كەنشىلەر استاناسىندا بۇقار جىراۋ قالقامان ۇلىنىڭ 350 جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنتسيا ءوتتى.
القالى جيىنعا قر ۇعا پرەزيدەنتى مۇرات ءجۇرىنوۆ, قوعام قايراتكەرى, اكادەميك عاريفوللا ەسىم, جازۋشى, پۋبليتسيست, قر ەڭبەك سىڭىرگەن قايراتكەرى الدان سمايىل, بۇقار جىراۋدىڭ ۇرپاعى, زاڭ عىلىمدارىنىڭ دوكتورى, پروفەسسور قابدۋلساميح ايتقوجين, ل.ن. گۋميلەۆ اتىنداعى ەۋرازيا ۋنيۆەرسيتەتىنىڭ پروفەسسورى امانجول التاەۆ, سونداي-اق تۇركيا, ءۇندىستان, رەسەي جانە قازاقستاننىڭ باسقا دا عالىمدارى قاتىستى.
كونفەرەنتسيا جۇمىسىن اشىپ, جۇرگىزگەن قاراعاندى وبلىسىنىڭ اكىمى ەرلان قوشانوۆ بيىل بۇقار جىراۋ قالقامان ۇلىنىڭ 350 جىلدىعى اياسىندا وتكىزىلگەن شارالار تۋرالى ايتىپ بەردى.
كونفەرەنتسياعا قاتىسۋشى عالىمدار «كومەكەي اۋليەنىڭ» ءومىرتاريحىنا, سوڭىنا قالدىرعان مۇراسىنا ارنالعان تاقىرىپتاردا مازمۇندى باياندامالار جاسادى.
بۇقار جىراۋدىڭ ۇرپاعى قابدۇلساميح ايتقوجين «كومەكەي اۋليە» شىعارماشىلىعى قازاق حالقىنىڭ ەنتسيكلوپەدياسى ىسپەتتى دەگەن پىكىر ايتتى.
– ول ۇرپاقتار اراسىنداعى بايلانىس ءرولىن اتقارادى. بۇل تۇرعىدا بۇقار جىراۋ مۇراسى «رۋحاني جاڭعىرۋ» باعدارلاماسىن جۇزەگە اسىرۋ ىسىمەن جانە پرەزيدەنتىمىزدىڭ ۇلتتىق تاريحىمىزدىڭ جەتى قىرى تۋرالى ماقالاسىنىڭ مازمۇنىمەن جاراسىمدى ۇيلەسىم تاۋىپ وتىر, – دەپ اتاپ ءوتتى بۇقار جىراۋدىڭ جەتىنشى ۇرپاعى, جيەنشارى بولىپ كەلەتىن قابدۇلساميح ايتقوجين.
كونفەرەنتسيا جۇمىسىن قورىتىندىلاي كەلە, قاراعاندى وبلىسىنىڭ اكىمى ەرلان قوشانوۆ بىرقاتار ۇسىنىستار ايتتى.
– بىرىنشىدەن, ءبىز بۇقار جىراۋمەن بايلانىستى تاريحي ساتتەر مەن ونىڭ ءومىرى تۋرالى عانا ايتۋمەن شەكتەلمەۋىمىز قاجەت. ونىڭ تۇلعاسىنا جاڭا كوزبەن, جاڭا يدەيالارمەن قارايتىن ۋاقىت جەتتى. ەلباسىنىڭ « ۇلى دالانىڭ جەتى قىرى» ماقالاسىندا ءبىزدىڭ عۇلاما قايراتكەرلەرىمىزدىڭ ءومىرى تۋرالى بارلىق دەرەكتەردى جيناۋ قاجەتتىلىگى تۋرالى ايتىلعان. وسىعان وراي پرەزيدەنت «مۇراعات-2025» جەتى جىلدىق باعدارلاماسىن قۇرۋدى تاپسىردى. مۇمكىن بۇقار جىراۋ تۋرالى تاريحي ايعاقتار ۇشان-تەڭىز شىعار جانە ول قۇجاتتاردى رەسەي, تۇركيا, وزبەكستان, قىتاي جانە ءۇندىستاننىڭ مۇراعاتتارىنان تابۋعا بولاتىن شىعار. ەكىنشىدەن, بۇقار جىراۋ تۇگەلدەي قازاق حالقى, تاريحىمىز ءۇشىن ايرىقشا تۇلعا بولىپ تابىلادى. سوندىقتان, كەلەشەكتە بۇقار جىراۋ ينستيتۋتى پايدا بولۋى مۇمكىن دەپ ويلايمىن. عۇلاما ويشىلدىڭ مۇراسىن زەرتتەي كەلە جاس ۇرپاق ءوز حالقىنىڭ تاريحىن زەرتتەي الاتىن بولادى. سانانى, تاريحتى جانە رۋحانياتتى جاڭعىرتۋ وسىدان باستالادى. سەنىمدى بولاشاق ءوز تاريحىن, ۇلى قايراتكەرلەرىن بىلەتىن جانە ولاردى جاس ۇرپاققا ۇلگى ەتەتىن مەملەكەت قانا قول جەتكىزە الادى, – دەدى ەرلان قوشانوۆ.
قايرات ءابىلدا,
«ەگەمەن قازاقستان»
قاراعاندى