ب. ساعىنتاەۆ ددسۇ باس ديرەكتورى ت. گەبرەيەسۋسپەن دەنساۋلىق ساقتاۋ جۇيەسىن جەتىلدىرۋ ماسەلەلەرىن تالقىلادى

كەزدەسۋ بارىسىندا الەمدە دەنساۋلىق ساقتاۋ جۇيەسىن دامىتۋعا, مەديتسينالىق قىزمەتتەر مەن ءبىلىمنىڭ ساپاسى مەن قولجەتىمدىلىگىن ارتتىرۋعا, سونداي-اق دەنساۋلىق ساقتاۋ ينفراقۇرىلىمىن جەتىلدىرۋ اياسىندا زاماناۋي تسيفرلىق تەحنولوگيالاردى ەنگىزۋگە قاتىستى ءوزارا ءىس-قيمىل جانە ورتاق تاسىلدەردى ازىرلەۋ ماسەلەلەرى تالقىلاندى.

ب. ساعىنتاەۆ ت. گەبرەيەسۋس مىرزاعا العاشقى مەديتسينالىق-سانيتارلىق كومەك جونىندەگى الماتى دەكلاراتسياسى قابىلدانعان كۇننەن بەرى 40 جىل وتۋىنە وراي وتكىزىلگەلى جاتقان جاھاندىق كونفەرەنتسيانى ۇيىمداستىرۋعا كورسەتكەن قولداۋى ءۇشىن العىس ايتىپ, وسىنداي ماڭىزدى قورىتىندى قۇجات قابىلداناتىنىنا سەنىم ءبىلدىردى.

1978 جىلى الماتى قالاسىندا الەمدەگى دەنساۋلىق ساقتاۋ سالاسىن دامىتۋعا ەلەۋلى اسەر ەتكەن العاشقى مەديتسينالىق-سانيتارلىق كومەك جونىندەگى الماتى دەكلاراتسياسى قابىلداندى. اتالعان اۋقىمدى شارانىڭ ارقاسىندا قازاقستاننىڭ الەمدىك دەنساۋلىق ساقتاۋ قوعامداستىعى الدىندا بەدەلى ارتتى.

ەلىمىز دۇنيەجۇزىلىك دەنساۋلىق ساقتاۋ ۇيىمىنا 1992 جىلدىڭ 19 تامىزىندا, ۇيىمنىڭ 180-مۇشەسى بولىپ قوسىلدى. قازاقستان گەوگرافيالىق جاعىنان ددسۇ-نىڭ ەۋروپالىق ايماعىنا جاتادى. بۇگىندە ددسۇ مۇشەلەرىنىڭ سانى 194 مەملەكەتكە جەتتى.

قازىرگى تاڭدا قازاقستان مەن ددسۇ اراسىندا تىعىز سەرىكتەستىك قاتىناستار قالىپتاسقان.  ددسۇ شارالارى اياسىندا جۇقپالى ەمەس جانە جۇقپالى اۋرۋلارمەن, اسىرەسە پوليوميەليتپەن, تۋبەركۋلەزبەن كۇرەس جانە حالىقارالىق دەنساۋلىق ساقتاۋ ەرەجەلەرىن جان-جاقتى ناسيحاتتاۋ بويىنشا قارقىندى جۇمىس اتقارىلدى. ددسۇ انا مەن بالا دەنساۋلىعىن قورعاۋ, تۋبەركۋلەز جانە ايتۆ/جيتس الدىن-الۋ جانە باقىلاۋ, سانيتارلىق قىزمەت كورسەتۋدى جاقسارتۋ سەكىلدى مەملەكەتتىك ساياساتتى جۇزەگە اسىرۋدا قازاقستانعا تۇراقتى تەحنيكالىق جانە كونسۋلتاتسيالىق كومەك كورسەتىپ كەلەدى. دەنساۋلىق ساقتاۋ سالاسىنداعى تۇراقتى دامۋ بويىنشا كوزدەگەن ماقساتتارعا جەتۋ ءۇشىن كوپ جۇمىس جاسالۋدا.