ەلباسىنىڭ « ۇلى دالانىڭ جەتى قىرى» اتتى ماقالاسى الەمدىك باسىلىمداردىڭ نازارىنان تىس قالمادى. ءباسپاسوز قۇرالدارى مەن اقپارات اگەنتتىكتەرى بۇعان دەيىن جارىق كورگەن «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جالعاسى سانالاتىن ەلباسىنىڭ جاڭا ماقالاسىنداعى قازاق حالقىنىڭ كوپ عاسىرلىق مۇراسىن جاڭعىرتۋعا مۇمكىندىك بەرەتىن جاڭا جوبالارى مەن تاريحتان سىر شەرتەتىن ويلارىنا توقتالعان.
ماسەلەن, تۇركيانىڭ «VATAN» گازەتى ەلباسىنىڭ « ۇلى دالانىڭ جەتى قىرى» ماقالاسىنداعى تۇركى الەمىنە بايلانىستى ويلارىمەن ءبولىستى.
«مەملەكەت باسشىسى نۇرسۇلتان نازارباەۆ « ۇلى دالانىڭ جەتى قىرى» ماقالاسىندا قازاقستاننىڭ تۇركىلەردىڭ اتاجۇرتى بولعانىن اتاپ ءوتىپ, تاريحىمىزدا ورىن العان ەلەۋلى وقيعالاردا ۇلكەن ۇلەسى بار تۇركى حالىقتارىنىڭ جەر شارىنىڭ ءتۇرلى تاراپىنا قازاقستاننان اتتانعانى تۋرالى جازعان.
«تۇركى وركەنيەتى: ءتۇپ تامىرىنان قازىرگى زامانعا دەيىن» اتتى جوباcىن قولعا الۋ كەرەگىن ايتقان نازارباەۆ وسى ماقساتتا 2019 جىلى استانادا تۇركولوگتاردىڭ دۇنيەجۇزىلىك كونگرەسىن جانە ءارتۇرلى ەلدەر مۋزەيلەرىنىڭ ەكسپوزيتسيالارىنا ەجەلگى تۇركى جادىگەرلەرى قويىلاتىن تۇركى حالىقتارىنىڭ مادەني كۇندەرىن ۇيىمداستىرۋ كەرەگىن نازارعا العان.
«سونىمەن قاتار تۇركىستاندى جاڭا وبلىس ورتالىعى رەتىندە دامىتۋ ارقىلى ونىڭ حالىقارالىق ارەناداعى بەدەلىن جۇيەلى تۇردە ارتتىرۋ قاجەت», دەگەن نازارباەۆ تۇركىستاننىڭ تەك قازاقستاننىڭ رۋحاني ورتالىعى ەمەس, كۇللى تۇركى الەمىنىڭ قاسيەتتى مەكەنى ەكەنىن ايتىپ ءوتتى. ودان بولەك ۆيكيپەديا ۇلگىسىندە تۇركى حالىقتارىنا ورتاق تۋىندىلاردىڭ بىرىڭعاي ونلاين كىتاپحاناسىن اشۋ ماڭىزدىلىعىن ەسكەرگەن. بۇل جوباعا قازاقستان جەتەكشىلىك ەتە الاتىنىن ايتادى», دەلىنگەن گازەت ماقالاسىندا.
ال رەسەيلىك «REGNUM» اقپاراتتىق اگەنتتىگى تۇركىستان قالاسىندا «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي-تەوريالىق كونفەرەنتسيا وتكەنىن ەسكە سالا وتىرا, ەلباسى ماقالاسىنان ۇزىندىلەرمەن بولىسكەن.
«اتاقتى تاريحي تۇلعالارىمىز بەن ولاردىڭ جەتىستىكتەرىنىڭ قۇرمەتىنە اشىق اسپان استىندا ەسكەرتكىش-مۇسىندەر قويىلاتىن « ۇلى دالانىڭ ۇلى ەسىمدەرى» اتتى وقۋ-اعارتۋ ەنتسيكلوپەديالىق ساياباعىن اشۋ ماسەلەسىن, تاعى باسقا وزەكتى جوبالاردى قولعا الۋدى ۇسىنعان « ۇلى دالانىڭ جەتى قىرى» اتتى نۇرسۇلتان نازارباەۆتىڭ ماقالاسى جارىق كوردى», دەيدى رەسەيلىك جاڭالىق حابارشىسى.
«ەۆرازيا ەكسپەرت» ەۋرازيا ايماعىنىڭ اقپاراتتىق-اناليتيكالىق باسىلىمى ەلباسىنىڭ اۆتورلىق ماقالاسىنا نەگىز بولعان ۇلى دالانىڭ جەتى قىرىنا جەكە توقتالىپ, ولاردى دارىپتەۋ مەن قۇندىلىعىن ساقتاۋ ماقساتىندا ۇسىنىلعان جوبالار تۋرالى ايتىپ وتكەن. «نۇرسۇلتان نازارباەۆ تۇركى الەمىنىڭ تال بەسىگى, قىزعالداقتار مەن المانىڭ وتانىنا اينالعان قازاقستاننىڭ جەتى قىرى رەتىندە اتقا ءمىنۋ مادەنيەتىن, قازاق دالاسىنداعى ەجەلگى عاسىرداعى مەتاللۋرگيانى, اڭ ءستيلىن, 1969 جىلى ەسىك قورعانىندا تابىلعان التىن ادامدى قاراستىرعان», دەلىنگەن ماقالادا.
تاريحي سانانى جاڭعىرتۋ ماقساتىندا «ارحيۆ-2025», « ۇلى دالانىڭ ۇلى ەسىمدەرى», استانادا وتەتىن تۇركولوگتاردىڭ دۇنيەجۇزىلىك كونگرەسى, « ۇلى دالا» اتتى ەجەلگى ونەر جانە تەحنولوگيالار مۋزەيى ۇيىمداستىرىلاتىنىن, وتاندىق تەلەۆيزيا مەن كينو ونەرىندە سەرپىلىس جاساۋ ماسەلەسى كوتەرىلگەنى دە ايتىلىپ وتكەن.
دايىنداعان سۆەتلانا عالىمجانقىزى,
«ەگەمەن قازاقستان»