قازاقستان ءاۋ باستان ورتالىق ازياداعى يننوۆاتسياعا ەڭ جاقىن, قازىرگى زاماننىڭ پروگرەسسيۆتى تەحنولوگيالارىن كەڭىنەن پايدالانعان, جاڭالىقتان قاشپاعان, ەسكى تۇسىنىكتەردەن ەرتەرەك قۇتىلۋعا ارەكەت جاساعان ەل عوي. سوندىقتان بۇگىنگى كۇنى ءبىزدىڭ وڭىردەگى تانىمال, جىلدام ءوسىپ كەلە جاتقان كوشباسشى ەلگە اينالدى. قازاقستاننىڭ وسى ءوڭىر عانا ەمەس, بۇكىل دۇنيە جۇزىنە جاقسى اتىمەن, زور بەدەلىمەن, ءپوزيتيۆتى يميدجىمەن تانىلعان مەملەكەت ەكەنىن ەشكىم جوققا شىعارا المايدى. سول زور ەلارالىق بەدەل قازاقستاننىڭ ەڭ نەگىزگى باعا جەتپەس بايلىعى, كەلەشەكتە ۇلكەن تابىستاردى الىپ كەلەتىن رەسۋرسى دەپ ايتار ەدىم.
يگى ءداستۇر بيىلعى جىلى دا جالعاسىن تاپتى. قازاقستان ليدەرى نۇرسۇلتان نازارباەۆتىڭ جاقىندا حالىققا ارناعان جولداۋىن مەن قازاق مەملەكەتىنىڭ تاريحىنداعى جاڭا كەزەڭ, جاڭا ءبىر ءداۋىردىڭ باستالۋى دەپ قابىل الدىم. باسقاسىن ايتپاعاندا ەلباسىنىڭ نەگىزگى باسىمدىق قاتارىندا الەۋمەتتىك سالانى, ادامي رەسۋرستاردى اتاعانى ماعان ەرەكشە اسەر ەتتى. عىلىم مەن ءبىلىم, جاڭا زاماناۋي تەحنولوگيالاردى تۇرمىستا كەڭىنەن پايدالانۋ, سول سالادا ىستەيتىن ادامداردىڭ ايلىق جالاقىسىن ايتارلىقتاي كوتەرۋ سياقتى ماسەلەلەر ءبىر تۋعان قازاق حالقىنىڭ وركەندەي بەرۋىنە جول سالماق.
ارينە, بۇل باعىتتا قازاقستاندا بۇدان بۇرىن دا وراسان زور جۇمىستار جاسالىپ, بىرقاتار ەلارالىق دەڭگەيلەرى جوعارى ۋنيۆەرسيتەتتەر, وقۋ ورىندارى, اكادەميالار اشىلعان بولاتىن. الداعى كۇندەرى بۇدان دا اۋقىمدى ىستەر جۇزەگە اساتىنى جولداۋدا تاعى دا اتاپ كورسەتىلگەن ەكەن. مەن, ماسەلەن كوپ جىلدار بويى وسى الەۋمەتتىك سالادا, سونىڭ ىشىندە عىلىم جانە ءبىلىم سەكتورىندا ەڭبەك ەتىپ كەلە جاتقان ادام رەتىندە نۇرسۇلتان نازارباەۆتىڭ بۇل باستاماسىنا بارىنشا قۋاندىم.
قازاقستان باسشىسىنىڭ بۇل جولداۋى قازاق حالقىنىڭ جاڭا ءبىر تاريحي كەزەڭگە, جاڭا ءبىر داۋىرگە قادام باسقانىن انىق كورسەتەدى دەر ەدىم. قازاق باۋىرلار, سىزدەردىڭ قاي ۋاقىتتا دا ارتتا قالماي, كەرەك بولسا الدىعا وزا قادام باسۋعا ارەكەت جاساعاندارىڭىز – سىزدەردىڭ باقىتتارىڭىز. لايىم سول قادامنان جازباۋلارىڭىزعا تىلەكتەسپىن!
وسموناكۋن يبرايموۆ,
قىرعىز ۇعا كوررەسپوندەنت-مۇشەسى, ەكس-مەملەكەتتىك حاتشى