«استانا» سوڭعى ساتتە جەڭىسكە جەتتى

ويىن الما-كەزەك شابۋىلمەن باستالدى. ماتچتىڭ 18-مينۋتىندا جارتىلاي قورعاۋشى باحتيەر زاينۋتدينوۆ ايىپ الاڭىنا پاس بەردى. ۇرىمتال تۇستان شىعا كەلگەن پەدرو ەنريكە دوپتى قاقپاعا ءدال باعىتتادى. ەسەپ 1:0.

الايدا ءبىرىنشى تايمدا ەلوردالىقتار باسىمدىقتى ۇستاپ تۇرا العان جوق. «يابلونەتس» كلۋبىنىڭ ويىنشىلارى بۇرىشتاما دوبىن تەۋىپ, قاربالاس ءساتتىڭ بىرىندە ب.زاينۋتدينوۆ دوپتى بايقاماستان ءوز قاقپاسىنا كىرگىزىپ الدى. بۇدان كەيىن ەسەپ وزگەرمەي, ءبىرىنشى كەزەڭ تەڭ اياقتالدى.

ەكىنشى تايمدا دا كوماندالار جەڭىسكە جەتۋگە بارىن سالعان. ويىن بىتۋىنە 2 مينۋت قالعاندا «استانا» كلۋبىنىڭ قورعاۋشىسى ەۆگەني پوستنيكوۆ گول سوعىپ, كومانداسىن جەڭىسكە جەتەلەدى. وسىلايشا, ماتچ 2:1 ەسەبىمەن اياقتالعانىنا قاراماستان, ءۇش گولدى دا استانالىقتار سوقتى.

«ك» توبىنىڭ ءتورتىنشى تۋرىنان كەيىن «استانا» كلۋبى 8 ۇپايمەن توپ باستاپ تۇر. ءدال قازىر وسى توپتاعى قالعان ەكى كوماندا – جەرگىلىكتى «دينامو» مەن «رەنن» كيەۆتە شەبەرلىك بايقاسىپ جاتىر.

كەلەسى تۋر ويىندارى 29 قاراشادا وتەدى. «استانا» ءوز الاڭىندا كيەۆتىك «دينامومەن» كۇش سىناسادى. ال سوڭعى تۋردا, 13 جەلتوقساندا ەلوردالىق كوماندا «رەننمەن» كەزدەسەدى.