وڭتۇستىك كورەيانىڭ سۋۆون قالاسىنداعى SIMA مۋزەيىندە «ەۋرازيالىق ۋتوپيا: Post Scriptum» اتتى كورمە اشىلدى. ەكسپوزيتسياعا قازاقستاندىق سۋرەتشىلەردىڭ 100-دەن استام تۋىندىسى قويىلدى.
«فوكۋس قازاقستان» جوباسى اياسىندا لوندون ( ۇلىبريتانيا), بەرلين (گەرمانيا), دجەرسي سيتي (اقش) قالالارىندا وتكەن تاقىرىپتىق كورمە ەندى سۋۆون قالاسىنا ساپار شەكتى. جوبا كۋراتورى روزا ابەنوۆانىڭ ايتۋىنشا, باعدارلاما حالىقارالىق ارەناداعى قازاقستاننىڭ زاماناۋي بەينەلەۋ ونەرىن ايتۋلى دەڭگەيدە كورسەتە العان بىردەن ءبىر تابىستى مىسال.
– ءتورتىنشى رەت وتكىزىلىپ وتىرعان كورمەدە 400-گە جۋىق جۇمىس جانە 94 سۋرەتشىنىڭ مۇراعاتتىق قۇجاتتارى كورسەتىلدى. جوبانىڭ سوڭىندا ءار كورمە بويىنشا كاتالوگتار شىعارىلادى. «ەۋرازيالىق ۋتوپيا: Post Scriptum» كورمەسى كەڭەستىك كەزەڭنىڭ جانە زاماناۋي سۋرەتشىلەردىڭ شىعارماشىلىعىن زەردەلەۋ, كوركەمدىك ءداستۇردىڭ جالعاسى مەن ءۇزىلۋىن كورسەتۋ, رەسپۋبليكامىزدىڭ تاۋەلسىزدىگى كەزەڭىندەگى قازىرگى زامانعى ونەردىڭ دۇنيەگە كەلۋىن, جاڭا ديسكۋرستار مەن مەديانىڭ پايدا بولۋىن زەرتتەۋ ارقىلى قازاقستاندىق ونەردىڭ ءنارراتيۆىن انىقتاۋعا تىرىسادى, – دەيدى ول.
ۇلتتىق سۋرەت ونەرى مەكتەبىنىڭ ەرەكشەلىكتەرى, «جەرگىلىكتى مودەرنيزم» فەنومەنى جانە تاۋەلسىزدىك كەزەڭىندەگى ونەر – وسى كورمەنىڭ باستى تاقىرىپتارى. كورمەدە ۇكى اجيەۆتىڭ, ولگا كۋجەلەنكونىڭ, سالاحيتدين ايتباەۆتىڭ, جاڭاتاي شاردەنوۆتىڭ, ەۆگەني سيدوركيننىڭ, الەكسەي ستەپانوۆتىڭ, ميحايل كيمنىڭ, بوريس پاكتىڭ, ءابدىراشيت سىدىحانوۆتىڭ, رۋستام ءحالفيننىڭ, سەرگەي ماسلوۆتىڭ, ساكەن نارىنوۆتىڭ, سەرىكباي ءالجانوۆتىڭ, ەربوسىن مەلدىبەكوۆتىڭ, ەلەنا مەن ۆيكتور ۆوروبەۆتاردىڭ, الەكساندر ۋگايدىڭ, باقىت بۇبىقانوۆتىڭ, الىبەك مەرگەنوۆتىڭ, ساۋلە دۇيسەنبينانىڭ, نۇربول نۇراحمەتتىڭ جانە باسقالارىنىڭ شىعارمالارى ۇسىنىلدى. «ەۋرازيالىق ۋتوپيا: Post Scriptum» كورمەسىنىڭ جەتەكشىلەرىنىڭ ءبىرى شين ىن يانگتىڭ (وڭتۇستىك كورەيا) ايتۋىنشا, قازاقستان مەن كورەيانىڭ تاريحي ورتاق تۇستارى كوپ ءارى قازاق مادەنيەتى مەن دۇنيەتانىمىن تانىستىرۋدا اتالعان كورمەنىڭ ورنى ەرەكشە. كورمە 2019 جىلدىڭ 3 ناۋرىزىنا دەيىن جالعاسادى. «فوكۋس قازاقستان» جوباسىن مادەنيەت جانە سپورت مينيسترلىگىنىڭ قولداۋىمەن قازاقستان رەسپۋبليكاسىنىڭ ۇلتتىق مۋزەيى ۇيىمداستىرىپ وتىر.
ايا ءومىرتاي,
«ەگەمەن قازاقستان»