ەرتەڭ كانادانىڭ كۆەبەك شتاتىندا ورنالاسقان لاۆال قالاسىندا مانەرلەپ سىرعاناۋدان گران-پري ءتۋرنيرى وتەدى. ەسىمدەرى تورتكۇل دۇنيەگە تانىمال سپورتشىلارمەن بىرگە ءبىزدىڭ ەليزابەت تۇرسىنباەۆا دا وسى جارىستا ونەر كورسەتەدى.
سوڭعى كەزدەرى ايەلدەر اراسىنداعى سايىستا ايشىقتى ونەرىمەن كوزگە ءتۇسىپ, بىرقاتار ءدۇبىرلى دودادالاردا جەڭىس تۇعىرىنا كوتەرىلگەن سىر بويىنىڭ سۇلۋى بۇل جولى دا جۇلدە الۋدى كوزدەۋدە. ال مايتلامان مامانداردىڭ پايىمداۋىنشا, ۇيەڭكى جاپىراقتار ەلىندەگى جارىستىڭ باستى فاۆوريتتەرى – رەسەيلىك ەۆگەنيا مەدۆەدەۆا مەن جاپونيالىق ۆاكابا حيگۋتي. ارينە, كوپشىلىكتىڭ بۇل ۋاجىمەن كەلىسپەۋ قيىن. ويتكەنى, جوعارىدا اتالعان سپورتشىلاردىڭ ەكەۋى دە وتە مىقتى. ماسەلەن, 18 جاستاعى رەسەيدىڭ وكىلى 2018 جىلى وتكەن وليمپيا ويىندارىندا قوس كۇمىس مەدالدى ولجالاپ, 2016 جانە 2017 جىلدارى الەم چەمپيونى اتاندى. ودان بولەك, ەۆگەنيا ەۋروپا بىرىنشىلىگىندە ەكى رەت توپ جاردى. 17 جاسار جاپونيالىق ارۋدىڭ دا قارقىنى كۇشتى. ول – بيىلعى جىلعى الەم چەمپيوناتىنىڭ كۇمىس جۇلدەگەرى.
دەسەك تە ەليزابەت تۇرسىنباەۆانى دا وسال دەپ ايتۋعا ەشكىمنىڭ اۋزى بارمايدى. 18 جاستاعى جەرلەسىمىز دۇنيەجۇزىلىك جاسوسپىرىمدەر وليمپياداسى مەن ازيا ويىندارىنىڭ قولا جۇلدەگەرى. كانادادا جالاۋى جەلبىرەيتىن جارىستا قازاقتىڭ ارۋ قىزى ەۆگەنيا مەدۆەدەۆا مەن ۆاكابا حيگۋتي سىندى داڭقتى سپورتشىلارعا لايىقتى قارسىلىق كورسەتەدى دەگەن ويدامىز.
عالىم سۇلەيمەن,
«ەگەمەن قازاقستان»