بايلانىس قىزمەتتەرىنىڭ باعاسىن تومەندەتۋ ءۇشىن قولجەتىمدى «الەۋمەتتىك» تاريفتەر ازىرلەنەدى

اقپارات جانە كوممۋنيكاتسيالار مينيسترلىگىنىڭ حابارلاۋىنشا, كابەلدىك كارىزجەلى قىزمەتتەرىنىڭ ءتاريفى سوڭعى ەكى جىلدا ەش وزگەرمەگەن ءارى ول قىزمەت تەك زاڭدى تۇلعالارعا كورسەتىلەدى.  

د. ششەگلوۆانىڭ ايتۋىنشا, اۋىل تۇرعىندارىنا تەلەفون جانە ينتەرنەت تاريفتەرى بويىنشا (2013 جىلدان باستاپ) ءوز قۇنىنان تومەن باعامەن قىزمەت كورسەتىلەدى. تەلەفون بايلانىسى ءتاريفى —  596 تەڭگە (ال وزىندىك قۇنى — 1125 تەڭگە), ينتەرنەت ءتاريفى — تاريفتىك جوسپارعا قاراي 982 تەڭگە مەن 1964 تەڭگە ارالىعىندا (وزىندىك قۇنى — 2932 تەڭگە).

اۋىلدىق جەرلەردە تاريف بويىنشا امبەباپ قىزمەت كورسەتەتىن وپەراتورلارعا وتەماقى بيۋدجەت ەسەبىنەن تولەنەدى. بيىلعى جىلى وسى قىزمەتتەردى سۋبسيديالاۋعا 8,7 ملرد تەڭگە قارجى بولىنگەن.

«دۇنيەجۇزىلىك ەكونوميكالىق فورۋمنىڭ جاھاندىق باسەكەلەستىككە قابىلەتتىلىك يندەكسىندە بايلانىس قىزمەتتەرىنىڭ تاريفتىك قولجەتىمدىلىگى بويىنشا قازاقستان جوعارعى ورىندا تۇر. ونىڭ ىشىندە ۇيالى بايلانىس تاريفتەرى بويىنشا قازاقستان 140 ەلدىڭ ىشىندە 29 ورىندا بولسا, ال بەكىتىلگەن كەڭجولاقتى ينتەرنەت قىزمەتتەرى بويىنشا 20 ورىندا», — دەيدى د. ششەگلوۆا.

بايلانىس قىزمەتتەرىنە باعانى تومەندەتۋ بويىنشا تاپسىرمانى ورىنداۋ ماقساتىندا قر اكم بارلىق ءىرى بايلانىس وپەراتورلارىنىڭ: «قازاقتەلەكوم» اق, «ترانستەلەكوم» اق, «قازترانسكوم» اق, «كسەلل» اق, «كار-تەل» جشس, «موبايل تەلەكوم-سەرۆيس» جشس قاتىسۋىمەن كەڭەس وتكىزدى.

«كەڭەس قورىتىندىسى بويىنشا بايلانىس وپەراتورلارى قولجەتىمدى «الەۋمەتتىك» تاريفتىك جوسپارلاردى ازىرلەۋ ارقىلى بايلانىس بويىنشا كورسەتىلەتىن قىزمەتتەر ءتاريفىن تومەندەتۋدى ۇسىندى. اقپارات جانە كوممۋنيكاتسيالار مينيسترلىگىنە وسى ايدىڭ سوڭىنا دەيىن جاڭا تريفتىك جوسپارلاردىڭ قۇرىلىمى, قىزمەت كورسەتۋ كولەمى مەن باعالارى بويىنشا ۇسىنىستار ەنگىزۋ تاپسىرىلدى. وپەراتورلاردان الەۋمەتتىك تاريفتىك جوسپارلار بويىنشا اقپارات العان سوڭ ولاردى باق-تاردا ناسيحاتتاۋ جۇمىستارى جۇرگىزىلەتىن بولادى», - دەپ تۇيىندەدى ۆيتسە-مينيستر.