قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ وقۋ ۇدەرىسىنە « ۇلى دالا تاريحى» ءپانى ەنگىزىلدى. بۇل تۋرالى وقۋ ورنىنىڭ ءباسپاسوز ورتالىعى حابارلادى.
ۋنيۆەرسيتەتتىڭ ءباسپاسوز ورتالىعىنىڭ باسشىسى جاندار اساننىڭ ايتۋىنشا, بۇل ءپان قازاقستان تاريحىنىڭ تەوريالىق-مەتودولوگيالىق تۇجىرىمدارىنا نەگىزدەلگەن. كۋرستىڭ حرونولوگيالىق شەڭبەرى ەلىمىزدىڭ ەجەلگى داۋىردەن XX عاسىر باسىنا دەيىنگى قالىپتاسقان تاريحي كەزەڭدەرىمەن انىقتالعان.
ءپان 15 تاقىرىپتان تۇرادى. تاقىرىپتاردا ۇلى دالا تاريحى ءپانى جانە ونىڭ رۋحاني جاڭعىرۋ مەن تاريحي سانانى قالىپتاستىرۋداعى ورنى, تۇركى مادەنيەتىنىڭ دۇنيەتانىمدىق ءمانى جانە كوشپەندىلەردىڭ الەمدى ءتۇيسىنۋىنىڭ ەرەكشەلىكتەرى, ۇلى جىبەك جولى ەۋرازيا قۇرلىعىنداعى مەملەكەتتەر مەن وركەنيەتتەردىڭ مادەني سۇحباتتاستىعى مەن ەكونوميكالىق بايلانىستارىنىڭ العىشارتى, قازاق حالقىنىڭ ەتنوگەنەزى مەن ۇلتتىق كودى تۋرالى تىڭ دەرەكتەر قامتىلعان. سونىمەن قاتار, ۇلى دالاداعى تاۋەلسىزدىك ءۇشىن كۇرەس جانە ۇلتتىق بىرلىك پەن بىرەگەيلىك يدەيالارى, اسكەري ونەردىڭ قالىپتاسۋى مەن دامۋ ەۆوليۋتسياسى جانە ۇلى دالانىڭ ۇلى تۇلعالارى جايىنداعى ىرگەلى زەرتتەۋ ەڭبەكتەر دە توپتاستىرىلعان.
– ءپاندى وقىتۋ بارىسىندا ۇلتتىڭ وزىندىك ەرەكشەلىگى مەن باي رۋحاني تاريحىن ايعاقتايتىن وقيعالارعا جەتە نازار اۋدارىلادى. بابادان بالاعا ميراس بولعان ۇلى مۇرانى قادىرلەۋ, ونى ساقتاي وتىرىپ, ءوز ۇلەسىڭدى قوسىپ, دامىتۋ جانە كەيىنگى ۇرپاققا امانات ەتىپ تابىستاۋ سياقتى اسىل قاسيەتتەر وسى ءپان شەڭبەرىندە جۇزەگە اسىرىلادى. بۇل باستاما – بولاشاق مامانداردىڭ ءبىلىم دەڭگەيىن كوتەرۋمەن قاتار, مەملەكەتتىلىكتى نىعايتۋ, جاڭا قازاقستاندىق پاتريوتيزم مەن ۇلتتىق قۇندىلىقتار نەگىزىندە تاريحي سانانى قالىپتاستىرۋ سىندى ومىرشەڭ يدەيالاردى جۇزەگە اسىرۋعا سەپتەسپەك, – دەيدى ۋنيۆەرسيتەتتىڭ رەسمي وكىلى.
قازىرگى كۇندە اتالعان ءپان بويىنشا ارنايى وقۋ قۇرالى دايىندالىپ وتىر. وعان بەلگىلى عالىمدار مەن سالا ماماندارى جۇمىلدىرىلعان.
ايناش ەسالي,
«ەگەمەن قازاقستان»
الماتى