«سەرپىن» رەسپۋبليكالىق كاسىبي شەبەرلىك بايقاۋى ءوتتى

بايقاۋدىڭ ۇيىمداستىرۋ­شىسى, ءبىلىم جانە عىلىم مي­نيسترلىگى جانىنداعى «بولون پروتسەسى جانە اكادەميالىق ۇت­قىر­لىق ورتالىعى» توراعاسى­نىڭ ورىنباسارى ايدوس مۇقا­تاەۆتىڭ ايتۋىنشا, بۇل كۇندەرى «سەرپىن» الەۋمەتتىك جوباسى بويىنشا ەلى­مىزدىڭ 9 وبلىسىنداعى 26 جو­عارى وقۋ ورنى مەن 33 تەح­نيكالىق جانە كاسىپتىك ءبىلىم بە­رۋ كوللەدجىندە 16 مىڭعا جۋىق ستۋدەنت ءبىلىم الۋدا. بىلتىر ال­عاشقى تۇلەكتەرى ديپلوم الىپ, ولار­دىڭ 60 پايى­زى سول ءبىلىم ال­عان وڭىرلەرىندە جۇمىسقا ورنالاسقان. 

− «مەنى شىڭداعان «سەرپىن» اتتى رەسپۋبليكالىق كاسىبي شە­بەر­لىك بايقاۋى ءۇشىنشى رەت وتكى­زىلۋدە. بىلتىر سولتۇستىك قازاق­ستان وبلىسىندا ءوتتى. باي­قاۋعا جوعارى وقۋ ورىندارى مەن كول­لەدجدەردىڭ 3, 4-كۋرس ستۋ­دەنت­تەرى قاتىستى. ماقسات – ءوز سالاسىنىڭ ۇزدىكتەرىن انىق­تاۋ. بايقاۋ سوڭىندا قاتىسۋ­شىلار ءارتۇرلى وندىرىستىك كاسىپورىن­دار­عا جۇمىسقا جولداما الۋى­نا مۇمكىندىك بار. بايقاۋعا وڭىر­دەگى كاسىپورىن وكىلدەرى دە شا­قىرىلدى, − دەيدى ا.مۇقاتاەۆ. 

وبلىستىق ءبىلىم بەرۋ باسقار­ماسى باسشىسىنىڭ ورىنباسارى ساۋلە الياقپاروۆانىڭ ايتۋىنشا ارينە العاشقى جىل­دارى بۇل جوبا بويىنشا پەدا­گو­گيكالىق ماماندىقتار عانا وقى­تىلعان بولسا, قازىر بۇل قا­تارعا تەحنيكالىق جانە اۋىل شا­رۋا­شىلىعى ماماندىق­تارى قوسىلدى. ءسويتىپ ەلىمىزدىڭ ءار وڭى­رى­نەن كەلگەن ستۋدەنتتەر «سەرپىن» باعدارلاماسى ارقى­لى ەڭبەك نارىعىنداعى سۇرا­نىس­قا يە ماماندىقتارعا دايارلانۋدا. ياعني ستۋدەنت جاستار وندىرىستىك-تەحنيكالىق, كاسىپتىك سالالارعا قاراي بەيىمدەلۋدە. قازىر ءوڭىردىڭ 8 كوللەدجىندە 464 ستۋدەنت ءبىلىم الۋدا. بيىلعى باي­قاۋعا پاۆلودار, شىعىس قازاق­ستان, باتىس قازاقستان, سول­تۇس­تىك قازاقستان, اقمولا جانە قارا­عاندى وبلىستارىنان تەحنيكالىق جانە كاسىپتىك ءبىلىم بەرەتىن كوللەدجدەردەن 27 ستۋدەنت قاتىستى.

 بايقاۋدىڭ شارتى بويىنشا, ستۋدەنتتەر ءبىرىنشى كەزەڭدە وز­دەرىنىڭ ءبىلىم دەڭگەيلەرىن كور­سەت­سە, ەكىنشى كەزەڭدە كول­لەدج­دەردە جانە جەكە كاسىپورىندارعا بارىپ, راديوتەحنيكا, ەلەكترونيكا, كو­لىك جانە تەلەكوممۋنيكا­تسيا, اس­پازدىق, ازىق-ت ۇلىك ونىمدەرى تەح­نولوگياسى, اقپاراتتىق جۇيە, مال­شارۋشىلىعى ونىمدەرىن ءوندىرۋ تەحنولوگياسى سالالارى بويىنشا تاجىريبەلىك سىناقتان ءوتتى. 

تەوريالىق كەزەڭ س.توراي­عىروۆ اتىنداعى پاۆلودار مەم­لەكەتتىك ۋنيۆەرسيتەتىندە وتسە, پراكتيكالىق تاجىريبە الاڭى اگرارلىق-تەحنيكالىق, بيزنەس, تەحنولوگيا كوللەدجدەرىندە, اقتوعاي اۋداندىق اگرارلىق كوللەدجىندە جانە «جاڭا قالا» شارۋا قوجالىعىندا ءوتتى. ستۋ­دەنتتەر تاماق ازىرلەۋ, مالشارۋا­شىلىعى ونىمدەرىن ءوندىرۋ, اۋىل­شارۋاشىلىعىن مەحانيكالاندىرۋ, ەسەپتەۋ تەحنيكاسى جانە باعدارلامالىق قامتاماسىز ەتۋ, تاماقتاندىرۋ كاسىپورىندارى ونىمىندەرىنىڭ تەحنولوگياسى جانە ءوندىرىستى ۇيىمداستىرۋ», «ەكو­لوگيا جانە تابيعاتتى قور­عاۋ قىز­مەتى», «ۆەتەريناريا», «اۋىل­شارۋاشىلىعىن مەحانيكا­لان­دىرۋ» سياقتى سالالارداعى ءبىلىمىن ناقتى جوبالارى ارقىلى كورسەتە ءبىلدى. 

ش.ءۋاليحانوۆ اتىنداعى كوك­­شە­­تاۋ مەملەكەتتىك ۋنيۆەر­سيتەتى­نىڭ 4-كۋرس ستۋدەنتى اسەت يبراەۆ  «سەرپىندىكتەردى» شىڭ­داي­تىن سايىسقا قاشىقتىقتان ءبىلىم بەرۋ جۇيەسىنىڭ قازىرگى زامانعا ساي داعدىلانعان نۇسقا­سىن الىپ كەلىپتى. كەلەر جىلدان باستاپ ەلى­مىزدەگى كەيبىر جوعارى وقۋ ورىن­دارى قاشىقتىقتان ءبىلىم بەرۋ جۇيەسىنە كوشپەك. وسى جاڭا­شىل­دىققا سەرپىندىك ستۋدەنتتەر جاڭا جوبالارىمەن ۇلەس قوسپاقشى. 

– پاۆلودارعا العاشقىدا, 2014 جىلى 50 بالا عانا كەلدى. ولار­دىڭ قادامدارى ءساتتى بولىپ, 2015 جىلى 175 ستۋدەنت وقۋعا تۇسسە, 2016 جىلى – 185, 2017 جىلى 200 بالا قابىلداندى. تۇركىستان وبلىسىنان − 258, قىزىلوردادان − 209, جامبىلدان − 32, الماتى وبلىسىنان − 4, ماڭ­عىستاۋ وبلىسىنان 2 جاس كەل­دى. بىلتىر «سەرپىنمەن» كەلگەن جاستار­دىڭ العاشقى لەگى وقۋ ءبىتىرىپ, 65 تۇلەك قولدارىنا ديپ­لوم الدى. بىراق, وكىنىشتىسى, ءۇش جىلدىڭ ىشىندە 40-تاي ستۋدەنت ءتۇرلى سە­بەپ­تەر بويىنشا وقۋلارىن سو­ڭى­نا دەيىن جەتكىزە الماي شى­عىپ كە­تىپتى. كاسىپتىك جانە تەح­نيكا­لىق ءبىلىم بەرۋ ءبولىمى ما­مانى سامال وبازوۆانىڭ ايتۋىن­شا, وقۋ بىتىرگەن «سەرپىندىك» جاس­تار وڭى­رى­مىزدەگى ء«سۇت» اق, «ساعىپ» جشس, مويىلدى شي­پا­جايىندا, باس­قا دا جەكە كاسىپ­ورىندار مەن بىر­نە­شە مەيرامحانادا ءوز ما­مان­دىق­­تارى بويىنشا ەڭبەك ەتۋدە. ولار­­دىڭ اراسىندا ءبىلى­مىن جو­عارىلاتۋ ماق­ساتىندا ۋني­ۆەر­سيتەتكە تۇس­كەندەرى دە بار. 

وبلىستىق جاستار ساياساتىن دامىتۋ باسقارماسى جانىنداعى «جاستار باستامالارىن دامىتۋ ورتالىعىنىڭ» مالىمەتىنشە, بىلتىر س.تورايعىروۆ اتىندا­عى مەملەكەتتىك ۋنيۆەرسيتەتتە, ەۋرا­زيالىق يننوۆاتسيالىق ۋنيۆەرسيتەتكە جانە پەداگوگيكالىق ۋني­ۆەرسيتەتكە وڭتۇستىك وڭىر­لەر­دەن 400-دەي ستۋدەنت تۇسكەن. 

ءبىر وكىنىشتىسى, وبلىستىق ءبىلىم بەرۋ باسقارماسىنىڭ مالى­مەتىنشە, «سەرپىن» باعدار­لاماسى بويىنشا 135 تۇلەك وقۋ بىتىرگەن. بىراق وڭىردە ءبىلىم العان 47 جاس بيىل وزدەرى تۋىپ-وسكەن اۋىلدارىنا قايتا ورالىپتى. جاستار تەگىن جاتاقحانا, شاكىرتاقى, قىسقى جازعى كيىم, قىسقى جانە دەمالىس كەزىندە ۇيگە بارىپ-كەلۋ ءۇشىن جولاقىمەن قامتاماسىز ەتىلدى. الايدا, جاستاردىڭ ءوز وڭىرلەرىنە كەتىپ قالۋلارىنا بىردەن-ءبىر سەبەپ – باسپانا, ءۇيدىڭ جوقتىعى. پاۆ­لودار بيزنەس كوللەدجىنىڭ ستۋ­دەنتى اياجان شەرىنىڭ ايتۋىنشا, بۇرىن جولاقىسىنا 11 مىڭ تەڭگە بەرىلسە, قازىر بۇل قارجى 4 مىڭ تەڭگەگە دەيىن تومەندەپتى. پاۆ­لو­­داردان شىمكەنتكە جۇرە­تىن پو­يىز بيلەتىنىڭ قۇنى – 6500 تەڭگە.

كەلەر جىلى 174 ستۋدەنت كول­لەدج بىتىرەدى. سوندىقتان قازىر­دەن باستاپ بوس جۇمىس ورىندارى جارمەڭكەلەرى وتكىزىلىپ, مەم­لە­كەتتىك مەكەمەلەر مەن اكىمدىك­تەردىڭ جانە ءوندىرىس وكىلدەرىمەن كەلىسىسوزدەر جۇرگىزىلۋى قاجەت. 

ەلباسى نۇرسۇلتان نازارباەۆ بىلتىر وبلىسقا كەلگەن ساپارىندا «سەرپىن-2050» باعدارلاماسى بويىنشا وقىپ جاتقان جاس­تار­مەن كەزدەسكەن بولاتىن. سوندا «ەلىمىزدىڭ بولاشاعى – جاس­تار­دىڭ قولىندا. مەن وقىعان كەز­دە وسى تەكتەس جاتاقحانالار بول­عان جوق. سىزدەرگە قولايلى جاع­داي جاسالعان, وقىڭىزدار» دەپ قولداپ, جىگەرلەندىرگەن ەدى. 

ءيا, ەلباسى ۇسىنعان «سەرپىن-2050» باعدارلاماسى 2014 جىلدان بەرى جۇزەگە اسۋدا. وسى جىلدار ارالىعىندا وب­لىسقا وڭتۇستىكتەن 1324 ستۋدەنت ءبىلىم الۋعا كەلىپتى. كاسىپتىك جانە تەحنيكالىق ءبىلىم بەرۋ كول­لەدج­دەرىنە ءتورت جىلدا 610 ستۋدەنت قابىلدانعان. بۇل كۇندەرى ەلىمىزدىڭ ءار وڭىرىنەن كەلگەن ستۋدەنتتەر «سەرپىن» باعدارلاماسى ارقىلى ەڭبەك نارىعىنداعى سۇرانىسقا يە ماماندىقتارعا دايارلانۋدا. ياعني ستۋدەنت جاستار وندىرىستىك-تەحنيكالىق, كاسىپتىك سالالارعا قاراي بەيىمدەلۋدە. 

جالپى, «سەرپىن-2050» جوبا­­سى­نىڭ ماقساتى – وڭتۇستىك وبلىس­تاردىڭ جاستارىنا سولتۇستىك وڭىرلەردەگى جوعارى وقۋ ورىندارىندا ءبىلىم الۋعا, جۇمىسقا ور­نالاسۋعا جاعداي جاساۋ, وڭىردە بوس قا­لىپ بارا جاتقان اۋىلدارعا ەل قون­دىرۋ, ۇلتتىڭ بولاشاعى, قا­زاق­­تىڭ دەموگرافيالىق ءوسىم ماسە­­لەسىنە باستى نازار اۋدارتادى. 

فاريدا بىقاي,

«ەگەمەن قازاقستان» 

پاۆلودار وبلىسى