تولەگەن تەرەگى

الاش ازاماتى – تولەگەن يمان­عازيەۆ تۋرالى دەرەكتەردى العاش تاۋىپ, بىرنەشە كىتاپ شىعا­رىپ, اۋىل مەكتەبىنىڭ قابىر­عاسىنا ەسكەرتكىش تاقتا ورناتقان وسى اۋىلدىڭ تۋماسى, بەلگىلى ولكە­تانۋشى, قازاق­ستاننىڭ قۇر­­مەتتى ءجۋرناليسى, قاراتوبە اۋدا­نىنىڭ قۇرمەتتى ازاماتى, اقىن قايىرجان حاسانوۆ بولاتىن. بۇگىندە قايىرجان اعامىز ومىردەن وتسە دە, ۇرپاقتارى كيەلى مەكەن – اتاجۇرتىن ۇمىتپاي, اۋىل تۇر­عىندارىنا تۇراقتى تۇردە قايى­رىمدىلىق شارالارىن جاساپ تۇرادى. بيىل جازدا نۇرجان قايىرجان ۇلى ساۋلە اۋىلىنىڭ سابيلەرىنە ارناپ قۇنى 1,6 ملن تەڭگەلىك بالالار الاڭىن تارتۋ ەتتى. 

سونداي-اق 2018-2019 جاڭا وقۋ جىلى قارساڭىندا «مەكتەپكە جول» اكتسياسى اياسىندا جالپى قۇنى 50 مىڭ تەڭگە بولاتىن كەڭسە زاتتارى مەن وقۋ قۇرالدارىن جەتكىزدى. دە­گەن­مەن ايتايىن دەگەنىمىز بۇل ەمەس. 

مەكتەپ قابىرعاسىنا تولەگەن يمانعازيەۆكە ارنالىپ ەسكەرتكىش تاقتا ورناتىلدى دەدىك. بۇل 2013 جىلعى قىركۇيەك ايى بولاتىن. اۋىل مەكتەبىنىڭ مۇعالىمى اسقار ساپا ۇلىنىڭ ايتۋىنشا, كەلەر جىلى, ياعني 2014 جىلدىڭ كوكتەمىندە مەكتەپ قابىرعاسىنا تاياۋ, ءدال ەسكەرتكىش تاقتا تۇسىنان شىبىق شىعىپ, ءبۇر جارعان! 

– ارنايى ەكسەڭ, تاپ وسىلاي شىقپاس. ول شىبىق قالاي شىقتى, ەشكىم سۋارماي-اق جاپىراق جاي­­عانىنا مەكتەپ ۇجىمى بولىپ تاڭعالدىق. ارداگەر ۇستاز تولەگەن اتامىزدىڭ ارۋاعى ەسىمىن ارداقتاعان ۇرپاقتارىنا, مەكتەپ ۇجىمىنا ريزا شىعار. اتانىڭ ارۋاعى قولداپ شىعارعان اعاش شىعار دەستىك ءبىز. قازىر ۋاقتىلى سۋارىپ, كۇتىمگە الىپ وتىرمىز, – دەيدى اسقار اعاي.

قاراتوبە وڭىرىندە مۇنداي كيەلى تەرەك جالعىز ەمەس. سارالجىن اۋىلىنىڭ بۇرىنعى بەسوتار بولىم­شەسى جاعىندا «جۇمالى اعاشى» دەگەن جالعىز تەرەك بولدى. ونى ەككەن – اكادەميك قاجىم جۇماليەۆتىڭ اكەسى, قارابۋرا جۇمالى دەگەن كىسى ەكەن. سوناۋ جىلدارى كەزەكتى ەڭبەك دەمالىسىندا قاجىم جۇماليەۆ ماحامبەت دەگەن جاس بالاسىمەن اتاقونىسىنا كەلىپ, تۋعان جەردىڭ توپىراعىنا اۋەلى ءوزى اۋناپ, سوسىن بالاسىن اۋناتىپ الادى ەكەن.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى