اۋپىلدەك قۇسى نەگىزىنەن كولبۇقالار تۋىسى بولىپ ەسەپتەلەدى. ولار وزەندەر مەن كولدەردى جانە قالىڭ قامىس اراسىن مەكەندەيدى. قازاقستاندا قۇستىڭ بۇل ءتۇرى كەزدەسپەگەنىمەن, ماماندار اۋپىلدەكتىڭ ەلىمىز ارقىلى ۇشىپ وتەتىنىن ايتادى.
جالپى, اۋپىلدەك ۇعىمى حالقىمىزعا جات ەمەس. «قامىسى اۋپىلدەكتىڭ مۇشە-مۇشە, سارعايدىم وسىناۋ كولدىڭ سۋىن ىشە. قوس قانات قۇسقا بىتكەن, ماعان بىتسە, بارار ەم قالقاجانعا الدەنەشە» دەپ باستالاتىن حالىق ءانى دە بار. جاقىندا عانا اۋپىلدەك قۇستىڭ اۋليەاتا وڭىرىنە وقىستان كەلگەنى جايلى حابار ەستىدىك. قىزىقتى حابار كوپشىلىككە دە تاڭسىق كورىنگەنى راس.
تاراز قالاسىنداعى «فەنيكس» قوناقۇيىنىڭ اۋلاسىنا بەلگىسىز قۇس كەلىپ قونادى. بۇل تۋرالى العاشقى اقپاراتتى قوناقۇي يەسى ا.مارالوۆا ەلىمىزدىڭ اۋىل شارۋاشىلىعى مينيسترلىگىنە قاراستى ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز حاتشىسى س.دىلداحمەتوۆكە جەتكىزەدى. ناتيجەسىندە جامبىل وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى جانۋارلار دۇنيەسى جانە اڭشىلىق شارۋاشىلىعى ءبولىمىنىڭ ماماندارى ج.دۇيسەنباەۆا, س.مىنتۇرعانوۆ, تاراز قالالىق ۆەتەريناريا قىزمەتى ينسپەكتسياسىنىڭ باس مامانى ا.سۇگىرباەۆ جەدەل ارەكەتكە كوشىپ, اتالعان قۇستىڭ رەسەي مەملەكەتىنىڭ «قىزىل كىتابىنا» ەنگەن اۋپىلدەك ەكەنىن انىقتاعان. تاراز قالالىق ۆەتەريناريا قىزمەتى ينسپەكتسياسىنىڭ مالىمەتىنشە, اۋپىلدەك ءۇي جانۋارلارى دارىگەرىنىڭ كلينيكالىق تەكسەرۋىنەن وتكىزىلگەن. تەكسەرۋ ناتيجەسىندە جابايى قۇستان ەشقانداي اۋرۋ بەلگىلەرى تابىلماعان.
س.مىنتۇرعانوۆتىڭ ايتۋىنشا, قۇستىڭ قاناتتارى جانە اياقتارى ساۋ. سوندىقتان قۇستىڭ ءوز بەتىنشە ۇشا الاتىندىعى تۋرالى انىقتاما دايىندالعان. «ۇلكەن قۇس تىرشىلىك ورتاسىنا قايتا جىبەرىلدى. قازاقستاندا بۇل قۇس مەكەندەمەيدى. تەك ءبىزدىڭ مەملەكەتىمىز ارقىلى ۇشىپ وتەدى», دەيدى ول.
حاميت ەسامان,
«ەگەمەن قازاقستان»
جامبىل وبلىسى