بويىنشا, 2013-2018 جىلدار ارالىعىندا ساراپتامادان وتكىزىلگەن ءداستۇرلى ەمەس ءدىني اعىمداعى نىساندار سانى 236-عا جەتكەن, ونىڭ ىشىندە 111 دانا كىتاپ, 27 سD ديسك, 13 داپتەر, 11 ۆيدەو, 8 سايت جانە باسقا دا الەۋمەتتىك جەلى پاراقشالارى, سكرينشوتتار مەن ءتۇرلى زاتتار بار. ساراپتاما جاساۋ كەزىندە اتا زاڭ, «ۇلتتىق قاۋىپسىزدىك تۋرالى», ء«دىني قىزمەت جانە ءدىني بىرلەستىكتەر تۋرالى», «بۇقارالىق اقپارات قۇرالدارى تۋرالى» زاڭدار باسشىلىققا الىناتىنىن, سونداي-اق ۇلتتىڭ تاريحي-مادەني مۇراسىنان ايىرىلۋ قاۋپى – ۇلتتىق قاۋىپسىزدىككە نۇقسان كەلتىرەتىن جاعدايلاردىڭ ءبىرى ەكەنىن ءسوز ەتتى.
سەمينار بارىسىندا اتالعان ورتالىقتاعى ءدىنتانۋ ساراپتاماسى بازاسىنا, تەرىس قورىتىندى بەرىلگەن ماتەريالدارعا قاتىستى باياندامالار جاسالدى.
ايدانا شوتبايقىزى,
«ەگەمەن قازاقستان»