ديماش قۇدايبەرگەننىڭ لوندونداعى كەرەمەت كونتسەرتىنەن سوڭ, ءانشى شەتەلدىك باق وكىلدەرىنە سۇحبات بەردى جانە قازاقستان تۋرالى ايتتى.
19 قاراشادا لوندوندا ۇلىبريتانياداعى قازاقستان مادەنيەتى كۇندەرى اياسىندا ديماش قۇدايبەرگەننىڭ جەكە كونتسەرتى ءوتتى. بۇل شارا قازاقستان رەسپۋبليكاسىنىڭ مادەنيەت جانە سپورت مينيسترلىگىمەن ۇيىمداستىرىلىپ, ۇلىبريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسى ەلشىلىگىنىڭ قولداۋىمەن بولدى. «Indigo at the O2» كونتسەرت زالىنداعى تريۋمفىنان سوڭ, ديماش قۇدايبەرگەن حالىقارالىق جەتەكشى باق وكىلدەرىمەن كەزدەسۋ ءۇشىن, لوندوندا تاعى 2 كۇن بولدى. ديماش ءار سۇحباتىندا قازاقستان تۋرالى, ۇلتتىق سالت-داستۇرلەر تۋرالى قازاق تىلىندە ايتىپ بەردى. ءانشىنىڭ ايتۋىنشا, ول الەمگە تۋعان ەلىنىڭ مادەنيەتىن انا تىلىندە جەتكىزەتىنىن ماقتان تۇتادى. ديماش قۇدايبەرگەن لوندوندا وتكەن ءوزىنىڭ العاشقى جەكە كونتسەرتىن ۇيىمداستىرۋشى – قر مادەنيەت جانە سپورت مينيسترلىگىنە العىس ءبىلدىردى. سونداي-اق, وسى كۇندەرى ءانشى ۇلىبريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسىنىڭ توتەنشە جانە وكىلەتتى ەلشىسى ەرلان ىدىرىسوۆپەن كەزدەستى. ەلشى مىرزا ديماشتىڭ بۇكىل الەمدە قازاقستان ەلشىسى ەكەنىن جانە ەلىمىزدىڭ بەدەلىن الەمدىك دەڭگەيدە كوتەرىپ جۇرگەنىن اتاپ ايتتى.
سول كۇنى ءانشى لوندونداعى قازاقستاندىق ستۋدەنتتەرمەن كەزدەستى. كەزدەسۋ ۇلىبريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسى ەلشىلىگىندە ءوتتى. مۋزىكانتپەن كەزدەسۋگە سان الۋان سالانىڭ بولاشاق ماماندارى كەلدى. ولار توسىن فوتوسەسسيا وتكىزىپ, وزدەرىن قىزىقتىرىپ جۇرگەن سۇراقتارىن قويدى.
ەلشىلىكتىڭ دالىزىندە ديماش جينالعاندارعا ارناپ, فورتەپيانودا بىرنەشە سۇيىكتى شىعارماسىن ورىنداپ بەردى.
الەمدىك جەتەكشى رەداكتسيالارعا ارنالعان سۇحبات سەرياسىن ديماش قۇدايبەرگەن BBC تەلەۆيزياسى مەن راديوسىن ارالاۋدان باستادى. بريتاندىق ۆۆس جالپى ۇلتتىق قوعامدىق تەلەراديو تاراتىلىمى ۇيىمىنىڭ ستۋدياسىندا ديماش قازاق تىلىندە بىرەگەي سۇحبات بەرىپ, ءوز شىعارماشىلىعىمەن ءبولىستى. «BBC World Service» راديوستانتسياسىندا مۋزىكانت «Cultural Frontline» سەنبىلىك شوۋى ءۇشىن ءوزىنىڭ تابىس جولىنداعى تاريحىمەن ءبولىستى. باعدارلاما جۇرگىزۋشىسى تينا داحەلي انشىمەن ونىڭ مۋزىكالىق جولى تۋرالى اڭگىمەلەستى. راديوستانتسيانىڭ جاھاندىق اپتالىق اۋديتورياسى 75 ميلليون تىڭدارماننان تۇرادى.
بريتاندىق «The Independent» ينتەرنەت-باسپاسىنا بەرگەن سۇحباتىندا قازاقستاندىق ءوز مۋزىكاسى مەن شىعارماشىلىق جولى تۋرالى اڭگىمە قۇردى. سۇحبات راديوعا ارنالعان پودكاست تۇرىندە ءوتتى. ءتىلشىنى قازاقستاندىق ءانشىنىڭ قاي جەردە دەمالعاندى ۇناتاتىنى قىزىقتىرىپ, وسىعان قاتىستى سۇراق قويدى. ديماش جۇمىس بارىسىمەن بارعان مەملەكەتتەرىمەن ءبولىسىپ, شەتەلدە ەشقاشان دەمالماعانىن ايتتى. «قازاقستاندا اقتوبە دەگەن شاعىن قالا بار. سول جەردە مەنىڭ وتباسىم, اتا-اجەم, بۇكىل تۋىسىم تۇرادى. سول جەردە مەن كەرەمەت دەمالامىن», - دەپ ءانشى اشىق ايتتى.
ودان بولەك, جاس ءانشى لوندوندىق «Candid» جۋرنالىنىڭ ءتىلشىسى ادام زورگانيمەن كەزدەستى. ادام «indigo at the O2» زالىندا وتكەن ديماشتىڭ كونتسەرتىندە بولعانىن جانە قازاقستاندىقتىڭ شىعارماسىنا ءتانتى ەكەنىن ايتتى.
«1883» ينتەراكتيۆتى مۋلتيمەديالىق پلاتفورماسىنا ديماش ءوز شىعارماسى مەن بولاشاققا قۇرعان جوسپارى تۋرالى ايتىپ بەردى. پورتال رەداكتسياسى ءساندى مۋزىكا, كينو, ساياحات جانە ونەر الەمىندەگى سوڭعى جاڭالىقتاردى تاراتۋمەن اينالىسادى.
قازاقستاندىق ءانشى رەسەيلىك تاسس جەتەكشى اقپاراتتىق اگەنتتىگىنىڭ تىلشىلەرىمەن كەزدەسۋ وتكىزدى. سۇحبات بارىسىندا ديماش يگور كرۋتويمەن بىرگە جاساپ جاتقان جۇمىستارى جانە رەسەيلىك كومپوزيتورمەن بولاشاققا قۇرعان شىعارماشىلىق جوسپارلارى تۋرالى تولىق اقپارات بەردى. بريتاندىق تانىمال فوتوگراف مايكل دونالد ديماش قۇدايبەرگەن ءۇشىن فوتوسەسسيا جاسادى. مايكلدىڭ جۇمىستارىنىڭ قاتارىندا امەريكالىق كينورەجيسسەر مارتين سكورسەزدىڭ, «The Rolling Stones» روك-توبىنىڭ ۆوكاليستى ميك دجاگگەردىڭ, برازيليالىق فۋتبولشى پەلە مەن باسقا دا اتاقتى ادامداردىڭ فوتوسۋرەتتەرى بار.
سونداي-اق, وسى كۇندەرى ءانشى ۇلىبريتانياداعى «World History Archive» باس ديرەكتورى الەكساندر گولدبەرگپەن كەزدەستى. الەكساندر ديماش قۇدايبەرگەن تۋرالى اۆتوبيوگرافيا جازۋدى جوسپارلاپ وتىر. كەزدەسۋ جانعا جايلى جاعدايدا ءوتتى, ول ديماشقا قازاق دومبىراشىسى بەينەلەنگەن فوتوسۋرەتتى سىيعا تارتتى. بۇل جۇمىستىڭ اتاۋى جوق. الايدا, ول 1890 جىلى جاسالعانى بەلگىلى.
قازاقستاندىق تەڭدەسسىز ءانشىنىڭ شىعارماسى تىلشىلەردىڭ عانا ەمەس, ۇلىبريتانيالىق جۇلدىزداردىڭ دا قىزىعۋشىلىعىن تانىتتى. كونتسەرت كورەرمەندەرى قاتارىندا جەرگىلىكتى جۇلدىزدار دا بولدى. ديماش ونەر كورسەتكەن كۇنى انشىگە قولداۋ كورسەتۋ ءۇشىن, انگلياعا اتاعى جايىلعان ءانشى تاليا ستورم كەلدى. ول دوستارىمەن بىرگە ديماشتىڭ الداعى كونتسەرتىنە ساتتىلىك تىلەدى. انگليالىق ءانشى كونتسەرت بارىسىن ءوز اككاۋنتىنا جازىلعاندارعا ارناپ, الەۋمەتتىك جەلىدەگى پاراقشاسىندا كورسەتتى. كونتسەرتتەن سوڭ ولار حات الماسىپ, ارالارىندا دوستىق بايلانىس باستاۋ الدى.
لوندونداعى ەستەن كەتپەس كۇندەردەن سوڭ, ديماش قۇدايبەرگەن وتانىنا ورالدى. 19 قاراشادا لوندوندا ديماش قۇدايبەرگەننىڭ العاشقى جەكە كونتسەرتى - «DQ» بىرەگەي شوۋى وتكەنىن ەستەرىڭىزگە سالامىز. "Indigo at the O2" كونتسەرت زالى تولىعىمەن تولتىرىلدى, ال كورەرمەندەر الەمنىڭ 45 ەلىنەن كەلدى.