الماتىدا تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ قاۋىپسىزدىك ورگاندارى مەن ارناۋلى قىزمەتتەرى باسشىلارى كەڭەسىنىڭ (قوبك) 45-وتىرىسى ءوتتى. القالى جيىندا قاۋىپسىزدىك سالاسىنداعى ورتاق ماسەلەلەردى وڭتايلى شەشۋدىڭ جولدارى سارالاندى.
ءىس-شاراعا ازەربايجان مقق, ارمەنيا ۇقق, بەلارۋس مقك, قازاقستان ۇقك, قىرعىزستان مۇقك, رەسەي فقق, تاجىكستان مۇقك جانە وزبەكستان مقق باسشىلارى باستاعان دەلەگاتسيالار قاتىستى. ودان باسقا, شاقىرىلعاندار رەتىندە ازەربايجان, قازاقستان جانە رەسەي سىرتقى بارلاۋ قىزمەتتەرىنىڭ, سونداي-اق تمد اتقارۋ كوميتەتى مەن تمد-عا قاتىسۋشى مەملەكەتتەردىڭ تەررورعا قارسى ورتالىعىنىڭ وكىلدەرى قاتىستى.
دوستاستىق ەلدەرىنىڭ قاۋىپسىزدىك ورگاندارىنىڭ قازىرگى زامانعى قاۋىپ-قاتەرلەرگە قارسى ءىس-قيمىل بويىنشا اقپاراتتىق جانە پراكتيكالىق ءوزارا ءىس-قيمىل تيىمدىلىگىن ارتتىرۋدىڭ وزەكتى ماسەلەلەرى تالقىلاندى. حالىقارالىق تەرروريزمگە, ترانسۇلتتىق ۇيىمداسقان قىلمىسقا قارسى كۇرەس جانە كيبەرقاۋىپسىزدىك سالاسىندا ىنتىماقتاستىقتى كۇشەيتۋ قاجەتتىگى اتالدى.
ارناۋلى قىزمەتتەر وكىلدەرى ءىرى حالىقارالىق ءىس-شارالار قاۋىپسىزدىگىن قامتاماسىز ەتۋگە باعىتتالعان شارالاردى جوسپارلاۋ جانە ۇيىمداستىرۋ بويىنشا ءوزارا تاجىريبە الماستى. باسقوسۋ قورىتىندىسى بويىنشا ءتيىستى شەشىمدەر مەن ولاردى ىسكە اسىرۋ ماسەلەلەرىنە نەگىزدەلگەن ناقتى ماقساتتار ايقىندالدى.
ارمان وكتيابر,
«ەگەمەن قازاقستان»
الماتى