سىرتقى ىستەر ءمينيسترى قايرات ءابدىراحمانوۆ «ەۋروپالىق وداق – ورتالىق ازيا» كونفەرەنتسياسىنىڭ قورىتىندىسى بويىنشا بريۋسسەلدە قازاقستاندىق باق وكىلدەرىمەن كەزدەسۋ وتكىزدى, دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
قازاقستاندىق ءبىر توپ جۋرناليستەر بريۋسسەلگە ەۋروپالىق وداق ينستيتۋتتارىنىڭ جۇمىسىمەن, ەو-نىڭ ورتالىق ازيا بويىنشا ستراتەگياسىن جاڭارتۋ پروتسەسىمەن تانىسۋ ءۇشىن جانە «ەۋروپالىق وداق – ورتالىق ازيا» مينيسترلىك كونفەرەنتسياسىنا قاتىسۋ ءۇشىن ەۋرووداق العاش رەت ۇيىمداستىرعان ءباسپاسوز تۋرىمەن كەلگەن.
بريفينگ بارىسىندا سىرتقى ساياسي ۆەدومستۆونىڭ باسشىسى «ەۋروپالىق وداق – ورتالىق ازيا» كونفەرەنتسياسىنىڭ جانە ءىس-شارا اياسىندا وتكەن ەكىجاقتى كەزدەسۋلەردىڭ قورىتىندىسى, وڭىرارالىق ارىپتەستىكتىڭ جاڭا ستراتەگياسىنىڭ جوباسىنا ۇسىنىلعان قازاقستاندىق تاراپتىڭ ۇسىنىستارى جانە جالپى قازاقستان مەن ەۋرووداق قارىم-قاتىناسى دامۋىنىڭ كەلەشەگى تۋرالى اڭگىمەلەدى.
قوعامداعى وزەكتى ماسەلەلەردى ايشىقتاۋ جانە قازاقستاندىق مەديا سەگمەنتىنىڭ باسەكەگە قابىلەتتىلىگىن ارتتىرۋ ءۇشىن ەۋروپالىق باق-تارمەن ۇزدىكسىز تاجىريبە الماسۋ جانە بايلانىستاردى نىعايتۋ, قوعاممەن بايلانىستىڭ الدىڭعى قاتارلى تەحنولوگيالارىن جانە قازىرگى زامانعى ادىستەرىن ۇيرەنۋدىڭ ماڭىزدىلىعى اتاپ ءوتىلدى.
سونداي-اق, قوعامدىق ديپلوماتيانى جۇزەگە اسىرۋ مەن حالىقتاردى جاقىنداستىرۋداعى باق-تىڭ ماڭىزدى رولىنە ەرەكشە نازار اۋدارىلدى.
كەزدەسۋ قورىتىندىسى بويىنشا قر ءسىم باسشىسى قاتىسۋشىلارعا كاسىبي تابىس تىلەپ, ەۋرووداق پەن ورتالىق ازيا اراسىنداعى كوپجاقتى جانە ەكىجاقتى ارىپتەستىك اياسىندا ۇسىنىلاتىن ەكى تاراپ باق-تارىنىڭ سەرىكتەستىك بويىنشا قۇرالدارىن بەلسەندى قولدانۋعا شاقىردى.