قىزىلوردا وبلىسىندا تۇرعىن ءۇي كەزەگىندە 27 مىڭ وتباسى تۇرسا, ونىڭ 23 مىڭى قىزىلوردا قالاسىنا تيەسىلى. وسىنشا وتباسى ءۇي-جايىن شەشۋ ءۇشىن ءوز جاعدايىنا ءتيىمدى جولداردى ىزدەيدى.
يپوتەكالىق باعدارلامالار ەلدىڭ بارىنە بىردەي قولجەتىمدى ەمەس. كوپتەگەن وتباسى اي سايىن بەلگىلەنگەن قارجىنى تولەۋگە قابىلەتتى بولعانىمەن بانك ۇسىنعان العاشقى 20-30 پايىز جارنانى تولەۋگە اقشاسىنىڭ باسىن قۇراي المايدى. بۇگىندە ايدالادا جاتقان باتپان قۇيرىق جوق. باياعى استا-توك زامانداعىداي تەگىن پاتەرلەردىڭ بەرىلمەيتىندىگىن مەملەكەت باسشىسى دا قاداپ ايتقان. بار قارجىسىنا تۇرعىن ءۇي قۇرىلىسىن سالىپ, ەسەلەۋدى ماقسات تۇتقان ينۆەستور ونداي تاۋەكەلگە بارا المايدى. «ۇيدەگى كوڭىلدى بازارداعى نارىق بۇزادى» دەگەندەي, بۇگىنگى زامان باسقا. تۇرعىن ءۇي سالۋدىڭ قانشالىقتى ماشاقاتى, تاۋەكەلى بارىنا سالىمشىلاردان قارجى جيناپ الىپ, باسىنا تارتسا ەتەككە جەتكىزە الماي, بورىشقا باتقان كاسىپورىندار جاقسى مىسال بولادى. ينۆەستورلاردىڭ تەگىن ءۇي سالىپ بەرۋگە ق ۇلىقسىزدىعىن وسىدان-اق شامالاي بەرىڭىز.
ال ء«وز ءۇيىم – ولەڭ توسەگىمسىز» ءومىر – ءومىر ەمەس. باستاپقى قارجىنى قۇيۋعا شاماسى جەتپەيتىندەر قايتپەك كەرەك؟!
قىزىلوردا وبلىسىنىڭ اكىمى قىرىمبەك كوشەرباەۆ وسى شارۋانىڭ رەتىن كەلتىردى.
وڭىردە باستاپقى تولەمسىز تۇرعىن ءۇي الۋعا مۇمكىندىك بەرەتىن «وردا» تۇرعىن ءۇي قۇرىلىسىنىڭ جول كارتاسى ازىرلەنگەنىن وبلىس اكىمى حالىققا ەسەپ بەرۋ كەزدەسۋىندە ايتقان ەدى.
ء«بىز ءوڭىر تۇرعىندارىنىڭ الەۋمەتتىك وسال توبىن مەيلىنشە قولجەتىمدى تۇرعىن ۇيمەن قامتاماسىز ەتۋدى ماقسات ەتىپ قويدىق. سول ءۇشىن 2017 جىلى 3 جىلعا ەسەپتەلگەن «وردا» تۇرعىن ءۇي قۇرىلىسىنىڭ جول كارتاسىن ازىرلەدىك. نەسيەلىك تۇرعىن ءۇيدىڭ كوپبالالى وتباسىلار, مۇمكىندىگى شەكتەۋلى جانە الەۋمەتتىك از قامتىلعان توپتارىنىڭ بارلىعىنا بىردەي قولجەتىمدى ەمەستىگىن ەسكەرىپ, «نۇرلى جەر» باعدارلاماسى اياسىندا سالىنىپ جاتقان نەسيەلىك تۇرعىن ۇيلەردى جەرگىلىكتى بيۋدجەت ەسەبىنەن ساتىپ الۋعا جىل سايىن وبلىستىق بيۋدجەتتەن 2 ملرد تەڭگەدەن قارجى ءبولۋ تۋرالى شەشىم قابىلدادىق», دەدى ول.
وبلىس اكىمىنىڭ باستاماسى قالاي ورىندالىپ جاتقاندىعى جۋىردا «نۇر وتان» وبلىستىق فيليالى عيماراتىندا وتكەن بريفينگتە دە جان-جاقتى تۇسىندىرىلگەن.
وبلىستا «نۇر وتان» پارتياسىنىڭ باستاۋىمەن بيۋدجەتتىك سالا قىزمەتكەرلەرىنە ارنالعان «قامقور باسپانا» جانە جاس وتباسىلارعا ارنالعان «جاس ارمان» جوبالارى قولعا الىندى. بۇل باعىتتا العاشقى جارنا 20 پايىزدىڭ 10%-ى وبلىستىق بيۋدجەتتەن ۇزاق مەرزىمگە, كومەك رەتىندە بەرىلەدى. نەگىزى, «نۇرلى جول» مەملەكەتتىك باعدارلاماسى اياسىندا 2018 جىلى تۇرعىن ءۇي قۇرىلىسىنا 14 ملرد تەڭگە قارالعان. ونىڭ 6,1 ملرد تەڭگەسى تۇرعىن ءۇي قۇرىلىسىنا, 7,9 ملرد تەڭگەسى ينجەنەرلىك-كوممۋنيكاتسيالىق ينفراقۇرىلىمنىڭ 50 جوباسىنا ءبولىندى. وبلىس بويىنشا 1747 پاتەرگە ارنالعان 69 ءۇيدىڭ قۇرىلىسى جۇرگىزىلىپ جاتىر.
سالا ماماندارى قاتىسقان جيىندا:
– قىزىلوردا قالاسىنىڭ سول جاعالاۋىنان 18 كوپقاباتتى تۇرعىن ءۇي جەكە ينۆەستورلار ەسەبىنەن سالىنىپ جاتىر. 14 ءۇيدىڭ 4 جانە 5-ءشى قاباتتارىندا 248 پاتەر «وردا» باعدارلاماسىنا قاتىسادى. جەرگىلىكتى اتقارۋشى ورگاندار جەكە ينۆەستورلاردان وسى پاتەرلەردى ساتىپ الادى. تۇرعىن ۇيگە مۇقتاج وتباسىلار جانە وسى باعدارلاماعا قاتىسۋشىلار «تۇرعىن ءۇي قۇرىلىس جيناق بانكى» اق-تا دەپوزيت اشۋ كەرەك. ءبىزدىڭ ماقساتىمىز – وڭىردەگى الەۋمەتتىك وسال توپتاعى وتباسىلار ءۇشىن تۇرعىن ءۇيدى قولجەتىمدى ەتۋ, – دەدى وبلىس اكىمىنىڭ ورىنباسارى سەرىك سۇلەيمەنوۆ.
باعدارلاما شارتتارىنا سايكەس كوپبالالى جانە تولىق ەمەس وتباسى, مۇمكىندىگى شەكتەۋلى جاندار نەمەسە مۇمكىندىگى شەكتەۋلى بالا تاربيەلەۋشى وتباسى, جەتىم بالالار مەن اتا-اناسىنىڭ قامقورلىعىنسىز قالعان بالالار, ءى, ءىى توپتاعى مۇگەدەكتەر, جات جۇرتتاردان كەلگەن قانداستارىمىز, مەملەكەتتىك قىزمەتشىلەر جانە 35 جاسقا دەيىنگى ەكى جىل نەكەدە تۇرعان جاس وتباسىلار باستاپقى تولەمسىز قاتىسا الادى.
«وردا» باعدارلاماسىنىڭ ارتىقشىلىعى, وسى ساناتقا جاتاتىن وتباسىلار ەشقانداي الدىن الا 20-30 پايىز تولەمسىز ەكى بولمەلى پاتەردى اي سايىن 42 مىڭ تەڭگە, ءۇش بولمەلى پاتەردى 52 مىڭ تەڭگە تولەي وتىرىپ الا الادى. باسىندا ءۇيى جوقتار بۇدان كوپ قارجىعا پاتەر جالداپ تۇراتىندىعىن ەسكەرسەك, بۇل الەۋمەتتىك جاعىنان از قورعالعان وتباسىلار ءۇشىن ايرىقشا جەڭىلدىك. ايتا كەتەيىك, قىزىلوردا وبلىسىنىڭ بۇل تاجىريبەسى ۇكىمەت تاراپىنان باسقا وبلىستارعا دا تاراتۋعا ۇسىنىلدى.
مەملەكەت باسشىسىنىڭ حالىقتى تۇرعىن ۇيمەن قامتۋ تۋرالى تاپسىرماسى قىزىلوردا وبلىسىندا وسىلايشا ورىندالىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى