ورال قالاسىنىڭ ىرگەسىندە «Sayat» ەتنوتۋريستىك ورتالىعى اشىلدى. وڭىردەگى بەلگىلى كاسىپكەر, مەتسەنات مۇرات جاكىباەۆ ۇيىمداستىرعان بۇل ورتالىقتىڭ ماقساتى – ىشكى ءتۋريزمدى دامىتۋ, ءوڭىردىڭ تابيعي بايلىعى مەن باي مادەنيەتىن بەلسەندى دەمالىس ارقىلى ناسيحاتتاۋ.
ەلباسى بيىلعى جولداۋىندا «باي تابيعاتىمىز بەن مادەني الەۋەتىمىزدى پايدالانۋ ءۇشىن سىرتتان كەلەتىن جانە ىشكى ءتۋريزمدى دامىتۋعا ەرەكشە كوڭىل ءبولۋ قاجەت. ۇكىمەت قىسقا مەرزىمدە سالالىق مەملەكەتتىك باعدارلاما قابىلداۋعا ءتيىس» دەگەن بولاتىن. باتىس قازاقستان وبلىسىندا اشىلعان ەتنوتۋريستىك ورتالىق ءدال وسى ماقسات ۇدەسىنەن شىققان.
– پرەزيدەنت وڭىرلەردى دامىتۋدىڭ ءبىر جولى ىشكى جانە سىرتقى ءتۋريزمدى دامىتۋ ەكەندىگىن ءجيى ايتىپ كەلەدى. الەمدەگى 10 جۇمىس ورنىنىڭ بىرەۋى ءدال وسى سالاعا تيەسىلى. ءبىز بۇگىن ءوڭىرىمىز ءۇشىن ەرەكشە ويعاعا – ەتنو-تۋريستىك ورتالىقتىڭ اشىلۋ سالتاناتىنا تاپ كەلدىك. بۇگىننەن باستاپ ءبىزدىڭ ءوڭىردىڭ ىشكى تۋريزم سالاسى جاڭا بەلەسكە شىقتى دەپ ايتۋعا بولادى. شىنىن ايتساق, ءبىزدىڭ وڭىردە تاريحي ورىندار, ەرەكشە ەسكەرتكىشتەر وتە كوپ. الىس-جاقىن شەتەلدەن كەلگەن مەيماندارعا, ءوز ەلىمىزدىڭ وزگە وڭىرلەرىنەن كەلەتىن قوناقتارعا كورسەتۋگە لايىق ساۋلەت جانە تابيعات ەسكەرتكىشتەرى, تاريحي ماڭىزى بار ورىندار از ەمەس. ايتا كەتەيىن, وسى ورتالىقتىڭ اۋماعىندا قازاقستان حالقى اسسامبلەياسىنىڭ «مەنىڭ ەلىم» اتتى ەتنواۋىلىن اشۋ جوسپاردا تۇر. ول جەردە ءبىزدىڭ ءوڭىردى مەكەندەيتىن بارلىق ۇلتتىڭ مادەنيەتى كورىنىس تابادى. شەتەلدىكتەر ءۇشىن بۇل وتە قىزىقتى, سوندىقتان تۋريستەر كوپ تارتىلادى دەپ ويلايمىن, – دەدى ءوڭىر باسشىسى التاي كولگىنوۆ.
جاڭا ەتنوتۋريستىك ورتالىق سپورتتىق, ەمدىك-ساۋىقتىرۋ جانە تانىمدىق باعىتتا قىزمەت كورسەتپەك. بۇل جەردە اتقا سالت ءمىنۋ داعدىسىنا ۇيرەنۋگە, ات سپورتىنىڭ وليمپيادالىق تۇرلەرىنە جاتتىعۋعا, تانىمدىق ەكسكۋرسيالار جاساۋعا بولادى. سونداي-اق ۇلتتىق ات سپورتى تۇرلەرى مەن يپپوتەراپيا دا «Sayat» ورتالىعىنىڭ ەرەكشەلىگىنىڭ ءبىرى. جاقىن ارادا بۇل جەردە سۋدا قايىقپەن قىدىرۋ, جاياۋ سەرۋەن, ۆەلوتۋريزم مەن قىستا شاڭعى تەبۋ جولعا قويىلماق. وزەننىڭ جاعاسى, توعايدىڭ ىشىندە ورنالاسقان ەتنوتۋريستىك ورتالىقتىڭ جاعراپيالىق جاعدايىنىڭ ءوزى جوعارىدا اتالعان دەمالىس تۇرلەرىن دامىتۋعا قولايلى مۇمكىندىك بەرىپ تۇر.
ورال قالاسىنىڭ ىرگەسىندە, 12-اق شاقىرىم جەردە, تابيعاتتىڭ اسەم مۇيىسىندە ورنالاسقان «Sayat» ورتالىعىندا 22 جىلقىعا ارنالعان اتقورا, جابىق مانەج بار. كەلۋشىلەر دەمالاتىن قوناق بولمەلەرى, دۋش, كىر جۋاتىن ورىن, اسحانا جانە وقىتۋ كلاسى دا قاراستىرىلعان.
– ءبىزدىڭ ماقساتىمىز – ولكەمىزدىڭ تۋريستىك الەۋەتىن اشىپ كورسەتىپ, زاماناۋي ستاندارتتار نەگىزىندە بەلسەندى دەمالىستى قالايتىن ازاماتتارعا قىزمەت كورسەتۋ, مەملەكەت-جەكەمەنشىك سەرىكتەستىگى اياسىندا ەلىمىزدىڭ تۋريستىك كلاستەرىن دامىتۋ. بۇل جەردە سابيدەن قارياعا دەيىنگى كەلۋشىلەرگە قىزىقتى باعدارلامالار ويلاستىرىلعان, – دەيدى وسى كەشەن يدەياسىنىڭ اۆتورى, كاسىپكەر مۇرات جاكىباەۆ. «بيزنەستىڭ جول كارتاسى-2020» باعدارلاماسى اياسىندا سالىنعان كەشەن قۇرىلىسىنا 300 ملن تەڭگە قارجى كەتىپتى.
– اۋماعى 5 گا جەردى الىپ جاتقان ەتنو-تۋريستىك ورتالىقتا قازىردىڭ وزىندە ءتۇرلى جارىستار وتكىزۋگە بولادى, وعان قاجەتتى ءارتۇرلى الاڭدار, قۇرال-جابدىقتار بار. جىلقىلارعا كەرەمەت جاعداي جاسالعان. كەشەن جارىستار وتكىزۋگە, بەلسەندى دەمالىس ۇيىمداستىرۋعا جانە يپپوتەراپيا جۇرگىزۋگە تولىق سايكەس كەلەدى, – دەيدى كەشەننىڭ اشىلۋ سالتاناتىنا ارنايى كەلگەن الماتىلىق مامان, قازاقستان ات سپورتى فەدەراتسياسىنىڭ وكىلى يانا كامەنسكايا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى