تۇركيانىڭ بۋرسا قالاسىندا ەلىمىزدەگى ايتۋلى قىلقالام شەبەرلەرىنىڭ ىرگەلى ەڭبەكتەرىنىڭ باسىن بىرىكتىرگەن « ۇلى دالا رۋحى» كورمەسى اشىلدى. باۋىرلاس ەلدىڭ ونەر سۇيەر قاۋىمىنا ۇسىنىلعان كوشپەلى كورمە مادەنيەت جانە سپورت مينيسترلىگىنىڭ, سونداي-اق ءا.قاستەەۆ اتىنداعى مەملەكەتتىك ونەر مۋزەيى مەن حالىقارالىق تۇركسوي ۇيىمىنىڭ مۇرىندىق بولۋىمەن شىمىلدىعىن ءتۇرىپ وتىر.
« ۇلى دالا رۋحى» كورمەسى كوشپەندىلەر مادەنيەتىنىڭ, قازاقتىڭ تۇرمىس ءداستۇرىن, ۇلتتىق ات سپورتى ويىندارىن, باي ادەپ-عۇرىپتارىنىڭ بىرەگەي ەرەكشەلىگىن كورسەتەدى. ول قازىرگى زامانعى تۇركىتىلدەس ەلدەردىڭ بەينەلەۋ ونەرىن, وتكەن تاريحىن, ونىڭ اۋماعىندا بولعان ەجەلگى وركەنيەتتەردى, قازىرگى زامانعى ادامزات پروبلەمالارىن رۋحاني ىزدەنىستەر ارقىلى تانىپ بىلۋگە جەتەلەيدى.
تۇرىك كورەرمەندەرى وتاندىق ەۆگەني سيدوركين, ءابدىراشيت سىدىحانوۆ, دۋلات اليەۆ, عاني بايانوۆ, باحىت باپيشەۆ سىندى ونەر شەبەرلەرىنىڭ, سونداي-اق مارات بەكەەۆ, شاميل گۋليەۆ, نەللي بۋبە, اسقار ەسداۋلەت, الماگۇل مەڭلىباەۆا, اندرەي نودا, گۇلجامال تاگەنوۆا, الپىسباي قازىعۇلوۆ جانە ۆياچەسلاۆ ليۋي-كو سياقتى زاماناۋي سۋرەتشىلەردىڭ شىعارماشىلىعىمەن تانىسا الادى. كورمە كوللەكتسياسى 32 كەسكىندەمەلىك جانە گرافيكالىق تۋىندىنى قامتىعان.
مۋزەي ديرەكتورى, پروفەسسور گۇلميرا شالاباەۆا اتاپ وتكەندەي: «كورمە قازاقستاننىڭ زاماناۋي ونەرىنىڭ كەڭ ستيليستيكالىق ارتۇرلىلىگىن, ۇلتتىق بوياۋى مەن وزىندىك ەرەكشەلىگىن ايقىن كورسەتە وتىرىپ, كورنەكى تۇردە ۇسىنادى. ءا.قاستەەۆ اتىنداعى ونەر مۋزەيى شەتەلدىك كورمەلەردى ءار ءتۇرلى ەلدەردە ۇيىمداستىرۋ ارقىلى, قازاق ونەرىن حالىقارالىق دەڭگەيگە كوتەرىپ, الەم حالىقتارىن ءتول مادەنيەتىمىز, تاريحىمىز بەن بەينەلەۋ ونەرىمىزدىڭ تەرەڭىنە ۇڭىلۋگە شاقىرادى».
ارمان وكتيابر,
«ەگەمەن قازاقستان»
الماتى