ەلباسى نۇرسۇلتان نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا لاتىن الىپبيىنە كوشۋدىڭ ماڭىزدىلىعى جونىندە ايتقان ەدى. «بىرىنشىدەن, قازاق ءتىلىن بىرتىندەپ لاتىن الىپبيىنە كوشىرۋ جۇمىستارىن باستاۋىمىز كەرەك. ءبىز بۇل ماسەلەگە نەعۇرلىم دايەكتىلىك قاجەتتىگىن تەرەڭ ءتۇسىنىپ, بايىپپەن قاراپ كەلەمىز جانە وعان كىرىسۋگە تاۋەلسىزدىك العاننان بەرى مۇقيات دايىندالدىق», دەگەن بولاتىن ەلباسى. وسى ورايدا ەلىمىزدىڭ ءاربىر وڭىرىندە تىڭ باستامالار مەن جوبالار قولعا الىنىپ, حالىققا ءتۇسىندىرۋ جۇمىستارى ۇيىمداستىرىلدى.
جامبىل وبلىسىتىق ىشكى ساياسات باسقارماسىنىڭ ۇيىمداستىرۋىمەن تاراز يننوۆاتسيالىق-گۋمانيتارلىق ۋنيۆەرسيتەتىنىڭ ءماجىلىس زالىندا «لاتىن ءالىپبيى – ەل ەرتەڭى» اتتى دوڭگەلەك ۇستەل ءوتتى. اتالعان باسقوسۋعا ەلىمىزگە تانىمال عالىمدار, ءتىل ماماندارىمەن قاتار وبلىستىڭ زيالى قاۋىم وكىلدەرى, ۋنيۆەرسيتەت وقىتۋشىلارى جانە ستۋدەنتتەر قاتىستى. جيىندى باسقارما باسشىسى بەرىك قۇرمانعالي اشىپ, جۇرگىزىپ وتىردى.
جيىن بارىسىندا ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك, تۇركيانىڭ كارابيۋك ۋنيۆەرسيتەتىنىڭ وقىتۋشىسى, فيلولوگيا عىلىمدارىنىڭ دوكتورى, پروفەسسور ەنۆەر قاپاعان, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى, پروفەسسور, فيلولوگيا عىلىمدارىنىڭ دوكتورى جانتاس جاقىپوۆ, ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ورفوگرافيا ءبولىمىنىڭ باسشىسى قۇرالاي كۇدەرينوۆا مەن استانا قالاسىنىڭ تىلدەردى دامىتۋ جانە ارحيۆ ءىسى باسقارماسى «رۋحانيات» مەكەمەسىنىڭ باسشىسى ەرجان ەڭسەباي ۇلتتىق ءالىپبي ۇلگىسىن جاساۋداعى اتقارىلىپ جاتقان جۇمىستار تۋرالى كەڭىنەن باياندادى.
سونىمەن قاتار, عالىمدار قاتىسۋشىلاردىڭ ساۋالدارىنا دا جان-جاقتى جاۋاپ بەردى. ءوز سوزىندە جيىنعا قاتىسۋشى عالىمدار لاتىن الىپبيىنە كوشۋدىڭ تيىمدىلىگىن, زامان تالابى ەكەنىن دە جەتكىزدى.
حاميت ەسامان,
«ەگەمەن قازاقستان»
جامبىل وبلىسى