2018 جىلى 24 قازاندا اۆستريانىڭ زالتسبۋرگ ۋنيۆەرسيتەتىندە «يادروسىز بولاشاق» سىيلىعىنىڭ (Nuclear-Free Future Award – NFFA) ماراپاتتاۋ ءراسىمى اياسىندا قازاقستاندىق سۋرەتشى, حالىقارالىق انتيادرولىق قوزعالىسىنىڭ بەلسەندىسى, «اتوم جوباسىنىڭ» قۇرمەتتى ەلشىسى كارىپبەك كۇيىكوۆ ماراپاتتالدى, دەپ حابارلايدى ءسىم ءباسپاسوز قىزمەتى.
قازاقستاننىڭ اۆسترياداعى ەلشىسى قايرات سارىباي «يادروسىز بولاشاق» سىيلىعىنىڭ يەگەرلەرىن انتيادرولىق قىزمەتتەرىنىڭ جوعارى باعا الۋىمەن قۇتتىقتاپ, كارىپبەك كۇيىكوۆتىڭ ماراپاتتالۋى يادرولىق قارۋسىزداندىرۋ مەن تاراتپاۋ جاھاندىق ۇدەرىستەرىندە قازاقستان ءرولى جانە مەملەكەت باسشىسى ن.نازارباەۆتىڭ باستامالارىنىڭ مويىندالۋىن بىلدىرەدى دەپ اتاپ ءوتتى. ەلشى بارلىق قاتىسۋشىلاردى الەمنىڭ يادرولىق جارىلىستاردان قۇتىلۋ ءۇشىن كۇش سالۋعا باعىتتالعان «اتوم جوباسى» ونلاين - پەتيتسياسىنا وزدەرىنىڭ قولىن قويۋعا شاقىردى.
قازاقستاندىق وكىلمەن قاتار, اۆستراليا, ۇلىبريتانيا, فرانتسيا جانە اۆستريانىڭ وكىلدەرى دە سىيلىقتىڭ يەگەرلەرى بولىپ اتالدى.
كارىپبەك كۇيىكوۆ – 2012 جىلى قازاقستان رەسپۋبليكاسىنىڭ پرەزيدەنتى ن.نازارباەۆ باستاماشىلىق جاساعان «اتوم جوباسىنىڭ» قۇرمەتتى ەلشىسى بولىپ تابىلادى. جوبانىڭ ميسسياسى – يادرولىق سىناقتارعا جاپپاي تىيىم سالۋ جانە بارلىق ەلدەردىڭ يادرولىق قارۋدى تولىق جويۋعا جاھاندىق قوعامدىق قولداۋدى بىرىكتىرۋ.
«يادروسىز بولاشاق» سىيلىعى 1998 جىلى فرانتس مولل قورىمەن قۇرىلدى جانە انتيادرولىق بەلسەندىلەردىڭ, ۇيىمداردىڭ جانە قاۋىمداستىقتاردىڭ قىزمەتىن ىنتالاندىرۋعا باعىتتالعان. بيىلعى جىلى سىيلىقتىڭ 20 جىلدىعى اتاپ وتىلۋدە.
بۇرىن الەمنىڭ 80-نەن استام وكىلدەرى مەن ۇيىمدارى اتالعان سىيلىققا يە بولعان, سونىڭ ىشىندە قازاقستاننان - يۋري كۋيدين, فوتوجۋرناليست, «نەۆادا-سەمەي» يادرولىققا قارسى قوزعالىسىنىڭ سەرىكتەسى, دۇنيەجۇزىلىك اتوم فوتوگرافتارى گيلدياسىنىڭ مۇشەسى, يادرولىق تاقىرىپ بويىنشا كوپتەگەن فوتوالبومداردىڭ اۆتورى (2000ج. ماراپاتتالعان).