كانادانىڭ كالگاري قالاسىندا شورت-ترەكتەن الەم كۋبوگىنىڭ ءبىرىنشى كەزەڭى اياقتالدى. بۇل سايىستا قازاقستاندىق ابزال اجىعاليەۆ كۇمىس مەدالعا يە بولدى, دەپ حابارلايدى Olympic.kz.
جاڭا ماۋسىمداعى العاشقى ءىرى حالىقارالىق جارىس قازاقستان كومانداسى ءۇشىن ءساتتى ءوتتى. بۇل سايىستا قازاقستاندىق سپورتشىلار الەمدىك دەڭگەيدە جوعارى ورىندارعا شىعۋعا دايىن ەكەندىكتەرىن كورسەتتى.
وسى تۇستا ابزال اجىعاليەۆتىڭ 500 مەتر قاشىقتىقتا ونەر كورسەتۋىن ەرەكشە اتاۋعا بولادى. ول وليمپيادا چەمپيونى قىتايلىق داتسزينگە عانا (39.915) جول بەرىپ, كۇمىس مەدالدى جەڭىپ الدى. ايتپاقشى, ابزال كورسەتكەن 40.136 سەۋندتىق ناتيجە قازاقستاننىڭ جاڭا رەكوردى بولىپ تابىلادى. ال سايىستا ءۇشىنشى ورىندى ۆەنگريادان كەلگەن شاندور ليۋ يەلەندى.
"ماۋسىمنىڭ باستالۋى ءساتتى بولدى. ءبىرىنشى كۇنى جارتىلاي فينالعا دەيىن جەتتىم, بىراق وكىنىشكە وراي, مەدال الا المادىم. ءبىرىنشى كەزەڭنىڭ سوڭعى كۇنىندە فينالعا جەتىپ, ەكىنشى ورىن الدىم. اقتىق سىندا ءۇش وليمپيادا چەمپيونىمەن جۇگىردىم. ماۋسىم ەندى باستالدى, مەن ءالى جەڭىستەرىممەن قۋانتامىن دەپ ۇمىتتەنەمىن", - دەدى اجىعاليەۆ.
1000 مەتر قاشىقتىقتا باستى فينالعا ەركەبۇلان شامۇحانوۆ شىقتى. ونىڭ قورىتىندى ناتيجەسى بەسىنشى ورىندى كورسەتتى. ال فينالعا ەكى ەستافەتالىق كوماندا- ايەلدەر جانە ارالاس كوماندالار قاتىستى. ەكەۋى دە بارلىق قاتىسۋشى قۇرامداردىڭ اراسىندا بەسىنشى ورىنعا يە بولدى. ايەلدەر كومانداسىن اناستاسيا كرەستوۆا, اسەل تايشمانوۆا, ولگا تيحونوۆا جانە يونگ ا كيم تانىستىرسا, ارالاس قۇرامدا ابزال اجىعاليەۆ, دەنيس نيكيشا, اناستاسيا كرەستوۆا, يونگ ا كيم ونەر كورسەتتى.
الداعى كۇندەرى اقش-تا وتەتىن ەكىنشى كەزەڭگە اجىعاليەۆ قاتىسپايدى. وندا كوماندانىڭ تەك ءبىر بولىگى عانا جول تارتادى. الەم كۋبوگىنىڭ ەكىنشى كەزەڭى 9-11 قاراشادا سولت-لەيك-سيتيدە وتەدى. ال اتالعان الەم كۋبوگىنىڭ ءۇشىنشى كەزەڭى 7-9 جەلتوقساندا الماتىدا ۇيىمداستىرىلادى.