اتىراۋ ايماعىنىڭ تىنىس-تىرشىلىگىن قالىڭ وقىرمانعا جەتكىزىپ كەلە جاتقان وبلىستىق گازەتتىڭ وسىدان 95 جىل بۇرىن العاشقى ءنومىرى شىققان بولاتىن. مەرەيلى داتاعا بايلانىستى شارالار وبلىس ورتالىعىنداعى جۇمەكەن ناجىمەدەنوۆ پەن فاريزا وڭعارسىنوۆانىڭ ەسكەرتكىشتەرىنە گۇل شوقتارىن قويۋ راسىمىمەن باستالدى.
«اتىراۋ» گازەتىنىڭ مەرەيتويىنا وراي «اتىراۋ-اقپارات» ورتالىعىندا مەديا-مۋزەي مەن ينتەرنەت-كانال اشىلدى.
اتىراۋ جۋرناليستيكاسىندا تۇڭعىش رەت اشىلعان مەديا-مۋزەيگە 400-گە جۋىق جادىگەر قويىلدى. «شەجىرەلەر سىر شەرتەدى», «جۋرناليست – وقيعا ورتاسىندا», «تاريحى تەرەڭ ءتولارنا» اتتى 3 بولىمنەن تۇراتىن مۋزەيدە ەكى وبلىستىق, جەتى اۋداندىق گازەت پەن وبلىستىق تەلەارنانىڭ شەجىرەلى جولى تۋرالى مالىمەتتەر بار.
«اتىراۋ» گازەتىنىڭ 95 جىلدىق مەرەيتويىنا ارنايى كەلگەن قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت پەن «اتىراۋ» گازەتىندە كوپتەگەن جىلدار رەداكتورلىق قىزمەت اتقارعان قيلىباي قۋانىشباي ۇلى مەديا-مۋزەيدىڭ سالتاناتتى اشىلۋ لەنتاسىن قيدى.
– بۇگىن ءبىز تاعى دا ەرەكشە وقيعانىڭ كۋاسى بولىپ تۇرمىز. بۇل مۋزەي – 95 جىلدىق تاريحى بار گازەتتىڭ عانا ەمەس, بۇكىل وبلىستىڭ شەجىرەسى. وسى ءوڭىر ءۇشىن تەرىن توككەن, كوزىنىڭ مايىن تاۋىسقان قاجىر-قايراتىن جۇمساعان ادامداردىڭ تىنىس-تىرشىلىگى – وسى مۋزەيدە. ونىڭ ار جاعىندا وبلىستىڭ ەكونوميكاسى عانا ەمەس, ادەبيەتىمىز بەن مادەنيەتىمىز دە تۇر. مەديا-مۋزەي كەلەشەك ۇرپاقتار ءۇشىن ۇلكەن قىزمەت اتقاراتىنا سەنىم بىلدىرەمىن, – دەدى قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت.
مەديا-مۋزەيدە العىس حاتتار, تانىمال تۇلعالاردىڭ قولجازبالارى, ارداگەر جۋرناليستەردىڭ فوتوسۋرەتتەرى مەن قۇرالدارى قويىلعان. سونداي-اق, «اتىراۋ» تەلەارناسىندا 1967 –1977 جىلدارى قىزمەت ەتكەن جۋرناليستەردىڭ فوتوسۋرەتتەرى ىلىنگەن قابىرعا جانە «اتىراۋ-اقپارات» باسپاحاناسىنىڭ ونىمدەرى دە بار.
«اتىراۋ-اقپارات» مەديا پورتالى دا بۇگىن رەسمي تۇردە اشىلدى. مۇندا جۋرناليستەرگە بارلىق مۇمكىندىك قاراستىرىلعان.
مەرەكەلىك شارا اياسىندا وتكەن «قازىرگى قازاق جۋرناليستيكاسى: جاڭا ترەندتەر مەن تەحنولوگيالار» تاقىرىبىنداعى رەسپۋبليكالىق مەديا-كونفەرەنتسيادا وبلىس اكىمى نۇرلان نوعاەۆ اتاۋلى كۇنمەن قۇتتىقتاپ, تابىس تىلەدى.
«اتىراۋدىڭ» 95 جىلدىعىنا ارنالعان شارالار لەگى «ۇلتقا–مۇرا, ۇرپاققا – رۋح!» اتتى تاريحي-تانىمدىق ەكسپەديتسيامەن جالعاسادى.
باقىتگۇل باباش,
«ەگەمەن قازاقستان»
اتىراۋ