سۋرەتتىڭ قۇدىرەتى نەدە؟.. كوڭىل تۇكپىرىندە جاسىرىنعان ءتىل جەتكىزە الماس كوركەم وي مەن ۇشقىر قيالدى قىلقالام ۇشىنا سىيدىرا الۋدا, بىزدىڭشە. ايتسە دە بوياۋ تامعان كەنەپتىڭ بارلىعى ونەر ەمەس. ناعىز ونەر – شىنايىلىعىندا. مىنە, وسى ءبىر دارالىق سۋرەتشى الپىسباي قازعۇلوۆ قالامىنا تيەسىلى!
جاقىندا مادەنيەت جانە سپورت مينيسترلىگىنىڭ قولداۋىمەن استاناداعى ۇلتتىق مۋزەيدە قازاقستان رەسپۋبليكاسىنىڭ ەڭبەك سىڭىرگەن قايراتكەرى, بەلگىلى قىلقالام شەبەرى الپىسباي قازعۇلوۆتىڭ «كوڭىل كوكتەمى» اتتى كورمەسىنىڭ سالتاناتتى اشىلۋى بولىپ ءوتتى. كورمەگە «اجەمنىڭ ءۇيى», «اساۋدى اۋىزدىقتاۋ», «شارىن شاتقالىنا شىعۋ», «ىستىق كۇن», «كۇتپەگەن كەزدەسۋ», «دالا اۋەنى» سىندى بارلىعى 140-تان اسا سۋرەت قويىلىپ, تاماشالاۋشىسىن تاڭعاجايىپ الەمنىڭ تۇڭعيىعىنا بويلاتتى.
الپىسباي قازعۇلوۆتىڭ كارتينالارىندا سۋرەتتەلگەن شىنايى ءومىر كورىنىستەرى جاي عانا كوشىرمە ەمەس, ول – حاس شەبەردىڭ قىلقالامىنا عانا ءتان وزىندىك جەڭىل مانەرمەن بەرىلگەن سەزىم مەن سىرعا تولى ناعىز ونەر تۋىندىلارى. سوندىقتان دا بولسا كەرەك, سۋرەتشى شىعارمالارىندا تەرەڭ ءبىلىم, تاعىلىمدى ومىرلىك تاجىريبەمەن قاتار, قىلقالام يەسىنىڭ جان تەبىرەنىستەرى مەن كوركەم الەمى دە سايراپ جاتادى. كاسىبي شەبەرلىگىن ايتپاعاندا, سۋرەتشى كوڭىل كۇيدىڭ اسەم كورىنىستەرىن عالامات ءبىر شەبەرلىكپەن اسەم ۇيلەستىرەدى.
«ماعان وسى ءبىر ادام ۇناپ قالدى: سۋرەتتەرى الداعان جوق – راسىمەن دە زامان تالابىنا, سونداي-اق تولىعىمەن داستۇرگە ساي ويلانادى ەكەن. ونىڭ قىلقالامىنان شىققان تۋىندىلار ءپىشىنى جاعىنان «مودەرنيستىك», الايدا قوزعاعان تاقىرىپتارى باياعىداعىداي. الپىسباي دالا, اۋىل, قورا-قوپسى سىندى تاقىرىپتارمەن شەكتەلگەن سياقتى بولعانىمەن, شىن مانىندە ءوز سۋرەتتەرىنە قانداي دا ءبىر عارىشتىق دەڭگەي بەرە وتىرىپ, ءبىزدىڭ سانامىزدىڭ شەڭبەرىن كەڭەيتە تۇسەدى» دەپ جازىپتى ءوز ەستەلىگىندە شىڭعىس ايتماتوۆ.
راسىمەن دە, ۇلى قالامگەر باعالاپ وتكەندەي, تاماشالاۋشى قيال يەسىنىڭ جۇمىسىمەن العاش تانىسقان ساتىنەن-اق اينىماس دوسقا اينالىپ, بىردەن سىرلاسىپ كەتەدى. سۋرەتشى قانداي جۇمباق بولسا, ءدال سونداي قاراپايىم دا. ونىڭ ەڭبەكتەرىندە سۇلۋلىق پەن تازالىقتىڭ ءيسى اڭقىپ تۇرادى. ءدال تاڭدالىپ, قانىق بەدەرلەنگەن كوركەم الەم كوزدى ارباپ, تۇڭعيىعىنا تارتىپ الا جونەلەدى.
«قىلقالامعا عانا ارناعان وسىناۋ 42 جىلدىق شىعارماشىلىق عۇمىرىمدا بارلىعى 5000-نان اسا كارتينا سالعان ەكەنمىن. بۇل تەك سانى عانا ەمەس, ولاردىڭ ارقايسىسى مازمۇندىق تۇرعىدان سان الۋان. ايتسە دە ادامدا ارمان تاۋسىلعان با؟! اللا عۇمىر بەرسە, ەندى وسى 5000 تۋىندىمدى ون ورايتىن ەڭ ۇزدىك دەگەن كەمىندە 5 كارتينا تۋدىرسام دەيمىن», – دەيدى سۋرەتشى.
راس, ادام بار جەردە ارمان بار. ول اسىرەسە, قيالعا باي سۋرەتشى الەمىندە ءتىپتى بيىك. الپىسباي قازعۇلوۆ شىعارماشىلىعىمەن تانىسىپ, كوڭىل كوكتەمىنە ساياحاتتاپ قايتقان عالامات ساپارىمىزدا ءبىز وسىعان كوز جەتكىزدىك.
P.S: الپىسباي قازعۇلوۆتىڭ «كوڭىل كوكتەمى» كورمەسى قازاقستان رەسپۋبليكاسىنىڭ ۇلتتىق مۋزەيىندە 2018 جىلدىڭ 12 جەلتوقسانىنا دەيىن جالعاسادى.
نازەركە جۇماباي,
«ەگەمەن قازاقستان»